ကိယျေပ်၊ ဂျူလာၚ် ၉
ပ္ဍဲဂိတုဂျူလာၚ် ၈ ဂှ် ရုယှာ ပန်ပှော်ဗ္တိုက်လဝ် ဍုၚ်ယူကရုၚ် ပါလုပ်သီုကဵု ရုၚ်ဂဥုဲကောန်ၚာ် နွံလ္တူဍုၚ်ကိယျေပ်တံ နကဵုကမ်လှောဝ်တုဲ မၞိဟ် ၃၉ တၠ ချိုတ်အာလဝ်ရ။
ပရေၚ်ဗ္တိုက်ရုယှာဂှ်ဝွံ ဒှ်ပရေၚ်ဗ္တိုက် လ္တူကောန်အရာပ်တံ ဟွံမွဲကဵုပွစၚ်ခြၚ်တံရောၚ်ဂှ် သမ္မတယူကရုၚ် ဗလိုဝ်ဒဳမာ ဇြဳလာန်သကဳ ပ္တိုန်ဒုဟ် ဟီုဖျေံလဝ်ရောၚ်တုဲ ခၠေဝ်ပၠန်အာဏောၚ်ဂှ် ဟီုကြီုလဝ်ရ။
ဟိုတ်နူပရေၚ်ဗ္တိုက် အခိၚ်လဒေါဝ်တ္ၚဲဒၚ်ၚ် ဇြိုၚ်ကဵုဒှ်တံဂှ်တုဲ ပ္ဍဲရုၚ်ဂဥုဲကောန်ၚာ် အိုဝ်ခမာတ်ဒါ လီုအာလဝ်တံဂှ် မၞိဟ်လမျီုသှ်ေဂျိုၚ်တဴ အကြာအရာမလီုလာ်အာလဝ်တံ နွံမာန်တုဲ ကောန်ကလောန်ဟံၚ်ပြာ် ကေုာံ သၞာဲဒဴရုၚ်ဂဥုဲတံ မပါလုပ် သၞာဲဒဴရီုဗၚ်ကဵုတံ ၜံက်ခါဲဒၟံၚ်အရာမလီုလာ်တံ ဒဒှ်ရဂွံဆဵုကေတ်ဂှ် အ္စာပရိုၚ် အေအာပ်ပဳတံ ဟီုလဝ်ရ။
မ္ၚးနူကဵုဍုၚ်ဇၞော်ဂှ် ဍုၚ်ဇၞော်၊ ဍုၚ်ဍောတ် နွံဒၟံၚ်သ္ကုတ်ဗၟံက် ကေုာံ သ္ကုတ်သၠုၚ်ကျာဍုၚ်ယူကရုၚ်တံဂှ် ရုယှာ ပန်ပှော်ဗ္တိုက်လဝ်ကဵု ကမ်လှောဝ်တံ ဗွဲမဂၠိုၚ်ဂၠေၚ်ရောၚ် သမ္မတ ဇြဳလာန်သကဳ ဟီုလဝ်ရ။
ရုယှာ ဗ္တိုက်လဝ် နကဵုကမ်လှောဝ် ၃၈ ဖ္ဍိုက်တုဲ မ္ၚးနူကဵုညးမချိုတ်အာ ၃၉ တၠဂှ် ညးကလိဂွံဝပ် ၁၃၆ တၠ နွံဂှ် ဂွံတီကေတ်ရ။
သမ္မတ ဇြဳလာန်သကဳဂှ် အာတ်မိက်လဝ် သွက်ဂွံကၠောန်ဗဒှ် ကောံဓရီုကာတၟေၚ် လ္တူကံၚ်ဇြဳပရေၚ်ဂီုကၠီု ကုလသမဂ္ဂဂှ်တုဲ သွက်ဂွံခၠေဝ်ပၠန်အာ ပရေၚ်ဗ္တိုက်ရုယှာ သ္ကာတ်တ်မြဟ်ဟ်ဂှ် ဖ္တိုက်ဖ္အောဝ်လဝ် မဟာမိတ် ယူကရုၚ်တံရ။
ပရေၚ်ဗ္တိုက်ရုယှာဂှ် ဇၞော်သ္ကိုပ်အခေါၚ်အရာမၞိဟ် ကေုာံ ဂအုပ်ညးအုပ်ကာ ကုလသမဂ္ဂတံလေဝ် ပ္တိုန်လဝ်ဒုဟ် ဒစဵုဒစးလဝ်ရ။
အမေရိကာန် ကေုာံ အဳယူတံဂှ်လေဝ် ပ္တိုန်ဒုဟ် ဒစဵုဒစးလဝ် ပရေၚ်ဗ္တိုက်ရုယှာ လ္တူကောန်အရာပ်တံ သ္ကာတ်တ်မြဟ်ဟ်ရ။
ပြၚ်သေတ် ကေုာံ ကနေဒါတံလေဝ် ဒစဵုဒစးလဝ် ပရေၚ်ဗ္တိုက် ရုယှာတံဂှ်တုဲ ပရေၚ်ဗ္တိုက် ရုၚ်ဂဥုဲကောန်ၚာ်တံဂှ်ဝွံ ဒှ်ပြဝ မၞိဟ်အရိုၚ်တံရောၚ်ဂှ် ဟီုလဝ်ရ။
ရုယှာဂှ်တှ်ေ ပရေၚ်ဗ္တိုက်ဇီုကပိုက် လ္တူဍုၚ်ကိယျေပ်ဂှ်ဝွံ ဒှ်လဝ် ဟိုတ်နူသၞောတ်စဵုဒၞါ တရဴကျာ ယူကရုၚ်တံရောၚ်ဂှ် ကလေၚ်ခၠေဝ်လဝ်ရ။
ဒပ်ညးတံ ဗ္တိုက်လဝ် စမြိုၚ်စပ်ကဵုလ္ပာ်ပၞာန် ယူကရုၚ်တံသၟးရဂှ် အလဵုအသဳမဝ်သကိုဝ် ဟီုလဝ်ရ။
ဟိုတ်နူပရေၚ်ဗ္တိုက်ရုယှာတုဲ စမြိုၚ်မၞိဟ်ဒၟံၚ်တံလေဝ် ဒဒှ်ရလီုအာလဝ်ဂှ် ညးဒေသတံ ဟီုလဝ်ရ။
Ref: AP