ဍာ်ဗု၊ ဂျူလာၚ် ၄
အပ္ဍဲပွိုၚ်ဍုၚ်ဍာ်ဗု ရးတၞၚ်သဳဂှ် ဟိုတ်နူပေါဲဗ္တိုက် မက္တဵုဒှ်လဝ် ပ္ဍဲဂိတုဂျောန်တုဲကၠုၚ်တေံတုဲ ညးဒေသ ဒးဂြိပ်ဒဴပါဲဒလေတ်ဒၟံၚ် လ္ပာ်ပယျဵုသေံကဵု ဒၞါဲဗၠးဘဲတံ ဗွဲမဂၠိုၚ်ဝွံ ဟွံဂံၚ်ကလေၚ်စဴကၠုၚ်ဌာန်ဒၟံၚ်ဏီပုဟ်ဂှ် ဂွံတီကေတ် နူကဵုဒပ်ပၠန်ဂတးဍုၚ်မန် MSRF ရ။
ဂၠံၚ်ဇၞော်ပျဳထံၚ်သု ရေဝ်−ထဝါဲ ကံၚ်ဇြဳပၞာန် ဒးဗလးလဝ်တဲ ဂၠိုၚ်ကဵုဂိတုဂှ် သွက်ဂွံကလေၚ်ထိၚ်ဒက်မာန် စနူဂိတုဂျောန် ၇ တေံတုဲ ကြဴနူထ္ပက်ကရောၚ်ပၞာန် ပ္ဍဲပွိုၚ်ဍုၚ်ဍာ်ဗု နကဵုဇြဟတ်လၟိဟ်ဗွဲမဂၠိုၚ်ဂၠေၚ်တုဲ ပ္ဍဲကဵုစၟတ်တ္ၚဲ ၁၉ ဂှ် ပေါဲဗ္တိုက်ၜါလ္ပာ်တံ စက္တဵုဒှ်လဝ်ရ။
အပ္ဍဲပေါဲဗ္တိုက်ဏံဂှ် လ္ပာ်ကံၚ်ဇြဳပၞာန် ဟိုတ်နူထောံလဝ်မခတိုဟ်နကဵုက္ၜၚ်ကျာ ကေုာံ လွဟ်ဇၞော်တံဂှ််တုဲ နူကွာန်မျံက်ချဝ် ပွိုၚ်ဍုၚ်ဍာ်ဗုဂှ် သ္ၚိဒၟံၚ် ၜိုတ် ၄၀ မ ပၟတ်တူလီုလာ်အာလဝ်တုဲ ညးဒေသ ပွဳပွူ ၃၇၀၀ နူကွာန် ၉ ကွာန် ထောံလသာသ္ၚိဌာန် ဒးပါဲဒလေတ်လဝ်ရ။
ညးဒေသ သ္ၚိဒၟံၚ်လီုလာ်ဆောံလေၚ်အာလဝ်ဂမၠိုၚ်ဝွံ ပါဲဒလေတ်ကၠုၚ် လ္ပာ်ပယျဵုသေံ−ဗၟာတုဲ ပ္ဍဲကဵုကွာန်ဗ္ဒါဲဗ္ဒါဲတံဂှ်လေဝ် ဇူဒီုဒၟံၚ်မွဲလစုတ်တုဲ စဴအာဌာန်ဒၟံၚ်တံလေဝ် နွံဂှ် နာဲနဂါ ညးမၞုံအခေါၚ်ဟီုဂး MSRF ဟီုရ။
“ဗွဲမဂၠိုၚ်ဂှ်တှ်ေ ညးဍုၚ်ကွာန် ဒးဆောံလေၚ်လေၚ်ဒိုက်အာအိုတ်တံဂှ်တှ်ေ ပါဲဒလေတ်ကၠုၚ် လ္ပာ်ပယျဵုသေံဗၟာ ကွာန်ခလံက်ခနဳဂှ်ရ။ ဇူဒီုဒၟံၚ် ပ္ဍဲဘာလကျာ်တံဂှ် ဂွံမိၚ်ကေတ်ရ။ လ္ၚဵုတံဂှ်လေဝ် ပ္ဍဲကဵုကွာန်နွံဗ္ဒါဲဗ္ဒါဲတံဂှ် ဇူဒီုဒၟံၚ်ခေတ္တဂှ်နွံ။ လ္ၚဵုတံဂှ်တှ်ေ စဴအာဂှ်နွံ။ ဒပ်ပၞာန် တိတ်အာယျဟီုတှ်ေ လ္ၚဵုတံဂှ်ပၠန်လေဝ် ပါဲဒလေတ်ကၠုၚ် လ္ပာ်ဝါဇြေန် ဒၞါဲဒေသတိဍာ် ဗော်ဍုၚ်မန်တၟိ ထိၚ်ဒဝ်တံဂှ် ပိုယ်တံ ဂွံမိၚ်ကေတ်ရ” သာ်ဝွံ သ္ဂးရ။
ညးဍုၚ်ကွာန်ဒေသပါဲဒဴဘဲပၞာန် ညးဒေသဍာ်ဗု ပါဲဒလေတ်ကၠုၚ် ပ္ဍဲကွာန်ခလံက်ခနဳ လ္ပာ်ဍုၚ်ဗၟာ ပယျဵုသေံ−ဗၟာတံဂှ် ဗ္ဒါဲ ၁၃၀ နွံတုဲ ပ္ဍဲကဵုဏံ ကောန်ၚာ်သၟတ် အာယုက် ၆ သၞာံတံ မပါလုပ် တၠကောန်တှ်တံလေဝ် ပါလုပ်ဂှ် နာဲနဂါ လဴထ္ၜးလဝ်ရ။
ညးဒေသဍာ်ဗု ပါဲဒလေတ်ကၠုၚ် နူကဵုဒေသမဆေၚ်စပ်တံဂှ် သီုဗော်ဍုၚ်မန်တၟိ သီုဂကောံဗော်သွးမှာဇန်မန်တံ ကေုာံ ကံၚ်ဖြဳဖေဝ်ဒရာဍုၚ်မန်တံ ရီုဗၚ်ထံက်ပၚ်ကဵုဒၟံၚ် ဂဥုဲဇဗ၊ ပရေၚ်မၚ်မွဲပရေၚ်ထတ်ယုက်၊ ပရေၚ်စသုၚ်မံၚ်စံၚ် အရာမနွံပၟိက်တံရ။
နာဲနဂါဂှ်တှ်ေ ညးဍုၚ်ကွာန်ပါဲဒဴဘဲပၞာန် ပါဲဒလေတ်ဒၟံၚ် ဒၞါဲဗၠးဘဲ ဗွဲမဂၠိုၚ်ဂှ်ဝွံ ဂွံစဴဌာန်ဒၟံၚ် ဟွံချပ်ရတုဲ သွက်ဂွံဖျေံသ္ဇိုၚ် ပ္ဍဲပယျဵုဂှ်ရဟေၚ် ချပ်တိုန်ဒၟံၚ်အိုတ်ဂှ် ဟီုရ။
“ဟွံစဴသီုဖအိုတ်ပုဟ်၊ လ္ၚဵုတံဂှ်လေဝ် ဂွံစဴဂှ် ဟွံချပ်ရပုဟ်။ ဗီုတံဏံဂှ်နွံ။ သီုဖအိုတ်ဂှ် ဟွံဂွံစဴဏီပုဟ်။ ဗီုဟီုနူကၠၚ်ဂှ်ရ တိတ်အာ လ္ပာ်ဝါဇြေန်ကဵု လ္ပာ်ခလံက်ခနဳဂှ် နွံ။ လ္ၚဵုတံဂှ်တှ်ေ ဂွံစဴဂှ် ဟွံချပ်ရပုဟ်။ သွက်ဂွံဖျေံသ္ဇိုၚ် ပ္ဍဲပယျဵုဏံဂှ်ရ ချပ်ဒၟံၚ်အိုတ်ရောၚ်ဂှ် ဟီုဒၟံၚ်နွံရ” သာ်ဝွံ သ္ဂးရ။
အပ္ဍဲပေါဲဗ္တိုက် ပ္ဍဲဂိတုဂျောန် ၁၉ တေံဂှ် ကွာန်မျံက်ချဝ် နူဂကောံကွာန်ယာဖူ ပွိုၚ်ဍုၚ်ဍာ်ဗုဂှ်မပါလုပ် ကွာန်မြဟ်ဆာဲ၊ ကွာန်(သဲချောင်း) ၊ ပၞၚ်ဗုၚ်၊ (လှည်းဆိပ်၊ နဂါးအိုင်၊ ကျောင်းဒုံ၊ ရုံးပိုင်) ကေုာံ ကွာန်မိပ်ဇြိပ်တံဂှ် သ္ၚိဌာန် ၜိုတ် ၇၆၀ ဒးလဝ်ဘဲပၞာန်ရ။
အခိၚ်လၟုဟ် ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲကွာန်မျံက်ချဝ် ပွိုၚ်ဍုၚ်ဍာ်ဗုဂှ်ဝွံ ၜိုန်ရတိတ်စ္ဍးအာ နူကွာန်ခေတ္တကီုလေဝ် ပ္ဍဲဂိတုဂျူလာၚ် ၂ ဂှ် က္တဵုဒှ်လဝ်ပေါဲဗ္တိုက်ၜါလ္ပာ် ဗ္ဒါဲကွာန်လေဝ်ယှံၚ် မၞုံဒေသအပိုၚ်အခြာပရေၚ်ပိုန်ဒြပ်ထဝါဲဂှ်ရ။
အပ္ဍဲပေါဲဗ္တိုက်ဂှ် လ္ပာ်ဒပ်ပၠန်ဂတးတံ ကောန်သ္ဂံၚ်ပိတၠ ဇီုကပိုက်ကလိဂွံလဝ်ဝပ်တုဲ လ္ပာ်ကံၚ်ဇြဳပၞာန်လေဝ် ဟွံအောန်နူကဵုပန်တၠ ဇီုကပိုက်ကလိဂွံလဝ်ဝပ်ရောၚ် ညးတာလျိုၚ် ဂကောံဒပ်စဵုဒၞါညးဍုၚ်ကွာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပရိုၚ်−သြၚ်လောန်တိုၚ်(မ်)
ဗီု−Mon Relief and Development Center