ပါရဳ၊ ဂျူလာၚ် ၈
ပ္ဍဲပေါဲရုဲမာဲဍုၚ်ပြၚ်သေတ် အလန်ဒုတိယ သွဟ်လက္ကရဴအိုတ်ဂှ် ဒၞါဲအမာတ်ကၠတ်ထဝ်ဗွဲမဂၠိုၚ်ဂှ် ဂကောံပံၚ်ကောံလ္ပာ်တဲပါဲတံ ဂွံဇၞးလဝ်တုဲ သ္ကိုပ်ဝန်ဇၞော် ဂါဗရဳယဴ အာတ်တေဝ် နုက်တိတ်နူဒၞါဲဌာနန္တရညးဏောၚ်ဂှ် လလောၚ်တြးလဝ်ရ။
အလန်ဒုတိယ ရဲကဵုမာဲဂၠိုၚ်နူကဵု အလန်ပထမ ဗော် National Rally လ္ပာ်တဲပုၚ်ဂွံဇၞးလဝ်ဂှ် ဂကောံမဟာမိတ်ဝါဒဳဗဟဵု သ္ကိုပ်ဝန်ဇၞော်ကဵု သမ္မတ မက်ကရောန်ဂှ်ဝွံ ဂွံလဝ်ဒၞါဲဒုတိယရ။
ဗော် National Rally ဂှ်တှ်ေ ဂွံလဝ်ဒၞါဲတတိယတုဲ အပ္ဍဲကၠတ်ထဝ် ဒၞါဲမၞိဟ်ဗွဲမဂၠိုၚ်ဂှ် ဗော်လဵုမှ ဟွံဂွံလဝ်ဇၞးဂှ်ရ သွက်ဂွံဒက်အလဵုအသဳ ဂကောံပံၚ်ကောံဂှ် ဒးဂၠါဲအာမဟာမိတ်ဏောၚ် မဒှ်ရ။
ဗော် New Popular Front လ္ပာ်တဲပါဲဂှ် အပ္ဍဲကၠတ်ထဝ် ဂွံလဝ်ဒၞါဲဂၠိုၚ်အိုတ် ၁၈၁ ဒၞါဲတုဲ သမ္မတမက်ကရောန်ကဵု ဂကောံမဟာမိတ်ဝါဒဳဗဟဵုတံ ကလိဂွံလဝ်ဒၞါဲအမာတ် ၁၆၀ ပြၚ်ရ။
ဗော် National Rally နူကဵုမာရိန် လဳပေန်က္ဍိုက်ပ်တုဲ ပ္ဍဲအလန်ပထမဂှ် ကလိဂွံလဝ် ၁၄၃ ဒၞါဲတုဲ အပ္ဍဲကၠတ်ထဝ်ဂှ် ဗော်ဂွံလဝ်ဇၞး ဒၞါဲအမာတ်ကၠတ်ထဝ် ပိုတ်တ်သ္ကုတ်တ်ဂှ် ဟွံမွဲဒှ်ဒၟံၚ်ရ။
သ္ကိုပ်ဝန်ဇၞော် အာတ်တေဝ်ဂှ် စဵုကဵုပေါဲအိုဝ်လာံပေတ်ပါရဳ ကၠုၚ်စိုပ်ဏံ နကဵုညး ဆက်နွံဒၟံၚ် အတိုၚ်ဒၞါဲကဆံၚ်ဌာနန္တရဏံရဏောၚ်ကီုလေဝ် နုက်တိတ်အာ နူဌာနန္တရဏောၚ်ဂှ် ဟီုလဝ်ရ။
ဟိုတ်ဂှ်ရ သွက်ဂွံရုဲစှ် သ္ကိုပ်ဝန်ဇၞော်တၟိမွဲမာန် ကေုာံ သွက်ဂွံဒက်ပ္တန် ဂကောံအလဵုအသဳတၟိမွဲမာန်ဂှ် သ္ဇက်ဂွံဒးကၠောန်အာ ပရေၚ်ပ္ညဳပ္ညပ်စပ်ကဵုပရေၚ်ဍုၚ်ကွာန် လအ်အာစဵုကဵုသတ္တာဟတၟာဂလိုၚ်ဂှ် နွံဒၟံၚ်ရ။
ရုၚ်သမ္မတ မက်ကရောန်ဂှ်တှ်ေ စပ်ကဵုပရေၚ်ဒက်ပ္တန်ဂကောံအလဵုအသဳတၟိဂှ်တုဲ ကၠာဂွိုအ်သ္ဂုတ်သွာတ်မွဲမွဲသာ် မၚ်အာ ပရေၚ်ဒက်ပ္တန်ကၠတ်ထဝ်ကောန်ဂကူဏီဏောၚ်ဂှ် ဟီုလဝ်ရ။
ပ္ဍဲပေါဲရုဲမာဲ ကြဴနူသွဟ်ဟွံထေၚ်လဝ်တံ မံက်တိတ်ကၠုၚ်တုဲဂှ် က္ဍိုပ်သ္ကိုပ်လ္ပာ်တဲပါဲ ဂျုၚ်လုတ် မဳလာန်ချောန်ဂှ် နကဵုဂကောံလ္ပာ်တဲပါဲညးတံ သွက်ဂွံအုပ်ဓုပ်အာပြၚ်သေတ်ဂှ် ဒှ်ဒၟံၚ်ဒတုဲယျရောၚ် ဟီုလဝ်ရ။
ဟိုတ်နူသွဟ်ပေါဲရုဲမာဲ သာ်ဏံတုဲ ကၠတ်ထဝ်ပြၚ်သေတ်ဂှ်တှ်ေ ပ္ဍဲအရာခၞံသၞောဝ်တံကဵု ဖျေံတၚ်သ္ဂုတ်သွာတ်တၞဟ်ဟ်တံဂှ် အခက်အခုဲတၟာဂလိုၚ် နွံကၠုၚ်မာန်ရ။
Ref: AFP/NTD