ကျာ်မြဟ်၊ ဂျူလာၚ် ၆
ကောန်ဒပ်ကံၚ်ဇြဳပၞာန် လုပ်စိုပ်ဖျေံလဝ်ဒပ် အပ္ဍဲဒေသၜဳဂြာၚ် ပယျဵုတွဵုရးဍုၚ်မန်ကဵု တွဵုရးကရေၚ်ဂှ်ဝွံ ကလိလောန်ဒၟံၚ် ပရေၚ်ပကီုပရာပ်လိၚ် လ္တူညးဗြဴဒေသစဴကၠုၚ်ဌာန်ဒၟံၚ်တံ နွံဒၟံၚ်ရောၚ် ပ္ဍဲဂိတုဂျူလာၚ် ၅ တေံ ကံၚ်ဇြဳဖေဝ်ဒရာဍုၚ်မန် MSFC လလောၚ်ပ္တိတ်ကဵုလဝ်သမ္တီရ။
အတိုၚ်တၚ်လလောၚ်တြးဂှ်မ္ဂး ကြဴနူပေါဲဗ္တိုက် ကလေၚ်ညိၚ်ဝတ်ကၠုၚ်တုဲဂှ် ညးဗြဴဒေသ စဴကၠုၚ်ဌာန်ဒၟံၚ်ဂမၠိုၚ် ကောန်ရဲတဝ်ခွါကံၚ်ဇြဳပၞာန်တံ ဟွံသေၚ်ကဵုအခိၚ်ကာလမွဲသာ် ခ္ဍံက်တြၚ်သ္ၚိတံသၟးဟွံက ညးကွာ်ဂၠံၚ်တံဂှ် စၟဳတ်တုဲ ပွမဟီုဂး နကဵုအရေဝ် ဟွံဂပ်ဂဝ်တံဂှ်ကီု နကဵုနဲကဲနာနာသာ် ကလိလောန် ပကီုပရာပ်ဒၟံၚ်ရ။
သ္အာၚ်နူဂှ်ပၠန် ကောန်ဒပ်ကံၚ်ဇြဳပၞာန်တံ ကော်စကာညးဗြဴမန်တံ နနဲအဓမ္မ သွက်ဂွံဍုန်တိုပ်ပုၚ်သွဂှ်ကီု၊ အခိၚ်ညးဍုၚ်ကွာန်တံ စဴကၠုၚ်ဌာန်ဒေသဂှ်လေဝ် ကလိလောန်ပကီုပရာပ်ဒၟံၚ် လ္တူညးဗြဴမန်စဴကၠုၚ်ဌာန်ဒၟံၚ်တံသာ်ဏံ နကဵုတၚ်ရန်တၟံနွံနွံဂှ် ဂၠိုက်ဂၠါဲဂွံတီကေတ်ရောၚ် ကံၚ်ဇြဳဖေဝ်ဒရာဍုၚ်မန် သ္ဂးရ။
မိသုတဂျဝ် ကောန်ဂကောံကံၚ်ဇြဳဖေဝ်ဒရာဍုၚ်မန်ဂှ်တှ်ေ အပ္ဍဲပဋိပက္ခဏံ ပွမကလိလောန်ပကီုပရာပ် ပရေၚ်လိၚ် လ္တူညးဗြဴတံဂှ်ဝွံ သၞောဝ်ဍုၚ်သ္အာၚ်ကီု သၞောဝ်ပေါဲပၞာန်ကီုဂှ် ကလိလောန်ဖံက်ပ္ကဝ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အပ္ဍဲပဋိပက္ခဂှ် ပွပကီုပရာပ်ပရေၚ်လိၚ်ဂှ်ဝွံ ဖံက်ပ္ကဝ်ဒၟံၚ် သၞောဝ်ဍုၚ်သ္အာၚ်တံဂှ်ရ နကဵုသၞောဝ်ဍုၚ်သ္အာၚ်ကဵုဒှ် သၞောဝ်ပေါဲပၞာန်ကဵုဒှ် ပဋိပက္ခလဵုဟွံဟီု ကလိလောန် ပကီုပရာပ်ပရေၚ်လိၚ် လ္တူညးဗြဴတံ ဟွံဂွံပုဟ်။ အရာမကလိလောန်သာ်ဏံဂှ်ဝွံ ရပ်စပ်ကေတ် ပွမပလီုကောန်သမ္ဘာ ဗွဲမစှ်ေကဵုသၞောတ်တံဂှ်တုဲ သမ္ဘာကောန်ဒပ်ရပ်လွဟ် မွဲလ္ပာ်တံဂှ်ကီု ညးဗြဴနွံပ္ဍဲဒေသတံဂှ် ပၠောပ်ဗ္ဒိုပ်တုဲ သ္ပဍိက်လိၚ်ဂှ်ဝွံ ကလိလောန်ဖံက်ပ္ကဝ်ဒၟံၚ် သၞောဝ်ဍုၚ်နာနာ မဒှ်ရ” သာ်ဝွံ သ္ဂးရ။
အပ္ဍဲဂိတုမာတ်တုဲကၠုၚ်တေံ ဒပ်ကံၚ်ဇြဳပၞာန်တံ ပန်ပှော်နၚ်လွဟ်ဇၞော် အပ္ဍဲကွာန် နူဒေသၜဳဂြာၚ်တံ နကဵုက္ၜၚ်ပၞာန်၊ ထောံမခတိုဟ် နကဵုက္ၜၚ်ကျာတံဂှ်တုဲ ညးဍုၚ်ကွာန်ဒေသဂမၠိုၚ်ဝွံ စနူဂိတုမာတ်သတ္တာဟလက္ကရဴအိုတ်ဂှ်တုဲ ဒးထောံသ္ၚိဌာန် ဒးဂြိပ်ဒဴလဝ်ရ။
ကြဴနူပေါဲဗ္တိုက်က္တဵုဒှ်တုဲ ကောန်ဒပ်ကံၚ်ဇြဳပၞာန်ဂမၠိုၚ်ဝွံ ပ္ဍဲကဵုကွာန်ဍေံတံ ဖျေံလဝ်ဒပ်တံကဵု ကွာန်ဗ္ဒါဲဗ္ဒါဲတံဂှ် ပွမဖံက်သ္ၚိ ကၠတ်ဂၠံက်ကေတ် ကပေါတ်ညးဍုၚ်ကွာန်ဂှ်လေဝ် နွံလဝ်ရ။
ကံၚ်ဇြဳဖေဝ်ဒရာဍုၚ်မန်ဂှ်တှ်ေ ဒပ်ကံၚ်ဇြဳပၞာန်ဝွံ အခိၚ်ပေါဲဗ္တိုက်က္တဵုဒှ်ဂှ် ဝးပ္ကဝ်ဒၟံၚ် အခေါၚ်အရာမၞိဟ် ကေုာံ ဒုဟ်ရာဇဝတ်တံသၟးဟွံက ညးဍုၚ်ကွာန် နူဒေသပေါဲဗ္တိုက်က္တဵုဒှ်ဒၟံၚ်တံ ညံၚ်ဟွံဂံၚ်စဴစိုပ်ဌာန်ဒေသအိုတ်ဂှ် ဆက်ကလိလောန်ဒၟံၚ် ပွပကီုပရာပ်အခေါၚ်အရာမၞိဟ်တံ နကဵုနဲကဲနာနာသာ်ရောၚ် သ္ဂးရ။
ကောန်ဒပ်ကံၚ်ဇြဳပၞာန်တံ ကလိလောန်ပကီုပရာပ်ဒၟံၚ် လ္တူညးဗြဴစဴကၠုၚ်ဌာန်ဒေသၜဳဂြာၚ်တံသာ်ဏံဂှ်တုဲ သ္ပဒၟံၚ်အန္တရာယ် လ္တူပရေၚ်ဂယိုၚ်လမျီု ညးဍုၚ်ကွာန်တံဂှ် ကံၚ်ဇြဳဖေဝ်ဒရာဍုၚ်မန် ဒဒှ်ရဒစဵုဒစး ဗွဲမသ္ကာတ်မြဟ်ဂှ် လလောၚ်ပ္တိတ်လဝ် လစွံစိုတ်ရ။
နကဵုကံၚ်ဇြဳဖေဝ်ဒရာဍုၚ်မန် လ္ပာ်ညးဒးဒုၚ်ကလိလောန်ဂမၠိုၚ် ယဝ်ရဆန္ဒမၞုံမ္ဂး သွက်ဂွံကေတ်အရေဝ်ကဵုဒုဟ် ကုညးမကလိလောန်လဝ်တံမာန်ဂှ် စဵုကဵုရုၚ်သၞောဝ်ဓဝ်ဍုၚ်နာနာ သွက်ဂွံရီုဗၚ်ကဵုအာဂှ် ဒှ်ဒၟံၚ်ဒတုဲရောၚ် မိသုတဂျဝ် ဟီုရ။
“နကဵု MSFC ပိုယ်တံ အတိုၚ်ပၟိက်ဆန္ဒ ညးဒးဒုၚ်ကလိလောန်လဝ်တံ အရာမိက်ဂွံကၠောန်တံဂှ် သွက်ဂွံထံက်ပၚ်ရီုဗၚ်ကဵုမာန် ပ္ဍဲအရာစောဲဂဗုတ်ကီု စဵုကဵုရုၚ်သၞောဝ်ဓဝ်ဍုၚ်နာနာ မဆေၚ်စပ်တံဂှ် ယဝ်ရညးဒးဒုၚ်ကလိလောန်လဝ်တံ မိက်ဂွံစောဲဂဗုတ်မ္ဂး ပိုယ်တံ ဗက်ရီုဗၚ်ကၠောန်ၜိုတ်ကဵုဂှ် ဒှ်ဒၟံၚ်ဒတုဲရ။ ပရေၚ်ဂီုကၠီုဂှ်လေဝ် ပိုယ်တံ ရှ်ေသှ်ေဒၟံၚ်ရ”သာ်ဝွံ သ္ဂးရ။
မွဲလ္ပာ်ဂှ်ပၠန် ဟိုတ်နူတၠတဲကံၚ်ဇြဳပၞာန်တုဲ သ္ၚိဌာန်ဇီုကပိုက်လီုလာ်လဝ်တုဲ ညးဍုၚ်ကွာန် နွံပၟိက်ဒၟံၚ် အရီုဗၚ်တံဂှ် ဒပ်ကံၚ်ဇြဳပၞာန် ထပ်ဝးပ္ကဝ်ဒၟံၚ် အခေါၚ်အရာမၞိဟ်တံဂှ် ဒစဵုဒစး ဗွဲမသ္ကာတ်မြဟ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ကံၚ်ဇြဳဖေဝ်ဒရာဍုၚ်မန်ရ။
ဟိုတ်ဂှ်ရ ပြဝပကီုပရာပ် သ္ပဒၟံၚ်အန္တရာယ် ကုပရေၚ်ဂယိုၚ်လမျီု ညးဍုၚ်ကွာန်တံဂှ်ကဵု ပြဝ ဟွံမွဲကဵုပရေၚ်ဗ္စာရဏာမၞိဟ်တံဂှ် သွက်ဂွံဒေါအ်ဒေၚ်ကၠေံ ဗွဲမပြဟ်မာန် ညးဍုၚ်ကွာန်တံ ညဳညဳသာသာ သွက်ဂွံပလှ်ဖျေံကံၚ်ဇြဳပၞာန် နကဵုနဲကဲနာနာသာ် ဗွဲမပြဟ်ဂှ် နွံပၟိက်ရောၚ် ထံက်ထ္ၜးလဝ်ရ။
သ္အာၚ်နူဂှ်ပၠန် ညးဍုၚ်ကွာန်ဒေသမန် နွံပၟိက်ဒၟံၚ် အရီုဗၚ်တံဂှ် ညးဍုၚ်ကွာန် အပ္ဍဲဍုၚ်၊ မ္ၚးဍုၚ်ကီု၊ ဂကောံဗော်သွးဍုၚ်သ္အာၚ်တံကီု သွက်ဂွံကဵုအရီုဗၚ် ပရေၚ်ဗ္စာရဏာမၞိဟ်မာန်တံဂှ် ကံၚ်ဇြဳဖေဝ်ဒရာဍုၚ်မန် ဖ္တိုက်ဖ္အောဝ်လဝ် ဗွဲမဇြိုဟ်နက်ရ။
ပရိုၚ်−သြၚ်လောန်တိုၚ်(မ်)
ဗီု− CJ