မတ်မလီု၊ ဂျူလာၚ် ၄
ပ္ဍဲဍုၚ်မတ်မလီု ပွိုၚ်ဍုၚ်မတ်မလီုဂှ် နူဌာနပၟတ်ဓာတ်လလဳ ကံၚ်ဇြဳပၞာန် ခတှ်ပၟတ်မဳတာနွံဂးတုဲ မွဲသ္ၚိမ္ဂး အောန်အိုတ် နူၜါကိုဋ်ဒ္ကေဝ် စဵုကဵုစှော်ကိုဋ် ဗက်ကံက်ဒၟံၚ် ပ္ဍဲသ္ၚိတံ နွံဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူတၚ်စၞောန် ကံၚ်ဇြဳပၞာန် မဳတာယူနေတ် ကၠေံဒၟံၚ်နွံဂှ်တုဲ တခဳမဳတာ နူဌာနပၟတ်ဓာတ်လလဳတံဂှ်ဝွံ နကဵုဟိုတ် ခတှ်ယူနေတ်ပၟတ်တံနွံဂှ် ပံၚ်ထောံယူနေတ်တံတုဲ ကံက်ကၠုၚ်ဒၟံၚ်သြန်ကဵုကိုဋ် ပ္ဍဲသ္ၚိဒၟံၚ်တံရ။
အတိုၚ်သြၚ်လောန်တိုၚ်(မ်) ဂၠိုက်ဂၠါဲသၟာန်သၟုက်ဂွံဂှ်မ္ဂး ကၠာတေံ မွဲဂိတုမ္ဂး သ္ၚိ ၚုဟ်ပၟတ်အိုတ်ဒၟံၚ် မွဲဠက်ပြၚ်ဂှ်ဝွံ ခတှ်သှ်ေဂးတုဲ ဒးပၠောပ်ဒၟံၚ်သြန်ဗ္ဒါဲၜါကိုဋ်တုဲ သ္ၚိဒၟံၚ်ရပ်စပ်ဂၠိုၚ်တံဂှ်တှ်ေ စၟတ်ကေတ်နဒဒှ်ခတှ်သှ်ေတုဲ ကံက်ဒၟံၚ်ဂၠိုၚ်ကဵုစှော်ကိုဋ်ရ။
တခဳမဳတာပၟတ်တံဂှ်တှ်ေ အပ္ဍဲကာလသီအဝဵုဏံ ကံက်လဝ်ယူနေတ်ပၟတ်တံ ၜိုတ်ခယျကေတ်ဂှ်ရတုဲ အခါလၟုဟ် ဒးဗက်ကၠုၚ်ဗွဲလစှ်ေ ဂှ်တုဲ ခတှ်ယူနေတ်တံ ဂၠိုၚ်အာလဝ်ရောၚ် ထ္ၜးလဝ်ဟိုတ်ရ။
ပ္ဍဲအရာကံက်ခတှ်မဳတာပၟတ်တံဂှ် သ္ၚိဒၟံၚ်ကဵုဟွံမာန်တံဂှ် ဌာနပၟတ်ဓာတ်လလဳ ကံၚ်ဇြဳပၞာန်တံ ထပိုတ်ဒၟံၚ်ပၟတ်တံ နွံရောၚ် ညးဒေသဍုၚ်မတ်မလီုမွဲတၠ ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
“မဳတာသှ်ေ ဂှ်တှ်ေ သှ်ေဒၟံၚ်ကဵုကၠံတုဲ ၚုဟ်လှုဲဂှ်တှ်ေ တၞဟ်ခြာအာတၟာဂလိုၚ်ရ။ သ္ၚိအဲ ကၠာတေံ ဒးမံၚ် ၄၀၀၀/၅၀၀၀ ဂှ် လၟုဟ် အိုတ်လဝ် ၈၀၀၀၀ ဒ္ကေဝ်ရ။ သာ်ဏံကီု ဗ္ဒါဲသ္ၚိပိုယ်ဂှ် အိုတ်ဒၟံၚ် ၇ ကိုဋ်ပြၚ်ရ။ ညးတံတှ်ေ ပၠောပ်ဟွံမာန်ပုဟ်။ ပၠောပ်ဟွံမာန်တုဲ ကၠုၚ်ထပိုတ်မဳတာရ” သာ်ဝွံ သ္ဂးရ။
သ္အာၚ်နူဂှ်ပၠန် ခတှ်ယူနေတ်မဳတာ နွံဂှ် တခဳမဳတာတံ ဟီုကီုလေဝ် အခိၚ်လဵုသုၚ်စောဲတုဲ အခိၚ်လဵုယူနေတ်သှ်ေဒၟံၚ်ရောဟီုဂှ်လေဝ် ဟွံဟီုချိုတ်တ်ပၠိုတ်တ်မွဲသာ် ယဝ်ဟွံပၠောပ် ၚုဟ်ယူနေတ်သှ်ေတံဂှ်တှ်ေ ကေတ်အာအရေဝ် နကဵုသၞောဝ်ဓာတ်လလဳဏောၚ်ဂးတုဲ ဘပဠဒၟံၚ်တံ နွံဒၟံၚ်ရ။
ညးဒေသမတ်မလီုမွဲတၠဂှ်လေဝ် ဟိုတ်နူကံက်ၚုဟ်ယူနေတ်မဳတာ သှ်ေတံဂှ်တုဲ ညံၚ်ဟွံဂွံဒးဒုၚ်ထပိုတ်ပၟတ်ဓာတ်လလဳဂှ် ဒးဂၠါဲဒၟံၚ်သွက်ၚုဟ်မဳတာသၟးဂှ်ရ ပရေၚ်စသုၚ်မံၚ်စံၚ် သာကြေပ်ဂြတ်ကၠုၚ်ရောၚ် ဟီုရ။
“ ဒးမံၚ်တွဵု ဥပမာ မွဲဂိတု မွဲဠက်ဟီုမ္ဂး လၟုဟ်ဂှ် ပံၚ်ထောံကဵုခတှ်သှ်ေတံဂှ်တုဲ ဒးမံၚ်ၜိုတ်မွဲကိုဋ်ယျ။ အေ ဂှ်တှ်ေ သ္ၚိမွဲမွဲဂှ် သာတုဲ ဒးဒှ်အခက်အခုဲရ။ ဟွံပၠောပ်မ္ဂးလေဝ် မဳတာဂှ် ထပိုတ်ပၠန်ဏောၚ်။ ဂဇံက်မံၚ်ပုၚ် ကဵုပၟတ်ဏံရ၊ တေက်ပဠောံ သွက်ကောန်ၚာ် သွက်ဘာတံှဂ်လေဝ် အခိၚ်ဒးကၠောန်ဒၟံၚ်ဖအိုတ်ဂှ် သ္ၚိဒၟံၚ် ထပိုတ်ထောံပၟတ် မွဲမွဲသ္ၚိဂှ်တှ်ေ သာတုဲခက်ခုဲကၠုၚ်ဏောၚ်။ သြန်ဂွံနၚ် ပ္ဍဲကဵုကမၠောန် ဒးကၠောန်ဒၟံၚ်လၟေၚ်ၚ်တံဂှ် ကဵုထောံၚုဟ်ပၟတ်ဏံမ္ဂးလေဝ် ဂွံရာန်အရာတၞဟ်ဟ်ဂှ် သာတုဲခက်ခုဲကၠုၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပၟတ်ဓာတ်လလဳဝွံ မွဲတ္ၚဲမ္ဂး ၜိုတ် ၈ နာဍဳရ ဂွံဒၟံၚ်တုဲ အခိၚ်ဟွံမှာန်သၟးဟွံက ခတှ်ယူနေတ်သှ်ေဂးတုဲ အာတ်မိက်ကၠုၚ် ၚုဟ်မဳတာ ကဵုဆတံဂှ်ရ နကဵုညးဍုၚ်ကွာန်တံ သာတုဲကြေပ်ဂြတ်ကၠုၚ်ရောၚ် ညးဆက်ဟီုရ။
ပ္ဍဲဒၞါဲကံက်ကပှ်ပၟတ်ဓာတ်လလဳတံဂှ်လေဝ် မ္ၚးနူကဵုတခဳမဳတာ သၟဝ်တဲကံၚ်ဇြဳပၞာန်ဂှ် ကၠုၚ်စိုပ်ဗက်ဒၟံၚ်လှုဲ သီုကဵုပၞာန်ညးဍုၚ်ကွာန်တံဂှ်ရ နကဵုညးဍုၚ်ကွာန်ဂမၠိုၚ် ဖေက်လကိုတ်တုဲ ဒးကဵုဒၟံၚ်လွာဲဂှ်တံ နွံဒၟံၚ်ရောၚ် ညးဒေသတံ လဴထ္ၜးလဝ်ရ။
တွဵုရးဍုၚ်မန် ဍုၚ်မတ်မလီုဂှ်ဝွံ အပ္ဍဲကာလသီအဝဵုဏံ ညံၚ်ရဴဒေသတၞဟ်ဟ်ကီု ဟွံဂွံပၟတ်ဓာတ်လလဳ လၟေၚ်ၚ်ကီု၊ ပိုတ်ဂၠိုၚ်ကၠုၚ်ကီု သီုကဵုအခိၚ်ဟွံမှာန်တံဂှ်တုဲ အပ္ဍဲဒေသ စနူကဵုဘဝပရေၚ်ပိုန်ဒြပ်ပရေၚ်မၞိဟ်တံ ဒှ်တမ် ဒှ်ဒၟံၚ်အခက်အခုဲအိုတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ