ဝါယှေန်တာန်၊ ဂျူလာၚ် ၄
သတ္တာဟတုဲကၠုၚ်တေံ ပ္ဍဲအရာဟီုပြိုၚ်ပ္ကာန်ဂလာန်ပ္တိုန်ဖျေံ ကုသမ္မတတြေံ ဒဝ်နေဝ်ထြာပ်ဂှ် ဟွံပြေပြံၚ်ဒှ်အာလဝ်တုဲ သမ္မတအမေရိကာန် ဂျဵုဗိုၚ်ဒေန် အခိၚ်ပရိုၚ် မကၠောန်ဒၟံၚ်သ္ဂောံသ္ဂုတ်သွာတ်အကာဲအရာ အနာဂတ်ဘဝညး မံက်တိတ်ကၠုၚ်ဂှ် ဂကောံစန်ဒက်မာဲညးကဵု ကောန်ဗော်ဒဳမဝ်ကရေတ်တေတ် ကဆံၚ်လ္တူဂမၠိုၚ် ညံၚ်စိုတ်ဂွံၜိုဟ် ဂိတုဂျူလာၚ် ၃ တေံ ကၠောန်သ္ပလဝ်ရ။
သွက်ပေါဲရုဲမာဲ သမ္မတ ဂိတုနဝ်ဝေမ်ဗာ ကၠုၚ်စိုပ်ဏံဂှ် ဒၞါဲသမ္မတဗိုၚ်ဒေန်ဂှ် ထ္ပက်အာစၞး ကုဒုသမ္မတ ကာမေဝ်လာ ဟာရေတ် ဟာ၊ ဟွံထ္ပက်စၞးပုဟ်ဟာ ဂလာန်သာ်ဏံ အခိၚ်ဂၠိုၚ်ကၠုၚ်ဒၟံၚ်ဂှ် ညးတံၜါတၠ ကၠောန်ဗဒှ်လဝ် ပေါဲစစၞလဒေါဝ်တ္ၚဲ ကၟာတ်တြၚ် ပ္ဍဲသ္ၚိဗုရ။
သမ္မတဗိုၚ်ဒေန်ဂှ် နကဵုညး ဒဒှ်ရဆက်ပြိုၚ်ပ္ကာန်အာဏောၚ်ဂှ် ဟီုလဝ် သောၚ်ၚ်တုဲ ဒုသမ္မတ ကာမေဝ်လာ ဒဒှ်ရထံက်ဂလာန်ညး အခိၚ်ဟီုဂးလဝ်ဂှ် ညးတံၜါတၠဝွံ သွက်ပရေၚ်စန်ဒက်မာဲ ဒဳမဝ်ကရေတ်တံ ဇြဟတ်ဂွံခိုဟ်ဂှ် ပံၚ်တောဲဖ္ဍိုက်ဖ္အောဝ်လဝ်ရ။
ညးဝွံ ဒှ်မၞိဟ်ဗော်ဒဳမဝ်ကရေတ် ရုဲစှ်လဝ်တုဲ သွက်ဂွံပ္တိတ်ညး ညးလဵုမွဲမှ ကဵုဒၟံၚ်ဇြဟတ်ဂရိုဟ် ဒဒှ်ရဟွံမွဲဂှ်ကီု ကေုာံ ဒဒှ်ရတိတ်အာဟွံသေၚ်ပုဟ်ဂှ် သမ္မတဗိုၚ်ဒေန် ဟီုလဝ်ရောၚ် တမ်ရိုဟ်ပရိုၚ်မွဲ သ္ဂးလဝ်ရ။
ပ္ဍဲကဵုအဳမဴ ဂၠါဲသြန်ဗွဝ် ပလံၚ်လဝ် ဟွံလအ်ဂှ်လေဝ် ဂကောံစန်ဒက်မာဲ ဗိုၚ်ဒေန်−ကာမေဝ်လာဂှ် ဟီုလဝ် လအာတုပ်သာ်ဂှ်ကီုရ။
နကဵုညး စဵုကဵုပေါဲပြိုၚ်ဏံတုဲဒှ် ဆက်နွံဒၟံၚ်ဏောၚ်ဂှ် ဗိုၚ်ဒေန် ချူလဝ် ပ္ဍဲအဳမေဝ်ဂှ်ရ။
အခိၚ်ပြိုၚ်ဟီုဂလာန်ပ္တိုန်ဖျေံ ကုသမ္မတတြေံ ထြာပ်ဂှ် ဗိုၚ်ဒေန် အာယုက် ၈၁ သၞာံဂှ်ဝွံ ဟီုအရေဝ် ဒှ်အာလဝ် ဟွံကလိတ်ကလောတ်ဂှ်ကီု၊ ရမျာၚ်ဇြဟတ်ဍိုန်အာကီု၊ သွဟ်ကၠိုဟ်ကေတ်ဟွံလောဲတံ ကလေၚ်သှ်ဏာကဵုလဝ်ဂှ်ရ တၚ်သၟာန်စပ်ကဵုညး မံက်တိတ်ကၠုၚ်လဝ် တၟာဂလိုၚ်ရ။
အကြာဒဳမဝ်ကရေတ်တံဂှ်လေဝ် နကဵုညး သွက်ဂွံယိုက်ဂၠေၚ်တာလျိုၚ်ဂှ် ပရေၚ်ထတ်မ္ၚိုဟ် နွံ၊ ဟွံမွဲဂှ်ကီု၊ အစောံစရာဲ သ္ဂောံဂွံပေါဲအံၚ်ဇၞး နွံ၊ ဟွံမွဲ တံဒှ်တမ် အရာမဒှ်ဓဝိၚ်သာ်ဏံ မံက်တိတ်ဒၟံၚ်ရ။
အခိၚ်လၟုဟ် လိက်ကပှ်တၚ်နၚ် လစွံစိုတ်တံဂှ်လေဝ် ပ္ဍဲပေါဲရုဲမာဲဂှ် သမ္မတတြေံ ထြာပ် နွံဒၟံၚ်လ္တူဂှ် ထ္မံက်ထ္ၜးလဝ်ဂှ်ရ လ္တူသမ္မတလၟုဟ် ဗိုၚ်ဒေန်ဂှ်တှ်ေ ဇြဟတ်ဂရိုဟ် သာဂၠိုၚ်ကၠုၚ်လဝ်ရ။
Ref: BBC