ကျာ်ထဝ်၊ ဂျူလာၚ် ၆
ဗ္ဒါဲဆေၚ်ဍာ်လက်ဖက်(ကြက်တူရွေး) အရာပ် (တောၚ်သူစု) ဍုၚ်ကျာ်ထဝ် တွဵုရးဍုၚ်မန်ဂှ် ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာလဝ် မၞိဟ်တြုံဒေသမွဲတၠ နကဵုတၚ်စောဲစပ် PDF ဂှ် ဂွံတီကေတ် ဇရေၚ်ညးဒေသတံရ။
တုဲကၠုၚ် ပ္ဍဲဂိတုဂျူလာၚ် ၄ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ် ဒပ်ကံၚ်ဇြဳပၞာန် နကဵုဇြဟတ်ဗွဲမဂၠိုၚ်ဂၠေၚ် ကၠုၚ်စိုပ်ရပ်ဒက်ဏာလဝ် ကိုဝ်မျာတ်တူ ဒၟံၚ်ကွာန်(ဖက္ကလိပ်) ဗ္ဒါဲဆေၚ်ဍာ်လက်ဖက် (ကြက်တူရွေး) နကဵုတၚ်စောဲစပ် ဒှ်ကောန်ဒပ်စဵုဒၞါညးဍုၚ်ကွာန်တံရ။
အတိုၚ်ဂလာန် ညးဒေသတံဂှ်မ္ဂး ကိုဝ်မျာတ်တူ ဒးဒုၚ်ရပ်ဒက်လဝ်ဂှ်ဝွံ ဒှ်ညးပလေဝ်ကွဳလိုန်ဓာတ်ကဵု သွံရာန်ဒၟံၚ်ကွဳလိုန်ဓာတ်တံဂှ်တုဲ အခိၚ်ကၠုၚ်စိုပ်ရပ်ဒက်ဂှ် ဇြဟတ်ဒပ် ဟွံအောန်နူကဵု ၂၅ တၠ ရပ်စပ်ဏာလဝ်ရောၚ် သ္ဂးရ။
ကိုဝ်မျာတ်တူ ဒးဒုၚ်ရပ်ဒက်ဏာတံဂှ် ဒၞါဲလဵုရပ်ထိၚ်လဝ်ရောဟီုဂှ် ဟွံဂွံတီကေတ်ဏီတုဲ ကဵုဂြောဝ်ဂတာတံလေဝ် ဒဵုကဵုအခိၚ်လၟုဟ် ဟွံဂွံအဆက်ဏီဖိုဟ်ရ။
ဒပ်ကံၚ်ဇြဳပၞာန်ဝွံ တုဲကၠုၚ် ပ္ဍဲဂိတုဂျောန် ၁၃ တေံဂှ်လေဝ် နကဵုတၚ်စောဲစပ် ထံက်ပၚ် PDF တုဲ ရပ်ဒက်လဝ် ကောန်ဂကောံရီုဗၚ်ပရေၚ်မၞိဟ် အရာပ်ကအ်သာန်နာၚ်တုဲ ပံက်လဝ်ဂဗုတ် နကဵုၝောံပိုဒ်သၞောဝ်ဗ္တိုက်သ္အးပွပကီုပရာပ်တံရ။
ပ္ဍဲကဵုပွိုၚ်ဍုၚ်ကျာ်ထဝ် ဂကောံဇြဟတ်ပၠန်ဂတး ဇြဟတ်ခိုဟ်တံဂှ် ဒပ်ကံၚ်ဇြဳပၞာန်ဝွံ အပ္ဍဲကာလသီအဝဵုဏံ ထ္ၜးဟိုတ်နာနာသာ်တုဲ ရပ်ဒက်လဝ် ညးဍုၚ်ကွာန်ဒေသတံတုဲ စုတ်ဒၟံၚ်ထံၚ်တံ ကၠောန်သ္ပဒၟံၚ်ရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ ပ္ဍဲကဵုကွာန်ဒၞါဲညးဍုၚ်ကွာန်ကောန်အရာပ်တံ မံၚ်တန်တဴ အပ္ဍဲပွိုၚ်ဍုၚ်ကျာ်ထဝ်ဂှ်လေဝ် နကဵုတၚ်စောဲစပ် PDF တံ ကၠုၚ်စိုပ်ဒၟံၚ်ဂးတုဲ ကြပ်အရိုဟ်တ္ၚဲ ကလိလောန်ဒၟံၚ် ပရေၚ်ပန်ပှော်လွဟ်ဇၞော်တံရ။
အတိုၚ်လိက်ဒုၚ်စဳရေၚ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP တံ လလောင်ပ္တိတ်လဝ် ပ္ဍဲဂိတုဂျူလာၚ် ၄ တေံဂှ်မ္ဂး အပ္ဍဲကာလသီအဝဵုဏံ အလုံဍုၚ်မွဲ လၟိဟ်မၞိဟ် ၂၆၀၀၀ ဒးဒုၚ်ရပ်လဝ်တုဲ ပ္ဍဲကဵုဏံ ၂၀၀၀၀ ပြၚ် ဆက်ဒးဒုၚ်ရပ်ထိၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု-Social Media