ဟာသရက်သ်၊ ဂျူလာၚ် ၃
ဍုၚ်အိန္ဒိယ သ္ကုတ်သၟဝ်ကျာ ပ္ဍဲကဵုအသေအဟာန်ပရေၚ်ဘာသာမွဲဂှ် ဂကောံကလောံမၞိဟ် လိုန်ဒးညးသ္ကအ်တုဲ မၞိဟ်ဟွံအောန်နူကဵု ၁၁၆ တၠ ချိုတ်အာလဝ်ဂှ် သ္ကိုပ်ဗၠာဲသၟိၚ် သလာဘက် မာတာ ဟီုလဝ်ရ။
ပ္ဍဲကဵုအသေအဟာန် ပရေၚ်ဘာသာဟိန္ဒူ မကၠောန်ဗဒှ်လဝ် ပ္ဍဲဒေသ ဟာတရက်သ် တွဵုရးဥတာပရာဒက်ချ်ဂှ် ဂကောံကလောံမၞိဟ်မွဲ လိုန်ဒးညးသ္ကအ် က္တဵုဒှ်လဝ်ရ။
ပ္ဍဲကဵုညးချိုတ်အာဂမၠိုၚ် ကောန်ၚာ်ကဵု ညးဗြဴ ပါလုပ်ဒၟံၚ် တၟာဂလိုၚ်တုဲ ဒှ်ညးလဵုမွဲရောဟီုဂှ် စၟဳတ်ဒၟံၚ်ဖိုဟ်ရောၚ် ဂွံတီကေတ်ရ။
ညးဗၠးတိတ်ကၠုၚ် နူကဵုဂကောံကလောံမၞိဟ်လိုန်ဒးညးသ္ကအ် ပ္ဍဲအသေအဟာန်ပရေၚ်ဘာသာ မကၠောန်ဗဒှ်လဝ် ပ္ဍဲကွာန်မူဂါဂါဟဳဂှ် ကလေၚ်ဟီုလဴထ္ၜးလဝ် ဗီုဒှ်ဂှ်ရ။
ဆ္ဂး မူဟိုတ် ဂကောံကလောံမၞိဟ် လိုန်ဒးညးသ္ကအ်ဏံ ဂွံက္တဵုဒှ်ရောဟီုဂှ် ဟွံဂွံတီကေတ် ချိုတ်တ်ပၠိုတ်တ်ဏီရ။
ပၞော်တိတ်ဂှ် ဍန်လောန်တုဲ အခိၚ်မၞိဟ်ဂမၠိုၚ် တိတ်ဂှ် ညံၚ်ရဴလဗိုတ်ကျာဗ္တဳ ဒှ်အာလဝ်တုဲ နူကဵုဏံ မၞိဟ်ဂမၠိုၚ် ဖေက်လကိုတ်တုဲ လောတ်ဒေါမ်စှ်ေအာလဝ်ရောၚ် သက်သဳဂွံညာတ်ကေတ်နမတ်ဂမၠိုၚ် ဟီုလဝ်ရ။
အခိၚ်အရေၚ်ဟီုတွံ တုဲဒှ်ဂှ် မၞိဟ်ဂမၠိုၚ် က္တဵုဂြိပ်လဝ်အိုတ်ဂှ် ညးဗြဴဂွံညာတ်ကေတ်နသက်သဳမွဲတၠ သ္ဂးရ။
သၞာဲဒဴလ္ပာ်ဂဥုဲ အူမာတ် ကူမာ ထရဳပတဳ နူဒေသအဳတာ ဆက်စပ်ဒၟံၚ်ကဵု ဒေသဏံဂှ်တှ်ေ ဟိုတ်နူဂကောံကလောံမၞိဟ် လိုန်ဒးညးသ္ကအ်ဂှ်တုဲ ပ္ဍဲကဵုညးဒးချိုတ်အာဂမၠိုၚ် အောန်အိုတ် ကောန်ၚာ်ပိတၠ ပါလုပ်ရောၚ် အ္စာပရိုၚ်ဂမၠိုၚ် ဟီုလဝ်ရ။
သွက်ဂွံထ္မံက်ထ္ၜး စရၚ်ညးမချိုတ်အာတံဂှ် ဒးကေတ်အာအခိၚ် နာဍဳတၟာဂလိုၚ်ဏီဏောၚ်ဂှ် သၞာဲဒဴဗၠာဲသၟိၚ် တွဵုရးဥသာပရာဒက် မွဲတၠ ဟီုလဝ်ရ။
ဗဳဒဳယိုဝ်သ္ကုတ် တက်လဝ် ပရူဒဒှ်ဏံဂှ် ပြးထၞာန်ဒၟံၚ် ပ္ဍဲအောန်လာၚ်တုဲ ညးကလိဂွံဝပ်တံဂှ် ကော်ဏာလဝ်ရုၚ်ဂဥုဲ နကဵုကွဳစက်ထရက်၊ ကွဳစက်သၠာပိတံ၊ ကွဳလိုန်ဓာတ်တံဂှ် ဂွံဆဵုကေတ်ရ။
ပရူဒဒှ်ဇၞော်ဇၞော်သာ်ဏံမွဲ က္တဵုဒှ်လဝ်ကီုလေဝ် သၞာဲဒဴအလဵုအသဳ မွဲတၠမှ ဟွံမွဲလဝ်ပုဟ်ဂှ် မသကလောကောဒေံ ညးမဒးချိုတ်အာဂှ်မွဲတၠ ဟီုလဝ်ရ။
ပ္ဍဲအိန္ဒိယ ပ္ဍဲသၞာံ ၂၀၁၈ တေံဂှ်လေဝ် ပ္ဍဲကဵုဂကောံကလောံမၞိဟ် ဗဵုဒၟံၚ် သ္ဘၚ်ကျာ်ဟိန္ဒူဂှ် ဒၟါနူကွဳပၟတ်မွဲဖ္ဍိုက် လုပ်ဇီုဒးတုဲ မၞိဟ် ၆၀ တၠ ဒးချိုတ်အာလဝ်ရ။
ပ္ဍဲသၞာံ ၂၀၁၃ တေံဂှ်လေဝ် ပ္ဍဲကဵုသ္ဘၚ်ကျာ်ဟိန္ဒူ မကၠောန်ဗဒှ်လဝ် ပ္ဍဲတွဵုရးမာဒဟာဂှ် ကလောံကလောံမၞိဟ်လိုန်ဒးညးသ္ကအ်မွဲ က္တဵုဒှ်လဝ်တုဲ မၞိဟ် ၁၁၅ တၠ ကေၚ်ဒးချိုတ်အာလဝ်ရ။
Ref: BBC