ဗြဝတဳ၊ ဂျူလာၚ် ၆
ပရေၚ်ပၞာန်အံၚ်ဇေယျ ဒပ်ကံၚ်ဇြဳပၞာန်ဂှ် တက်ပလီုအာ ဗွဲမသၟဟ်အစောံဏောၚ်တုဲ နကဵုကောန်ဒပ်ကံၚ်ဇြဳပၞာန် စိုပ်ဒၟံၚ်မုက်ပၞာန် ကရောံပရေၚ်ပၞာန်အံၚ်ဇေယျတံဂမၠိုၚ် သွက်ဂွံကၠုၚ်စိုပ်ပအပ်လွဟ်အိုတ်ဂှ် ဒပ်ပၞာန်ဗၠးၜးကောန်ဂကူကရေၚ် KNLA တံ လလောၚ်ပ္တိတ်လဝ် ပ္ဍဲဂိတုဂျူလာၚ် ၅ တေံရ။
ဆန္ဒဇကုဟွံပါမွဲသာ် ဒးဒုၚ်ကော်ပၠောပ် အပ္ဍဲဒပ်ပၞာန် အတေၚ်အဓမ္မတုဲ ဟိုတ်နူစကာ အနိၚ်အပိုၚ်တံတုဲ နကဵုကောန်ဒပ်ကံၚ်ဇြဳပၞာန် စိုပ်ဒၟံၚ်မုက်ပၞာန် ပရေၚ်ပၞာန်အံၚ်ဇေယျမွဲဒၞါဲတံဂမၠိုၚ် ယဝ်မိက်ဂွံဂျိုၚ်တဴအာလမျီု ဗွဲမဗွဲကဵုသၞောတ်အစာံ သၞောဝ်ဍုၚ်သ္အာၚ်တံမ္ဂး ကၠုၚ်စိုပ်ပအပ်လွဟ် ဇရေၚ် KNLA ဂှ်ဟေၚ် ဒှ်ဂၠံၚ်ဍာန်ဒးမွဲဂှ် KNLA သ္ဂးရ။
“ကၟာဲကေတ်လွဟ်ပလှ်လဝ်မကမ်တုဲ၊ ကစိုၚ်က္ဍိုပ်တုဲ နကဵုတဲသၟး ဒၞါဲစိုပ်ဒၟံၚ်ဂှ် လသာကၠေံတုဲ သြဝ်ကၠုၚ်စိုပ် ဇရေၚ်ဂကောံဒပ် KNLA တံညိ” ပ္ဍဲတၚ်လလောၚ်တြး KNLA ဂှ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် ဂိတုဂျူလာၚ် ၅ အခိၚ်နူဂယးဂှ် ဒပ်ပၞာန်ဗၠးၜးကောန်ဂကူကရေၚ် KNLA လုပ်စိုပ်ပန်ပှော်လဝ် ပရေၚ်ပၞာန်အံၚ်ဇေယျ ကံၚ်ဇြဳပၞာန် ပၞောန်လက္ကရဴဂှ်တုဲ တက်သရိုဟ်အာ ပရေၚ်ပၞာန်အံၚ်ဇေယျ ကရောံဒပ်ပံၚ်ကောံတံ ဗွဲမသၟဟ်အစောံဏောၚ်ဂှ် ဟီုဂးကဵုလဝ်သမ္တီရ။
ပ္ဍဲဂိတုဂျူလာၚ် ၅ အခိၚ်နူဂယးဂှ် ပ္ဍဲကဵုမွဲဒမြိပ်ဗ္ဒါဲဍုၚ်ကအ်ကြိက်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံဂှ် ပေါဲဗ္တိုက်ၜါလ္ပာ် က္တဵုဒှ်လဝ် ဗွဲမသ္ကာတ်မြဟ်တုဲ လ္ပာ်ဒပ်ကံၚ်ဇြဳပၞာန် ပန်ပှော်လဝ်ကဵု လွဟ်ဇၞော် ကြာန်န်တုဲ လွဟ်ဇၞော်ဒတုံဗ္တိုဟ်ထ္ကးအာလဝ် ပ္ဍဲကွာန် သ္ကုတ်သၟဝ်ကျာ ဍုၚ်ကအ်ကြိက်ဂှ်ရောၚ် ညးဒေသတံ ဟီုရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးတုဲ သ္ၚိဒၟံၚ်ညးဍုၚ်ကွာန်ဒေသ နွံအပ္ဍဲကွာန် သ္ကုတ်သၟဝ်ကျာဍုၚ်ကအ်ကြိက် လ္ၚဵုတံ ဇီုကပိုက် လီုအာလဝ်တုဲ ညးဒေသတံလေဝ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ နွံဒၟံၚ်ရောၚ် ဂွံတီကေတ် ဇရေၚ်ညးဒေသကအ်ကြိက်တံရ။
ဒပ်ကံၚ်ဇြဳပၞာန်ဝွံ နူစဂိတုဨပရဴတုဲကၠုၚ်တေံ စထ္မံက်လဝ်ရုပ်ရဴ ပရေၚ်ပၞာန်အံၚ်ဇေယျ ကဆံၚ်ကၟိန်ဍုၚ်ဂှ်တုဲ ကရောၚ်ပၞာန်အံၚ်ဇေယျဂှ်ဝွံ စဵုကဵုလအ်ကၠုၚ်ပွိုၚ် ၃ ဂိတုဂှ် ဆက်အာဟွံဂွံ နွံဒၟံၚ်လ္တူရေၚ်ဒဵုဒဝ်န တိဍာ် KNU ဂှ်ရ။
အပ္ဍဲပေါဲဗ္တိုက် မက္တဵုဒှ်လဝ် ဂိတုဗွဲမလအ်လဂှ် ကောန်ဒပ်ကံၚ်ဇြဳပၞာန်လ္ၚဵု နူကဵုကရောၚ်ပၞာန်အံၚ်ဇေယျ ဒးဂိဒၟံၚ်တံဝွံ ကၠုၚ်စိုပ်ဖျေံလွဟ် ပံၚ်တောဲလဝ်ကဵု ဒပ်ပံၚ်ကောံ KNLA တံ နွံဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြး KNLA ဗဟဵုရ။
ပရိုၚ်−သြၚ်လောန်တိုၚ်(မ်)
ဗီု-KNLA (File Photo)