ကျာ်မြဟ်၊ ဂျူလာၚ် ၆
ပ္ဍဲတွဵုရးဍုၚ်မန် ပွိုၚ်ဍုၚ်ကျာ်မြဟ် ဒေသဒဵုတၟံသာဲဂှ် လ္ပာ်ကံၚ်ဇြဳပၞာန် ဂလိုၚ်ပ္တိုန်ဇြဟတ်ကီု၊ ပန်ပှော်ကၠုၚ်လွဟ်ဇၞော်တံကီုဂှ်တုဲ ပရေၚ်ပၞာန်ၜါလ္ပာ် သာကြံၚ်မ္ၚိုဟ်ကၠုၚ်ရောၚ် ဂွံတီကေတ် နူကဵုဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ရ။
ဒပ်ကံၚ်ဇြဳပၞာန် ဇြဟတ်ဒပ် ၂၀၀ ပြၚ်ပါဂှ်ဝွံ စနူဂိတုဂျောန် သတ္တာဟလက္ကရဴအိုတ်တုဲကၠုၚ်တေံတုဲ လုပ်စိုပ်ဖျေံဒပ် မံၚ်ဒၟံၚ် ပ္ဍဲကဵုဒေသဒဵုတၟံသာဲ ပ္ဍဲကဵုကွာန်ကအ်ဒုန်၊ ကအ်ဝါန်၊ ကွာန်ၚာၚ်၊ ကွာန်မွဲဂြဝ်၊ ကွာန်ခဒုၚ်စေပ်တံဂှ်ရ။
ကံၚ်ဇြဳပၞာန် လုပ်စိုပ်ဖျေံလဝ်ဒပ် အပ္ဍဲကွာန်တံဂှ်ဝွံ ဒၞါဲဒပ်ပံၚ်ကောံ ဂကောံဇြဟတ်ပၠန်ဂတးတံ နွံဒၟံၚ်တံဂှ် ပန်လွဟ်ဇၞော်ကီု၊ ဗ္တိုက်ကဵုဒရုၚ်တံကီုဂှ် ကၠောန်ဒၟံၚ် အရိုဟ်ဒဒှ်တ္ၚဲရ။
နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ NMSP AD ဂှ်တှ်ေ ဟိုတ်နူဒပ်ကံၚ်ဇြဳပၞာန် ပလေဝ်ပလေတ်လဝ်ပရေၚ်ပၞာန်တံဂှ်တုဲ အခိၚ်ဟွံရုဲ ပေါဲဗ္တိုက်က္တဵုဒှ်ကၠုၚ်မာန်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လ္ပာ်ကံၚ်ဇြဳပၞာန် ဂလိုၚ်ပ္တိုန်ဇြဟတ်တုဲ ဖျေံကၠုၚ်ဒပ်တံ နွံရ။ မံၚ်မံၚ်မွဲဒၞါဲဓဝ် လအ်လအ်ဟွံသေၚ်တုဲ ဆုဲပြံၚ်အာကၠုၚ်ဒၟံၚ်နွံရ။ ဒၞါဲပွဳပွူညးတံနွံတံဂှ် လ္ပာ်ဇြဟတ်ပၠန်ဂတးတံလေဝ် နွံဒၟံၚ်ဟီုတှ်ေ ပေါဲဗ္တိုက်ဆေၚ်မုက်တံဂှ်တှ်ေ နွံကၠုၚ်မာန်ရောၚ်” သာ်ဝွံ သ္ဂးရ။
တုဲကၠုၚ် ပ္ဍဲဂိတုဂျောန် ၂၆ တေံဂှ်လေဝ် ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲဘာလကျာ် ကွာန်မွဲဂြဝ်ဂှ် ဂကောံဇြဟတ်ပၠန်ဂတးတံ အာစိုပ်ဗ္တိုက်လဝ် နကဵုဒရုၚ်ဂှ်ရ ကောန်ဒပ်ကံၚ်ဇြဳပၞာန်လ္ၚဵု ဇီုကပိုက်ချိုတ်အာတံ နွံလဝ်ရ။
ပ္ဍဲဒေသဒဵုတၟံသာဲ ပရေၚ်ပၞာန်ကြံၚ်မ္ၚိုဟ်ဒၟံၚ်ဂှ် ဟိုတ်နူဒပ်ကံၚ်ဇြဳပၞာန် ပန်ပှော်ဒၟံၚ်လွဟ်ဇၞော် သီုဗ္တံသီုတ္ၚဲဂှ်ရ သီုကဵုကွာန်ကအ်ဝါန်၊ ကွာန်ၚာၚ်၊ ကွာန်မွဲဂြဝ်တံ မပါလုပ် ကွာန်ထပှ်ကွာန်ဟွံအောန် ညးဍုၚ်ကွာန်ဒေသ ၃၀၀၀ ပြၚ် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။
ပ္ဍဲဒေသဒဵုတၟံသာဲဂှ် ဗော်ဍုၚ်မန်တၟိ NMSP AD ၊ ဒပ်ပၞာန်ဗၠးၜးဍုၚ်မန် MLA ၊ ဒပ်ဗၠးၜးကောန်ဂကူကရေၚ် KNLA တံ မပါလုပ် ဒပ်ပၞာန်စဵုဒၞါညးဍုၚ်ကွာန် PDF တံလေဝ် ချဳဒရာၚ်ဒၟံၚ်ပရေၚ်ပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−Social Media