တၞၚ်သဳ၊ ဂျူလာၚ် ၄
ရးတၞၚ်သဳ ပ္ဍဲပွိုၚ်ဍုၚ်တၞၚ်သဳကဵု ပွိုၚ်ဍုၚ်ကျောန်သုတံဂှ် ပ္ဍဲဂိတုဂျူလာၚ် ၂ မွဲတ္ၚဲဓဝ်ဂှ် လ္ပာ်ကံၚ်ဇြဳပၞာန် ထောံဏာမခတိုဟ် နကဵုက္ၜၚ်ကျာသၞေၚ်ဝဲတုဲ ညးဍုၚ်ကွာန်ကောန်အရာပ် ပိတၠ ဇီုကပိုက်ကလိဂွံလဝ်ဝပ်ရောၚ် ညဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် အခိၚ်လဒေါဝ်တ္ၚဲ ၜိုတ် ၁၂ နာဍဳဂှ် က္ၜၚ်ကျာသၞေၚ်ဝဲၜါဖ္ဍိုက် တိုန်ကၠုၚ်နူဗ္ဒိုပ်ဒပ်ကျာဗိက်ဂှ်ဝွံ ထောံဏာလဝ်မခတိုဟ် ၁၀ မ ပ္ဍဲကဵုကွာန်တာရဖုၚ် ပွိုၚ်ဍုၚ်တၞၚ်သဳဂှ်ကဵု ကွာန်ဝါယျေတ် ပွိုၚ်ဍုၚ်ကျောန်သုတံဂှ်ရ။
ဟိုတ်နူဒးဒုၚ်ထောံလဝ်မခတိုဟ်ဂှ်တုဲ ပ္ဍဲကွာန်တာရဖုၚ်ဂှ် သ္ၚိဒၟံၚ် မသုန်မ လီုအာလဝ်တုဲ ညးဗြဴအာယုက် ၄၀ သၞာံ ၜါတၠ ကလိဂွံလဝ်ဝပ်တုဲ ကွးဘာဒ္စိတ်တန် နူကွာန်ဝါယျေတ်မွဲတၠ ဒးကဝေက်မခတိုဟ် ကလိဂွံအာလဝ်ဝပ်ရ။
အတိုၚ်ဂလာန် ညးဒေသတံဂှ်မ္ဂး ပ္ဍဲကွာန်ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ်တံဂှ် က္တဵုဒှ်ပေါဲဗ္တိုက်ဟွံမွဲမွဲသာ် နမသက္ကုဟိုတ် ဒှ်ပရေၚ်ဗ္တိုက်လဝ် ပ္ဍဲကွာန်ညးဍုၚ်ကွာန်ကောန်အရာပ်တံ မံၚ်တန်တဴတံဂှ်ရောၚ် ဟီုရ။
တုဲကၠုၚ် ဂိတုဂျောန် ၂၇ တေံဂှ်လေဝ် ဟိုတ်နူဒပ်ကံၚ်ဇြဳပၞာန် ထောံမခတိုဟ်နကဵုက္ၜၚ်ကျာ ပ္ဍဲကွာန်ကျဲထုၚ် ပွိုၚ်ဍုၚ်တၞၚ်သဳတံဂှ်တုဲ ကောန်ၚာ်သၟတ်မွဲတၠ ဇီုကပိုက်ကလိဂွံလဝ်ဝပ်ဏီရ။
ပ္ဍဲရးတၞၚ်သဳ ပေါဲဗ္တိုက်ၜါလ္ပာ်တံ ကလေၚ်သ္ကာတ်မြဟ်ဒၟံၚ်ဂှ် အပ္ဍဲသၞာံဏံ အပ္ဍဲကဵုကွာန် ဒၞါဲညးဍုၚ်ကွာန်ကောန်အရာပ်တံ မံၚ်တန်တဴတံဂှ် နကဵုတၚ်စောဲစပ် PDF တံ လုပ်အောပ်မံၚ်တံဂှ်ဂးတုဲ မွဲဏှမွဲဏှဟီုဂွံ ကၠောန်သ္ပဗ္တိုက်ဒၟံၚ် ပရေၚ်ဗ္တိုက်ထောံမခတိုဟ်တံရ။
အတိုၚ်လိက်ဒုၚ်စဳရေၚ် ဂကောံသုတေသန ညာန်လေန်တေတ်ဂှ်မ္ဂး အလုံဍုၚ်မွဲ သၞာံဏံ နူဂိတုဂျာန္နဝါရဳ စဵုကဵုဂိတုဨပရဴ အပ္ဍဲပွိုၚ်ပန်ဂိတု ဟိုတ်နူဒပ်ကံၚ်ဇြဳပၞာန် ဗ္တိုက်ကဵုပၞာန်ကျာတုဲ ညးဍုၚ်ကွာန်ကောန်အရာပ် ဗ္ဒါဲ ၃၆၀ တၠ ဒးချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ