နေဗျဳဒဝ်၊ ဂျူလာၚ် ၅
ကောန်တန်ဗ္တောန် စှ်ေနူဘာဗ္တောန်ကွတ်ပၞာန်လၟေၚ် (၁) အပ္ဍဲသတ္တာဟတုဲကၠုၚ်တေံတံဂှ် ကံၚ်ဇြဳပၞာန် ဟွံကဵုအခေါၚ်ဇူမွဲသာ် ပလံၚ်ဏာဒၟံၚ် ဒၞါဲဒေသဒှ်ပေါဲဗ္တိုက်တံကဵု ဒၞါဲနွံပၟိက်ဇြဟတ်ဒပ်တံတပ်ပ် နွံဒၟံၚ်ရောၚ် ဂွံတီကေတ် နူကဵုဗွိုၚ်ဒပ် CDM တံရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ဂယိုၚ်ပ္တိုန်လဝ်ဂှ်မ္ဂး တန်ဗ္တောန်ကွတ်ပၞာန်လၟေၚ် (၁) ပံက်လဝ် နကဵုဗ္ၜတ်အလုံဍုၚ်မွဲဂှ် ပ္ဍဲဂိတုဂျောန် ၂၈ တုဲကၠုၚ်တေံ ဌာန်ဂအုပ်ပၞာန်ရးညးကဵုညး ကၠောန်ဗဒှ်လဝ် သ္ဘၚ်စှ်ေဘာ ပ္ဍဲကဵုဘာတန်ဗ္တောန်ဒေသတံဂှ်ရ။
ညးမစှ်ေနူဘာတန်ဗ္တောန်ကွတ်ပၞာန်တံဂှ်ဝွံ သွက်ဂွံပလံၚ်ဗစိုပ် တမ်ဒပ်မိမ နွံပ္ဍဲဌာန်ဂအုပ်ရးပၞာန်တံဂှ် ကဵုလဝ်အမိၚ် ပါ်လဝ်အတိုၚ်လၟိဟ်မၞိဟ်နွံပၟိက်တံဂှ်တုဲ စိုပ်ကၠုၚ် ဇရေၚ်ဌာန်ဂအုပ်တမ်ဒပ်တံဂှ်မ္ဂး မွဲသတ္တာဟ ပွိုၚ် ၁၀ တ္ၚဲ ကဵုအာအခေါၚ်ဇူဏောၚ် မဒှ်ရ။
ဆ္ဂး ညးမစှ်ေနူတန်ဗ္တောန် နူကဵုလၟေၚ် (၁) သီုဖအိုတ်တံဂှ် ကဵုလဝ်အခေါၚ်ဇူ ဟွံမွဲတုဲ ကဵုကလေၚ်စဴလဝ် ဇရေၚ်ဌာန်ဒၟံၚ်တံလေဝ် ဟွံမွဲမွဲသာ် ပ္ဍဲကဵုမုက်ပၞာန် နွံပၟိက်တံဂှ် ပလံၚ်အာဏောၚ် ဗိုလ်ဇၞော်ဇြေန်ယဝ် CDM ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“တန်ဗ္တောန်ကော်လဝ် အတိုၚ်သၞောဝ်ယိုက်ဂၠေၚ်လျိုၚ်ပၞာန်တံသီုဖအိုတ်ဂှ် ကဵုလဝ်အခေါၚ်ဇူလေဝ် ဟွံမွဲပုဟ်။ ကဵုစဴလဝ်သ္ၚိလေဝ် ဟွံမွဲပုဟ်။ လၟုဟ်တှ်ေ တမ်ဒပ်မိမတံရဂှ် ဟွံပလံၚ်ဏီပုဟ်ဟီုဂှ် ပိုယ်တံ ဂွံတီကေတ်ရ။ ထိၚ်လဝ် ပ္ဍဲကဵုဒပ် ဒၞါဲသ္ကိုပ်ဍုၚ်ဒပ် ဌာန်ဂအုပ်ပၞာန်ရး မဆေၚ်စပ်တံဂှ်ရ။ ဒၞါဲရုၚ်သ္ကိုပ်ဍုၚ်ဒပ် ဟွံမွဲတံဂှ်တှ်ေ စွံလဝ် ပ္ဍဲဒၞါဲစၟဳတ်တံဂှ်ရောၚ် ပိုယ်တံ ဂွံတီကေတ်ရ။ ဒၞါဲနွံပၟိက် ပ္ဍဲဗလးမုက်ပၞာန်တံဂှ် ဒက်ဂကောံတုဲ ပလံၚ်အာညးတံလွာဲဂှ်ဏောၚ်ဂှ် ပိုယ်တံ ဂွံတီကေတ်ရ” သာ်ဝွံ သ္ဂးရ။
ပ္ဍဲရးသေံသ္ကုတ်သၟဝ်ကျာ ပေါဲဗ္တိုက်ကလေၚ်သ္ကာတ်မြဟ်ဒၟံၚ်ဂှ် မပါလုပ် ဒေသရခေၚ်၊ ချေၚ်၊ သက်ကိုၚ်၊ ကချေၚ်တံဂှ် ပလံၚ်အာဏောၚ် ဒဒှ်ရဂွံတီကေတ်ဂှ် နိဿဲကေတ် တၚ်နၚ်ပရိုၚ် နူတမ်ရိုဟ်ပရိုၚ်အပ္ဍဲဒပ်တံတုဲ ဗိုလ်ဇၞော် ဇြေန်ယဝ် လဴထ္ၜးလဝ်ရ။
အတိုၚ်ဌာန်ပရိုၚ်အပ္ဍဲဍုၚ်လ္ၚဵု ထ္မံက်ထ္ၜးလဝ်ဂှ်မ္ဂး ကောန်ဒပ်စှ်ေနူဘာပၞာန် လၟေၚ် (၁) တံဂှ် ဟွံကဵုအခေါၚ်စဴ ဇရေၚ်ဂြောဝ်ဂတာမွဲသာ် ပလံၚ်ဗစိုပ်ဏာလဝ် ဇရေၚ်ဗ္ဒိုပ်ဒပ်မုက်ပၞာန် ဒၞါဲပေါဲဗ္တိုက်သ္ကာတ်မြဟ်ဒၟံၚ် ပ္ဍဲကဵုရးသေံသ္ကုတ်သၟဝ်ကျာတံကဵု တွဵုရးရခေၚ်တံဂှ် နွံလဝ်ရောၚ် ဂွံတီကေတ်ရ။
သ္အာၚ်နူဂှ်ပၠန် သွက်ဂွံပါ်ပရအ်ဖဆုဲပြံၚ် ညးမစှ်ေနူတန်ဗ္တောန်တံ သီုကဵုယၟု ပ္ဍဲကဵုတမ်ဒပ်ခမရ၊ ခလရ နွံသၟဝ်ကောပ်ကာဲ ဌာန်ဂအုပ်ပၞာန်ရး ဒေသတၞၚ်သဳ၊ သက်ကိုၚ်၊ ရခေၚ် ကေုာံ ရးသေံသၟဝ်ကျာတံဂှ် ကံၚ်ဇြဳပၞာန် ကဵုကၠုၚ်လဝ်စၞောန်သ္ၚိတ်တ် နူစဂိတုဂျောန် ၂၇ တုဲကၠုၚ်တေံရဂှ် ပရိုၚ်မံက်တိတ်ဒၟံၚ်ရ။
ဗိုလ်ဇၞော် CDM ညဳသုတဂှ်တှ်ေ အခိၚ်လၟုဟ် ဒေသလဵုဟွံဟီု ဟိုတ်နူကြပ်ဒှ်ဒၟံၚ် မုက်ပၞာန်သီုဖအိုတ်ဂှ်ရ သွက်ဂွံယိုက်ဂၠေၚ်တာလျိုၚ် ပ္ဍဲကဵုပၞောန်လက္ကရဴ ဒၞါဲနွံပၟိက်ဇြဟတ်ပၞာန်တံ ဒေသပေါဲဗ္တိုက်သ္ကာတ်မြဟ်တံဂှ်ဂးတုဲ ပလံၚ်ဏာလဝ်မုက်ပၞာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“သီုဖအိုတ်ဂှ် ဒှ်ဒၟံၚ်မုက်ပၞာန်ရဏောၚ်။ ပြဟ်ဟ်ဏံ နွံပၟိက်ဒၟံၚ်ဂှ်လေဝ် ဒၞါဲတံဏံ ဒှ်ဒၟံၚ်ဒၞါဲနွံပၟိက် ဇြဟတ်ဒပ်တံဂှ်ရ နကဵုဍေံတံ သွက်ဂွံအာယိုက်ဂၠေၚ်လျိုၚ်လ္ပာ်တံဏံ ပၞောန်လက္ကရဴဏောၚ် ဟီုကၠုၚ်မာန်ကီုလေဝ် ပလံၚ်ဏာလဝ်ဂှ်တှ်ေ မုက်ပၞာန်ရဏောၚ်။ နကဵုဗီုပြၚ်သာ်ဏံ ပလံၚ်ဏာလဝ် ဒေသပေါဲဗ္တိုက်က္တဵုဒှ်ဒၟံၚ်တံဂှ်ရ။ အေ ဂှ်တှ်ေ လ္ပာ်ဍေံတံ ပလံၚ်မုက်ပၞာန် တိုက်ရိုက်ဏောၚ်ဂှ် ဟီုဟွံသေၚ်ပုဟ်။ ဆ္ဂး ဒၞါဲဒေသပေါဲဗ္တိုက်သ္ကာတ်မြဟ်ဒၟံၚ်တံဂှ် ပလံၚ်ဏာလဝ်ဂှ်ရ ဒးဟီုမွဲနဲပၠန်မ္ဂး ညအ်ဂှ် ပလံၚ်ဏာလဝ် မုက်ပၞာန်ရဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ ပ္ကတ်ပ္ကေၚ်ဗ္တောန်ကဵုလဝ် ညးယိုက်လျိုၚ်ပၞာန်ဂမၠိုၚ် မ္ၚးနူကဵုဘာသာ ပရေၚ်ထတ်မ္ၚိုဟ်တံကဵု ဘာသာပၠပၞာန်တံဂှ် သီုကဵုပ္ကတ်ပ္ကေၚ်ကဵုလဝ် ဘာသာဗျူဟာကွတ်ပၞာန် မပ္တံကဵု ပွမဆိုက်ဗ္ဒက်ပ္ဍဲမုက်ပၞာန်၊ ပ္ကတ်ပ္ကေၚ်ဇက်တိုန် မွဲက္ဍိုပ်တုဲမွဲက္ဍိုပ်ဂှ်ကီု၊ ဗျူဟာကွတ်ပၞာန်ဗွဲတၟေၚ်၊ ပရေၚ်ဂီုကၠီုလ္ပာ်ပၞာန်၊ ပရေၚ်လၞိန်ဗပိန်တံဂှ်ရောၚ် သ္ဂးရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန်ဂှ်မ္ဂး ညးစှ်ေနူတန်ဗ္တောန်ဂမၠိုၚ်ဝွံ ဒးယိုက်ဂၠေၚ်တာလျိုၚ် ပွိုၚ်ၜါသၞာံဏောၚ်ကီုလေဝ် ပ္ဍဲအကာဲအရာကၟိန်ဍုၚ် ကာတၟေၚ်ဂှ်တှ်ေ စဵုကဵု ၅ သၞာံ ဒးယိုက်ဂၠေၚ်လျိုၚ်ပၞာန်ဏောၚ်ဂှ် စၞောန်ပျးလဝ်ရ။
ကံၚ်ဇြဳပၞာန်ဂှ်တှ်ေ နကဵုဟိုတ်ဍုၚ်ကွာန်ဟွံညိၚ်ဝတ်ဂှ် ပပဵုပ္တိုန်ဒၟံၚ်အာယုက်ကာလကာတၟေၚ်ဂှ် ၆ ဂိတုမွဲဝါတုဲ အာယုက်ပပဵုပ္တိုန်လဝ် လက္ကရဴအိုတ်ဂှ်လေဝ် ဂိတုဂျူလာၚ် ၃၁ ဏံ အိုတ်ရဏောၚ် မဒှ်ရ။
အခိၚ်လၟုဟ် သွက်ဂွံဗပေၚ်ဇြဟတ်ဒပ်လေၚ်ဒိုက်ဒၟံၚ်တံဂှ် ကံၚ်ဇြဳပၞာန် ပံက်လဝ် ဘာပ္ကတ်ပ္ကေၚ် ပ္ဍဲတိဍာ်ဌာန်ဂအုပ်ပၞာန်ရး မဆေၚ်စပ်တံ စဵုကဵုလၟေၚ် (၂) တုဲ သွက်လၟေၚ်ဂတဂတဏံဂှ်လေဝ် ကၠောန်ၜိုတ်ဒၟံၚ် သွက်ဂွံပကောံပ္ကေဝ်ကောန်ဒပ်တံဂှ်ရ။
ညးခါတ်အကာဲပရေၚ်ပၞာန်တံဂှ်တှ်ေ ကံၚ်ဇြဳပၞာန် ဇြဟတ်ဒပ်ဍိုန်လျကၠုၚ်ဒၟံၚ်ဂှ်ဝွံ သွက်ဂွံတာဒၞါကၠေံ ပၞာန်ထ္ပက်ဂကောံဇြဟတ်ပၠန်ဂတးတံမာန်၊ သွက်ဂွံဗပေၚ်ဇြဟတ်ပၞာန် နွံပၟိက်တံဂှ် ကဵုတန်ဗ္တောန် ကုကောန်ဒပ်တ်ၟိတၟိတံ ဗွဲမပြဟ်တုဲ စဳဇန်ဒၟံၚ် သွက်ဂွံပလံၚ်ဗစိုပ်မုက်ပၞာန်ရောၚ် သ္ၚဳဂၠိပ်လဝ်အိုတ်ရ။
အတိုၚ်လိက်ဒုၚ်စဳရေၚ် ဂကောံမၚ်လ္ၚတ် ကေၚ်ကာဍုၚ်ဗၟာ ကေုာံ ပဋိပက္ခ BACS ဂှ်မ္ဂး သွက်တန်ဗ္တောန်ကွတ်ပၞာန် လၟေၚ် (၁) ကဵု လၟေၚ် (၂) တံဂှ် ပံက်လဝ်တန်ဗ္တောန် ၂၁ ဘာတုဲ ပ္ဍဲကဵုၜါလၟေၚ်ဂှ် ညးသၟတ် ပွဳပွူ ၉၀၀၀ ဒးဒုၚ်ပ္ကောံပ္ကေဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram