မတ်မလီု၊ ဂျူလာၚ် ၅
ဟိုတ်နူပရေၚ်ပၞာန်သီအဝဵုတုဲ ညးဍုၚ်ကွာန်ဂမၠိုၚ် အခိၚ်ကြေပ်ဂြတ်ဒၟံၚ် ဇၞော်ကဵုဇြဟတ်ဂှ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ် ဥူအံၚ်ကျဳတုၚ် စၞောန်ပ္ညုၚ်လဝ် သွက်ဂွံကံက်ဂလိုၚ်ပ္တိုန်အကံက်အခေါန်ရ။
တုဲကၠုၚ် ပ္ဍဲဂိတုဂျူလာၚ် ၂ တေံ ပ္ဍဲကဵုကောံဓရီုပ္ညဳပ္ညပ်ကမၠောန် ဂကောံသ္ပအထံက်အရီုပရေၚ်ကံက်အခေါန် တွဵုရးဍုၚ်မန် မကၠောန်ဗဒှ်လဝ် ပ္ဍဲရုၚ်အလဵုအသဳတွဵုရး လ္တူဍုၚ်မတ်မလီုဂှ် ကဵုလဝ်စၞောန်ပၟိၚ်ရ။
သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ဂှ် အခေါန်ၚာၚ် ကံက်ဂွံနူကဵုကမၠောန်ပရေၚ်ဒုၚ်ကာ အပ္ဍဲတွဵုရး မသုန်သာ်တံဂှ် ညံၚ်ဂွံဂွံဂၠိုၚ် သွက်ဂွံရေၚ်တၠုၚ်ဂှ်ကီု၊ သွက်ဂွံဂလိုၚ်ပ္တိုန် ကံက်အာအခေါန်တံဂှ် ဟီုလဝ် ကုညးတာလျိုၚ် ဌာနမဆေၚ်စပ်တံ သွက်ဂွံကောပ်ကာဲအာ မဒှ်ရ။
သ္အာၚ်နူဂှ်ပၠန် ညးမဒးကဵုအကံက် နူကဏ္ဍမဆေၚ်စပ်ဂမၠိုၚ် တီကေတ်လျိုၚ်တုဲ ညံၚ်ဂွံကၠုၚ်ကဵုစိုပ်အကံက်အခေါန်ညးသ္ကအ်အိုတ်ဂှ် သွက်ဂွံစန်ဒက်အာဂှ်ကီု၊ သြန်အကံက်အခေါန် ထေက်ကဵုဂွံတံဂှ် ညံၚ်ဂွံဂွံပေၚ်ၚ် သွက်ဂွံကၠောန်ၜိုတ်ဂှ် စၞောန်ပ္ညုၚ်ကၠုၚ်ရ။
တၠကမၠောန်ပရေၚ်ပိုန်ဒြပ် တိုန်စိုပ်လဝ် ပေါဲကောံဓရီုဏံ မွဲတၠဂှ် ပ္ဍဲကဵုကမၠောန် လ္ပာ်ကံၚ်ဇြဳပၞာန် ဂလိုၚ်ပ္တိုန်ကံက်အာအခေါန်တံဂှ် ကမၠောန်ပရေၚ်သိုၚ်ခၞံ၊ ကမၠောန်ဟိုဝ်တေဝ်၊ ကမၠောန်ပရေၚ်ထတ်ယုက်၊ ပရေၚ်ပညာ ကေုာံ ကမၠောန်ပရေၚ်ဒုၚ်ကာတံ ပါလုပ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကမၠောန်သာ်လဵုရောဟီုတှ်ေ ညးကေတ်လဝ်ကာန်ထရိုက်တံ၊ တုဲပၠန် ဟဝ်တေဝ်တံ၊ ပရေၚ်ထတ်ယုက်၊ ပရေၚ်ပညာ၊ တံဏံဂှ် ဍေံတံ ကံက်ဒၟံၚ်တွဵုရဏောၚ်။ သွက်ဂွံဂွံအကံက်အခေါန် ဍိုက်က်ပေၚ်ၚ် မဒှ်ရ။ ဒၞါဲသၠးဒၟံၚ်တံ သွက်ဂွံဂွံပေၚ်ၚ်ဂှ် ညး( ဥူအံၚ်ကျဳတုၚ်) ဟီုဒၟံၚ် ညအ်ရ” သာ်ဝွံ သ္ဂးရ။
ဆ္ဂး ပ္ဍဲကဏ္ဍသာ်လဵု နကဵုဗီုပြၚ်သာ်လဵု မူစိတၟံကၠံ ဂလိုၚ်ပ္တိုန်ကံက်အာအခေါန်ရောဟီုဂှ် ဟွံဂွံတီကေတ်ဏီတုဲ စနူအခိၚ်လဵုတုဲ ဂလိုၚ်ပ္တိုန်ကံက်အာအခေါန်ဏောၚ်ဟီုဂှ်လေဝ် ဟီုဂးဏာလဝ် ဟွံမွဲပုဟ်ဂှ် ညးဆက်ဟီုရ။
တၠကမၠောန်ပရေၚ်ပိုန်ဒြပ်မွဲတၠပၠန်ဂှ်လေဝ် အခိၚ်ပရေၚ်ပိုန်ဒြပ်ကၟိန်ဍုၚ် စှ်ေဒၟံၚ်ဂှ် စဳဇန်လဝ် သွက်ဂွံကံက်အခေါန်ဂှ် ဒှ်အကာဲအရာဒှ်ဟွံထေက်တုဲ ထပ်ဒှ်ကၠုၚ်အကြေပ်အဂြတ်တံမာန်ရောၚ် ဟီုရ။
“အတိုၚ်အကာဲအရာဗလးတိဏံ ဍာံဍာံဂှ်တှ်ေ အခိၚ်ဏံဂှ် ကံက်ဂလိုၚ်ပ္တိုန်ဟွံထေက်ပုဟ်။ လၟုဟ်ရဂှ် တၠကမၠောန်သီုဖအိုတ် ဒှ်အခိၚ်ကာလခက်ခုဲဒၟံၚ်ရ။ ထပ်ပပဵုပ္တိုန်အခေါန်ၚာၚ်ပၠန်မ္ဂး ဒှ်ကၠုၚ် ညံၚ်ရဴပြသၞာဒးသောၚ်ကလး မကျာတ်ဝါတ်မွဲဏောၚ်။ မွဲပၠန်ဂှ်လေဝ် ပြေပြံၚ်ဟွံမာန်ပုဟ်။ တၠကမၠောန် လ္ပာ်ဏံဂှ်လေဝ် သ္ကဵုဒှ်တဴအကြေပ်အဂြတ် ဝါတ်တ်ဂါတ်တ်မွဲဏောၚ်၊ ဒှ်ဒၟံၚ်အခိၚ်ဒးရုန်ဂ္စါန်ဒၟံၚ် ဗွဲမဝါတ်ဂါတ်မွဲဏောၚ်” သာ်ဝွံ သ္ဂးရ။
အခိၚ်ကာလ ကြေပ်ဂြတ်ဒၟံၚ်သာ်ဏံဂှ် ယဝ်ရကံက်ပပဵုပ္တိုန်အကံက်ခေါန်မ္ဂး တၠကမၠောန်ဂမၠိုၚ် သၠုၚ်ပ္တိုန်ၚုဟ် လ္တူဗၞိက်ပ္တိတ်ဂမၠိုၚ်ဏောၚ်တုဲ ၚုဟ်သၠုၚ်အာမ္ဂးလေဝ် ညးဍုၚ်ကွာန်ဒးရပ်စပ်တံရဟေၚ် သာတုဲအိုတ်ဂၠိုၚ်ဂှ် ညးဆက်ဟီုရ။
မွဲလ္ပာ်ဂှ်ပၠန် ကံၚ်ဇြဳပၞာန် သွက်ဂွံကံက်ဂလိုၚ်ပ္တိုန်အကံက်အခေါန်မာန်ဂှ် ဒၞါဲမၞိဟ်စဳ အပ္ဍဲဒေသတံကဵု ဒၞါဲဂၠံၚ်ပိပန်သွာၚ်တံဂှ် ကွက်လဝ်ပဝ်သတာ စပ်ကဵုအကံက်အခေါန်တံနွံတုဲ ကော်ကဵုလညာတ် ကုတၠကမၠောန်တံလေဝ် နွံဒၟံၚ်ရ။
ပ္ဍဲတွဵုရးဍုၚ်မန်ဂှ်တှ်ေ ကံၚ်ဇြဳပၞာန် ပလေဝ်ပလေတ်ဒၟံၚ် သွက်ဂွံကံက်ပပဵုပ္တိုန်အကံက်အခေါန်ကီုလေဝ် ဟိုတ်နူပရေၚ်ပၞာန်သီအဝဵုတုဲ ကမၠောန်ကၟိတ်အောန်စှ်ေကၠုၚ်ကီု၊ စနူကဵုဗၞိက်စၞစသ္ဇိုၚ်တံဂှ် ၚုဟ်သၠုၚ်တိုန်ဒၟံၚ်ဂၠိုၚ်ကဵုဆဂှ် ညးဍုၚ်ကွာန်ဂမၠိုၚ် ဒးဒုၚ်စသိုၚ်ဒၟံၚ် ဇၞော်ကဵုဇြဟတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ