မတ်မလီု၊ ဂျူလာၚ် ၇
အပ္ဍဲကာလသီအဝဵုပွိုၚ်ပိသၞာံပြၚ်ဏံ စပ်ကဵုၚုဟ်ဗၞိက်ဖျာတံ သၠုၚ်တိုန်ဒၟံၚ် ဂၠိုၚ်ကဵုဆဂှ်တုဲ ညံၚ်ၚုဟ်ဗၞိက်ဖျာ ဂွံစှ်ေ ဗက်ရပ်ဒၟံၚ် တၠကမၠောန် နူကဵုသွာၚ်နာနာတံဂှ်ဝွံ ဒှ်သွဟ်သွက်ဍာ်ဇမၠေံမွဲရတုဲ ဖဵုဟွံမွဲပုဟ်ဂှ် တၠကမၠောန်ပရေၚ်ပိုန်ဒြပ်ဂမၠိုၚ် သ္ၚဳဂၠိပ်လဝ်ရ။
တုဲကၠုၚ် ဂိတုဂျောန် ၂ တေံဂှ်လေဝ် ညံၚ်ၚုဟ်ထဝ်ဟွံညိၚ်ဝတ် ကၠောန်ဒၟံၚ်ဂးတုဲ တၠကမၠောန်ထဝ်ကဵု သၟာဗၞိက်ထဝ်ဂမၠိုၚ် မပါလုပ် ၂၁ တၠဂှ် ရပ်ဒက်လဝ်တုဲ ၁၀ တၠဂှ်လေဝ် ပ္တိတ်လဝ်လိက်ဝါရာန်ရ။ သ္အာၚ်နူဂှ်ပၠန် ရဲကၠောန်ကမၠောန် လှာဲသြန်ဍုၚ်သ္အာၚ် ၁၄ တၠဂှ်လေဝ် ရပ်လဝ်တုဲ ၁၁ တၠဂှ်လေဝ် ပ္ဍဲဂိတုဂျောန် (၃) တေံ ပ္တိတ်လဝ်လိက်ဝါရာန်ရ။
တၠပညာပရေၚ်ပိုန်ဒြပ်မွဲတၠဂှ်တှ်ေ နကဵုဟိုတ် ကၠောန်ဒၟံၚ်ညံၚ်ၚုဟ်ဗၞိက်ဂွံသၠုၚ်သာ်ဏံဂးတုဲ ကံၚ်ဇြဳပၞာန် ဗက်ရပ်ဒၟံၚ် တၠကမၠောန်တံဂှ်ဝွံ ဗၠေတ်ဒၟံၚ်တုဲ ပြဟ်ဟ်ဏံ ၚုဟ်ဗၞိက်ဖျာ စှ်ေမာန်ကီုလေဝ် ဗွဲကြဴ ဗွဝ်ဖျာလီုတုဲ ၚုဟ်တိုန်ကၠုၚ်နူဏံမာန်ဂှ် သ္ၚဳဂၠိပ်လဝ်ရ။
“ဍာံဍာံဂှ် နူစကေတ်အရေဝ် ကုဒဝ်ဠာ၊ သ္ၚု၊ ကၠေၚ်တံဂှ် ဟွံဒးမံၚ်ရဂှ် တော်ကေတ်ရ။ မူဟိုတ်ရောတှ်ေ ဍေံတံ ဂစိုတ်ဒၟံၚ် ရဲ supplier အဓိကတံဂှ်ဏောၚ်။ လ္ၚဵုပ္တိုန်ၚုဟ် သွံတံဂှ် ကေတ်အရေဝ်ဂှ်တှ်ေ ဒးမံၚ်ရ၊ ဆ္ဂး ဗီုပြၚ်ဍေံတံကေတ်အရေဝ်ဂှ် ဗၠေတ်ဒၟံၚ်ညိဏောၚ်။ ဍေံတံ ဂစိုတ်ထောံ supplier ဂှ်တှ်ေ ပြဟ်ဟ်ဏံ ၚုဟ်စှ်ေအာမာန်ဏောၚ်၊ ဆ္ဂး ဗွဲကြဴ ရဲ supplier တံ ဟွံကဵုအထံက်အရီုရပုဟ်ဟီုမ္ဂး အတိုၚ်ဗွဝ်ဖျာဏံမွဲ လီုအာမာန်ဏောၚ်။ အေ ဂှ်တှ်ေ ၚုဟ်တိုန်ကၠုၚ်ဂှ်တှ်ေ ၜက်အာနူကဵု ၚုဟ်တိုန်ဒၟံၚ်လၟုဟ်ဂှ်မာန်ဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် အခိၚ်လၟုဟ် ဟိုတ်နူရပ်ဒက်ဒၟံၚ် တၠကမၠောန်တံဂှ်တုဲ ပြဟ်ဟ်ဏံ ဖေက်လကိုတ်တုဲ ၚုဟ်စှ်ေကၠုၚ်ဂှ်ဝွံ ၚုဟ်ဍာံဍာံဟွံသေၚ်ဂှ်ရ ပ္ဍဲဗလးတိဏံ ဗွဝ်ဖျာဒမၠုက် ဇၞော်ပၟဝ်ကၠုၚ်မာန်ရောၚ် ညးဆက်ဟီုလဝ်ရ။
တုဲကၠုၚ် ပ္ဍဲဂိတုဂျောန် (၄) တေံဂှ်လေဝ် ရဲဝေၚ်ၚုဟ်လှုဲဍုၚ်သ္အာၚ်တံကဵု ရဲကၠောန်ဒၟံၚ်ကမၠောန်ဟောန်ဒဳ ၃၉ တၠဂှ် ကံၚ်ဇြဳပၞာန် ကၟာတ်ထောံ စရၚ်ဗာန်ညးတံကဵု Pay account တံ ယာယဳတုဲ သွက်ဂွံကေတ်အရေဝ်ဂှ်လေဝ် ဆက်ဂၠိုက်ဂၠါဲထ္မံက်ပ္တိတ်ဒၟံၚ်ရောၚ် လလောၚ်ပ္တိတ်လဝ်ရ။
သ္အာၚ်နူဂှ်ပၠန် သၠုၚ်ပ္တိုန်ၚုဟ်သ္ၚုအပ္ဍဲဍုၚ် ဂၠိုၚ်ကဵုဆတုဲ သွံရာန်ဒၟံၚ်ဂးတုဲ တၠကမၠောန်သြောံသ္ၚုကဵု ညးတာလျိုၚ်သေန်တာ ရာန်ဖျာတံ ၁၁ တၠဂှ် ကေတ်လဝ်အရေဝ် နကဵုသၞောဝ်ဗၞိက် ကေုာံ ပရေၚ်ဒုၚ်ကာ ပၟိက်ဇၞော် ၝောံပိုဒ် ၅ သၞာံ (၂၀၁၂) ဂှ်တုဲ တၠကမၠောန်သြောံသ္ၚု (၂၄) တၠကဵု ဆေၚ်သတိုဝ် (၃၀) တံဂှ်လေဝ် တပ်အာဒဏ် ကေုာံ ကံက်အာအခေါန်ပၠန်ဏောၚ်ဂှ် ပ္ဍဲဂိတုဂျောန် (၃၀) တုဲကၠုၚ်တေံ လလောၚ်ပ္တိတ်လဝ်ရ။
ကံၚ်ဇြဳပၞာန်ဂှ်တှ်ေ စပ်ကဵုၚုဟ်ဗၞိက်ဖျာ သၠုၚ်တိုန်ကၠုၚ်ဂှ်တုဲ မ္ၚးနူကဵုတၠကမၠောန်၊ သၟာဗၞိက်၊ မၞိဟ်ပူဂဵုတံဂှ် စနူကဵုဆေၚ်သတိုဝ်တံဂှ် ဗက်ရပ်ကေတ်ဒၟံၚ်အရေဝ်တုဲ တုဲကၠုၚ်ဂိတုဂျူလာၚ် (၁) တေံဂှ်လေဝ် ပ္တိတ်ဂလေံကဵုသြန် သွက်သ္ၚိကၠအ် လောန်ၜက်နူသၞောတ်ဗ္ၜတ်ဂးတုဲ ကေတ်လဝ်အရေဝ် တိုက်သြန်ယၟုဒယှ် (၇) ရ။
တၠကမၠောန်ပရေၚ်ပိုန်ဒြပ်မွဲတၠပၠန်ဂှ် ၚုဟ်ဗၞိက်လၟုဟ်ဂှ်ဝွံ အခိၚ်ကံၚ်ဇြဳပၞာန် ထိၚ်လဝ်ဂှ် စှ်ေအာကီုလေဝ် ပ္ဍဲဍာ်ဇမၠိၚ် ကပေါတ်ပိုတ်တုဲ ၚုဟ်တိုန်ကၠုၚ်ဏောၚ် မဒှ်တုဲ မူဝါဒဗၠေတ်တ် ကံၚ်ဇြဳပၞာန်တံဂှ်တှ်ေ ဒှ်ဒၟံၚ်အကာဲအရာ ပလီုဒၟံၚ်ပရေၚ်ပိုန်ဒြပ် ဂၠိုၚ်ၚ်ကဵုဝါရောၚ် ပါ်ပါဲလဝ်ရ။
“သွက်ဍာ်ဇမၠေံဂှ်တှ်ေ အခိၚ်ဍေံတံထိၚ်လဝ်ဂှ် စှ်ေအာဏောၚ်။ ဟွံရံၚ်ဍာ်ဇမၠိၚ်ပုဟ်။ ထပိုတ်ထောံ supplie ဏံဂှ်တှ်ေ ဍာ်ဇမၠိၚ် ကၠောန်ထောံ ညံၚ်ပရေၚ်ကၠောန်ပ္တိတ်ကပေါတ်ဏံ ဂွံဒေါအ်အာဂှ်ဏောၚ်။ တုဲပၠန် ၚုဟ်ဍေံတံ ခုတ်လဝ်ဂှ်ရော ဍေံတံ ခုတ်သာ်လဵုရော။ ဗီုမိက်ဂွံစၟတ် စၟတ်ဒၟံၚ်ဟာ၊ အာထိၚ်ထောံ supplie ဏံဂှ်တှ်ေ ရဲထံက်ပၚ်ဒၟံၚ်ဇကုတံဂှ်လေဝ် ဒှ်အာညံၚ်ရဴအာပတ်ထောံကအ်ကီုရဏောၚ်။ အေ ဂှ်တှ်ေ အနာဂတ်ဏံ ၚုဟ်တိုန်ဂှ်တှ်ေ ကပေါတ်ပိုတ်တုဲ ဒှ်အာၚုဟ်က္ဍၚ်တိုန်အာ သာ်ဏံရဏောၚ်။ မူဝါဒဏံဂှ် ထေက်ကဵုဒးကလေၚ်သ္ၚဳဂၠိပ်ယျ။ အကြာပရေၚ်ဍုၚ်ကွာန်ဟွံညိၚ်ဝတ်ဒၟံၚ်ဂှ် မူဝါဒပရေၚ်ဍုၚ်ကွာန် ဗၠေတ်တ်တံရ ထပ်လုပ်ကၠုၚ်ဂှ်တှ်ေ ပရေၚ်ပိုန်ဒြပ်ဂှ် လီုတုဲလီုပၠန် ဒှ်ဒၟံၚ်ဍာ်ဏံရ” သာ်ဝွံ သ္ဂးရ။
ဟွံလ္ၚတ်လဝ် ပရေၚ်ပိုန်ဒြပ် ချိုတ်တ်ပၠိုတ်တ်မွဲသာ် ထိၚ်ဒက်ဒၟံၚ် နကဵုဓဝ်ဖေက်သၟးဂှ်ရ ဍာ်ဇမၠိၚ် အကာဲအရာပရေၚ်ပိုန်ဒြပ် သာပရေံကၠုၚ်မာန်ဏောၚ်တုဲ ၚုဟ်ဗၞိက်ဂှ်လေဝ် ဟွံညိၚ်ဝတ် ဒှ်ကၠုၚ်မာန်ရောၚ် ညးဆက်ဟီုရ။
သ္အာၚ်နူဂှ်ပၠန် ၚုဟ်ဗၞိက်စှ်ေတုဲ ဂွံညိၚ်အာဂှ်ကီု ညံၚ်ၚုဟ်မးသြန်ဗၟာ ဂွံကလေၚ်သၠုၚ်တိုန်ကၠုၚ်ကီုဂှ် ဒးကၠောန်ဏောၚ်တုဲ ၚုဟ်သြန်ဗၟာ သၠုၚ်မှဟေၚ် ၚုဟ်ဗၞိက်တံ စှ်ေကၠုၚ်ဏောၚ်ဂှ် တၠကမၠောန်ပရေၚ်ပိုန်ဒြပ်ဂမၠိုၚ် သ္ၚဳဂၠိပ်လဝ်ရ။
တိုက်သြန်ဂၠးတိဂှ်တှ်ေ ပရေၚ်ပိုန်ဒြပ်ဍုၚ်ဗၟာဂှ်ဝွံ ဟိုတ်နူပဋိပက္ခ၊ ပွမဟွံညိၚ်ဝတ် ကေုာံ ဟိုတ်နူဆုဲပြံၚ်ဌာန်ဒေသ အရာမသ္ကဵုက္တဵုဒှ်ပွတာဒၞါ လ္တူပရေၚ်ကၠောန်ပ္တိတ်ဗၞိက်တံဂှ်တုဲ ဒးဆက်ဆေၚ်ဒၟံၚ်မုက်ကဵု တၚ်ကော်ဆဴတံတုဲ ပရေၚ်ပိုန်ဒြပ် ဆက်လဇုဲအာမံၚ်ရောၚ် ပ္ဍဲဂိတုဂျောန် (၁၂) တုဲကၠုၚ်တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media