အခိၚ်ပေါဲဗ္တိုက်သ္ကာတ်မြဟ်ဒၟံၚ်ဂှ် က္ဍိုပ်သ္ကိုပ်ပၞာန် ထပ်ဟီုကၠုၚ် ပရူပလေဝ်ပလေတ်စပ်ကဵုပေါဲရုဲမာဲ

နေဗျဳဒဝ်၊ ဂျူလာၚ် ၇

အလုံဍုၚ်မွဲ ဟိုတ်နူပၞာန်ပၠန်ဂတးတဝ်စၞေဟ်တံဂှ်တုဲ အခိၚ်ပေါဲဗ္တိုက်သ္ကာတ်မြဟ်ဒၟံၚ်ဂှ် က္ဍိုပ်သ္ကိုပ်ပၞာန် ထပ်ဟီုကၠုၚ် ကမၠောန်ဒစးဒုၚ်ပလေဝ်ပလေတ် ပရေၚ်ကၠောန်ဗဒှ်ပေါဲရုဲမာဲ မရပ်စပ်အာ နဒဒှ်ပၞော်တိတ်ပရေၚ်ဍုၚ်ကွာန် သွက်ကံၚ်ဇြဳပၞာန်ဂှ်ရ။

ပ္ဍဲကောံဓရီုဂကောံအလဵုအသဳကၟိန်ဍုၚ် ကံၚ်ဇြဳပၞာန် မကၠောန်ဗဒှ်လဝ် ပ္ဍဲဂိတုဂျူလာၚ် ၅ ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်ဂှ် သွက်ဂွံကၠောန်ဗဒှ်ပေါဲရုဲမာဲမာန် ကံက်စရၚ်လၟိဟ်မၞိဟ်ကဵု စရၚ်ပရူပရာသ္ၚိကၟိန်တံဂှ်တုဲမှဟေၚ် ကၠောန်အာစရၚ်မာဲဏောၚ်ဂှ် ဟီုလဝ်ရ။

စပ်ကဵုပေါဲရုဲမာဲတုဲ ကမၠောန်ဒစးဒုၚ်ပလေဝ်ပလေတ်ဂမၠိုၚ် ပွမကံက်စရၚ်သ္ဂာဗ္တံ စရၚ်လၟိဟ်မၞိဟ်ကဵု ပရူသ္ၚိကၟိန်တံဂှ် စနူဂိတုအံက်တဝ်ဗာမံက် သၞာံဏံတုဲ ကၠောန်အာ နကဵုသၞောတ်ဗ္ၜတ်အလုံဍုၚ်မွဲဏောၚ်ဂှ် သ္ဂးရ။

ပ္ဍဲကဵုဒၞါဲအခက်အခုဲနွံတံဂှ် ၜိုတ်ဒှ်မာန် ကံက်အာဏောၚ်တုဲ နွံပၟိက်မ္ဂး သွက်ဂွံကၠောန်အာ နကဵုၜါကဆံၚ်ဂှ် စဳဇန်လဝ်ရ။ ဟိုတ်နူပရူပရာနာနာသာ်တုဲ ညးဒးထောံလသာသ္ၚိဌာန်တံဂှ်လေဝ် ဗက်ကဵုတွဵုရး ကေုာံ ရးဒေသတံဂှ်တုဲ ကံက်အာစရၚ်စၟဳတ်အာဏောၚ်ဂှ် က္ဍိုပ်သ္ကိုပ်ပၞာန် ဟီုလဝ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ပ္ဍဲကၟိန်ဍုၚ်လၟုဟ် တိဍာ် ၜိုတ် ၇၀ တၟံကၠံဂှ်ဝွံ ဒှ်ဒေသဟွံညိၚ်ဝတ်တံဂှ်တုဲ ပ္ဍဲတိဍာ်သှ်ေတံဂှ် ၜိုတ်သၟဟ်အစောံ ဖန်ဇန်တုဲ သွက်ဂွံကံက်အာစရၚ်သ္ဂာဗ္တံဂှ် ကၠောန်အာမာန်ဏောၚ်ဂှ် သ္ၚဳဂၠိပ်လဝ်ရ။

“တိဍာ်ဍုၚ်ဗၟာ အခိၚ်လၟုဟ် ၜိုတ် ၇၀ တၟံကၠံဂှ်ဝွံ ဒှ်ဒေသဟွံညိၚ်ဝတ်၊ ဒှ်ဒေသ ဂကောံရပ်လွဟ်ကောန်ဍုၚ်အရၚ်တံ အုပ်ဓလီုဒၟံၚ်တံဂှ်တုဲ ၇၀ တၟံကၠံဂှ်တှ်ေ ဟွံဒှ်ပုဟ်။ ဆ္ဂး ပ္ဍဲကဵုဍုၚ် ၃၀၀ ပြၚ်နွံဒၟံၚ်ဂှ် ၜိုတ် ၂၀၀ ဂှ်တှ်ေ နွံဒၟံၚ် သၟဝ်တဲဍေံတံ (စကစ) ဏီဏောၚ်။ အေ ဂှ်တှ်ေ ကၠောန်အာလ္တူဍုၚ်တံဂှ်ဏောၚ်။ ညအ်ဂှ် ဒှ်ဒၟံၚ်ပၞော်တိတ်ပရေၚ်ဍုၚ်ကွာန်ဍေံတံတုဲ ဍေံတံ ဟွံကၠောန်ဟွံဂွံပုဟ်။ အေ ဂှ်တှ်ေ ဒၞါဲဂွံဂှ် ဗီုဂွံကၠောန်ဂွံ ဖန်ဇန်တုဲ ကၠောန်အာဏောၚ်” သာ်ဝွံ သ္ဂးရ။

ပ္ဍဲအရာကံက်စရၚ်လၟိဟ်မၞိဟ်သ္ဂာဗ္တံတံဂှ် ရပ်စပ်အာသၞောတ်ကံက်စရၚ် ဒုၚ်သ္ဇိုၚ်ကဵုကောန်ပျူတာတံဂှ်တုဲ တိုန်မွဲသ္ၚိစှ်ေမွဲသ္ၚိ ကံက်အာ နကဵု Mobile Tablet တံဏောၚ်ဂှ် ဂွံတီကေတ် အတိုၚ်တၚ်လလောၚ်တြးပရိုၚ် ကံၚ်ဇြဳပၞာန်ရ။

နကဵုကံၚ်ဇြဳပၞာန် ပွမပစူဂတဵုမုက် စပ်ကဵုပရေၚ်ကံၚ်စရၚ်သ္ဂာဗ္တံ ကေုာံ ပရူပရာသ္ၚိကၟိန်တံ မပါလုပ် ပွမပရအ်တၞးလိက် ကဵုပညာတံဂှ် စနူဂိတုဂျောန် ၁၂ တုဲကၠုၚ်တေံတုဲ စကၠောန်ကၠုၚ်လဝ် ပ္ဍဲကဵုလ္တူဍုၚ် ဒၞါဲမထိၚ်ဒက်လဝ် ပေၚ်ၚ်တံဂှ်ရ။

ဆ္ဂး ဒေသကံၚ်ဇြဳပၞာန် ဒးဗလးလဝ်တဲတံ မပါလုပ် ပ္ဍဲကဵုဒေသရခေၚ် ကေုာံ ရးသေံသ္ကုတ်သၟဝ်ကျာ ပေါဲဗ္တိုက်သ္ကာတ်မြဟ်ဒၟံၚ်တံဂှ် ကၠောန်သ္ပ ပရေၚ်ချဳဒရာၚ် စပ်ကဵုပေါဲရုဲမာဲတံ ဟွံမာန်ဏီတုဲ ပ္ဍဲကဵုဒေသ ပရေၚ်ချဳဒရာၚ် ပရေၚ်ပၞာန်ဇြဟတ်ခိုဟ်တံဂှ်တှ်ေ ကၠောန်ဂွံမံၚ် ၜိုတ်လ္တူဍုၚ်တံသၟးညိကီုရ။

က္ဍိုပ်သ္ကိုပ်ပၞာန်ဂှ်တှ်ေ သွက်ဂွံကၠောန်ဗဒှ်ပေါဲရုဲမာဲ သၞာံဂတဏံဂှ် ကၠောန်ဒၟံၚ် ပရေၚ်ဒစးဒုၚ်ပလေတ်ပလေတ်တံတုဲ ဟိုတ်ဂှ်ရ ပွမကံက်စရၚ်လၟိဟ်မၞိဟ်သ္ဂာဗ္တံတံဂှ် အပ္ဍဲဂိတုအံက်တဝ်ဗာကၠုၚ်စိုပ်ဏံ သွက်ဂွံကံက်အာမာန်ဂှ် ကၠောန်ၜိုတ်ဒၟံၚ်ရောၚ် ပ္ဍဲဂိတုဂျောန် ၁၅ တေံ ဟီုပ္တိတ်ကၠုၚ်လဝ်ရ။

ဥူတာန်သဵုနာၚ်ဂှ်တှ်ေ နကဵုကံၚ်ဇြဳပၞာန် ယဝ်ကၠောန်ဗဒှ်ပေါဲရုဲမာဲဟွံမာန်မ္ဂး ပၞော်တိတ်ပရေၚ်ဍုၚ်ကွာန် ဟွံမွဲဂှ်ရ အကာဲအရာပရေၚ်ပၞာန် ယဝ်ဟွံပြံၚ်လှာဲမ္ဂး ပ္ဍဲကဵုဍုၚ် ၜိုတ် ၂၀၀ ဂှ် ကၠောန်အာမာန်ဏောၚ်ဂှ် ထံက်ထ္ၜးလဝ်ရ။

“ပေါဲရုဲမာဲဂှ်တှ်ေ ညံၚ်ဂွံဒှ်ကၠောန်ကၠုၚ်ဏောၚ်၊ ဒှ်မာန်ဏောၚ်။ ယဝ်ရ အကာဲအရာပရေၚ်ပၞာန် ဟွံပြံၚ်လှာဲမ္ဂး ဒှ်မွဲဗီုဏောၚ်။ ဟွံပြံၚ်လှာဲမွဲသာ် အတိုၚ်အကာဲအရာလၟုဟ်ရဟီုမ္ဂး ပ္ဍဲကဵုဍုၚ် ၜိုတ် ၂၀၀ ဏံဂှ် နကဵုညး သ္ဂောံကၠောန်အာ ဒှ်မာန်ဏောၚ်။ မူဟိုတ်ရောဟီုတှ်ေ ယဝ်ကၠောန်ပေါဲရုဲမာဲဟွံမာန်မ္ဂး ပၞော်တိတ်ပရေၚ်ဍုၚ်ကွာန်ဂှ် ဟွံမွဲတုဲ ညးဂှ်တှ်ေ ဒၞါဲဂွံဂှ် သ္ဂောံချိၚ်ကၠောန်အာ နွံရောၚ် အဲခယျကေတ်ရ” သာ်ဝွံ သ္ဂးရ။

အခိၚ်လၟုဟ် ကံၚ်ဇြဳပၞာန်ဝွံ အတိုၚ်သၞောဝ်ပ္တိုန်စရၚ်ဗော်ပရေၚ်ဍုၚ်ကွာန်တံဂှ်မ္ဂး ဗော်ပရေၚ်ဍုၚ်ကွာန် ၄၉ ဗော်ဂှ် ကဵုလဝ်အခေါၚ်ပ္တိုန်စရၚ်တုဲ ပ္ဍဲပရေၚ်ပၞာန်ဂှ်တှ်ေ ထ္မံက်ဒၟံၚ်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန် မဗပေၚ်ကဵုဒၟံၚ်ဇြဟတ်မလေၚ်ဒိုက်တံဂှ်ရ။

မွဲလ္ပာ်ဂှ်ပၠန် ပရေၚ်ပၞာန် ၁၀၂၇ လပှ်ဒုတိယ နူရးသေံသ္ကုတ်သၟဝ်ကျာဂှ် ဒးဆေၚ်ဒၟံၚ်မုက် ဇၞော်ကဵုဇြဟတ်တုဲ ပေါဲဗ္တိုက်ဒေသရခေၚ် ကျဒၟံၚ်ကဵုဂိတုဂှ်လေဝ် ဒဵုကဵုအခိၚ်လၟုဟ် ဒးရုန်ဂ္စါန်ဒၟံၚ်တၟာလှ်ေဖိုဟ်ရ။

ပရိုၚ်−သြၚ်လောန်တိုၚ်(မ်)

ဗီု−MOI