တဳဟဳရာန်၊ ဂျူလာၚ် ၇
သၟာပရေၚ်ပြုပြေၚ်ပြံၚ်လှာဲ မာသံက်ပဳဇက်ခဳယာန်ဝွံ ဂွံဇၞးကေတ် လ္ပာ်ဒစဵုဒစး ကောန်သာဗေတေဗ် သာအေ ဂျာလဳလဳဂှ်တုဲ ဂွံဒုၚ်ရုဲစှ်လဝ် နဒဒှ်သမ္မတတၟိ ဍုၚ်အဳရာန်ရ။
ဒံက်တာ ပဳဇက်ခဳယာန်ဝွံ ကြဴနူရိုဟ်မမာဲ ၃၀ ပြကောဋိကိုဋ်ပြၚ်တုဲဂှ် ဂွံဇၞးလဝ် ၅၃ ဒဿမ ၃ တၟံကၠံရောၚ် ထ္မံက်ထ္ၜးဒၟံၚ်ဂှ်ရ ပ္ဍဲရုဲမာဲ ဒဒှ်ရညးကလိဂွံဇၞးဂှ် လလောၚ်တြးလဝ်ရ။ ရဲလ္ပာ်ဒစဵုဒစးညး ဂျာလဳလဳဂှ်တှ်ေ ဂွံလဝ်မာဲ ၄၄ ဒဿမ ၃ တၟံကၠံဓဝ်ရ။
ပ္ဍဲကဵုပေါဲရုဲမာဲ အလန်ပထမ ဂိတုဂျောန် ၂၈ ကလိဂွံလဝ်ရဲကဵုမာဲ ၄၀ တၟံကၠံ မွဲဒမြိပ်ဝၚ် အောန်အိုတ်ဂှ်တှ်ေ အလံၚ်ညးစၞးလဵုမွဲမှ ဟွံဂွံလဝ်မာဲဗွဲမဂၠိုၚ် ဒှ်အာလဝ်တုဲ ဒးကလေၚ်ပြိုၚ်လဝ် အလန်ဒုတိယရ။
သမ္မတအဳရာန် တုဲကၠုၚ်တေံ အဳဗရာဟေန် ရိုက်သဳဝွံ တုဲကၠုၚ်ပ္ဍဲဂိတုမေ က္ၜၚ်ကျာလီုစှ်ေ ဂှ် ချိုတ်အာလဝ် အဖဝ်မၞိဟ် ၇ တၠဂှ်တုဲ ဒးကၠောန်ဗဒှ်လဝ် ပေါဲရုဲမာဲရ။
ဌာနဝန်ဇၞော်ကာအပ္ဍဲဍုၚ် အဳရာန်ဂှ် ကၠာဂွိုအ်လလောၚ်တြး သွဟ်လက္ကရဴအိုတ်ဂှ် ညးထံက်ဂလာန် ပဳဇက်ခဳယာန် ကလိဂွံလဝ်ဇၞးဂှ်ဝွံ ကၠောန်ဗဒှ်လဝ်ပေါဲအံၚ်ဇၞး ပ္ဍဲကဵုလ္တူဂၠံၚ် တဳဟဳရာန်ကဵု ဍုၚ်တၞဟ်သ္အာၚ်ဂမၠိုၚ်ရ။
ဒံက်တာ ပဳဇက်ခဳယာန် ဒှ်အ္စာဂဥုဲ ပါ်ကရေက်ကောန်တၟံတြေံ မွဲတၠဂှ်ဝွံ ဒှ်ညးပါ်ပါဲ ဒပ်ဗၠာဲသၟိၚ်ပရေၚ်ဘာသာ ဍုၚ်အဳရာန် ယၟုဒယှ်ဒၟံၚ်လ္ပာ်ပရေံပရေံတံဂှ်မွဲတုဲ အကာဲအရာအဳရာန် ပါ်တိတ်ဒၟံၚ်နူကဵုဗွိုၚ်ဍုၚ်သ္အာၚ်တံဂှ်လေဝ် ဒှ်ညးမၞုံပၟိက်မိက်ဂွံဖအိုတ်ကၠေံမွဲလေဝ် မဒှ်ရ။
သွက်ဂွံကလေၚ်ပၠောပ်လမျီု တၚ်တုပ်စိုတ်နျူကလဳယျာ ၂၀၁၅ မလီုအာလဝ်ဂှ် သွက်ဂွံပ္ညဳပ္ညပ် ကုဍုၚ်ပလိုတ် ဇြဟတ်ဇၞော်တံဂှ် ဒံက်တာပဳဇက်ခဳယာန် နွံဒၟံၚ်ပၟိက်ရ။
ဂျာလဳလဳ ကျအာ ပ္ဍဲပေါဲရုဲမာဲဂှ်တှ်ေ ဒှ်ညးဒစဵုဒစး ဍုၚ်ပလိုတ် နကဵုလစွံစိုတ် ကြံၚ်ၚ်မ္ၚိုဟ်ဟ်မွဲတုဲ အကြာဗွိုၚ်ပရေၚ်ဘာသာတံဂှ်တှ်ေ ဒှ်ညးကလိဂွံလဝ်ပရေၚ်ထံက်ဂလာန်မွဲရ။
တၚ်တုပ်စိုတ်နျူကလဳယျာ ထ္ပက်လဝ်စၟတ်တဲ ကုဍုၚ်သ္အာၚ် ဍုၚ်ဇြဟတ်ဇၞော်တံဂှ်ဝွံ လောန်ၜက်ဒၟံၚ် စေဝ်သာ်ဗ္ကေတ်အဳရာန်ရောၚ်ဂးတုဲ ညး ဒစဵုဒစးဒၟံၚ် တၚ်တုပ်စိုတ်ဏံ မဒှ်ရ။
ညးဍုၚ်ကွာန်ဗွဲမဂၠိုၚ်ဂၠေၚ် ဟွံပြေစိုတ်ဒှ်ဒၟံၚ်ဂှ်ရ မၞိဟ်ဂၠိုၚ်ကဵုပြကောဋိကိုဋ် ဗကပ်လဝ်ဗဗေၚ် ပေါဲရုဲမာဲသမ္မတဂှ်ရောၚ် သ္ဂးရ။ ဟိုတ်ဂှ်ရ လၟိဟ်ညးကဵုမာဲဝွံ ပ္ဍဲဝၚ် ဒှ်အာလဝ်အောန်အိုတ်လေဝ် မဒှ်ရ။
Ref: BBC