ရေဝ်၊ ဂျူလာၚ် ၉
ဟိုတ်နူပရေၚ်ပန်ပှော် ကံၚ်ဇြဳပၞာန်ကဵု ဒပ်ပၞာန်မၚ်ကွာန် မၚ်တောပ်ဗ္တိုက်ဒၟံၚ် ဂၠံၚ်လုပ်မုဟ်ဒဵု ကွာန်အရုတ်တံၚ် ပွိုၚ်ဍုၚ်ရေဝ် တွဵုရးဍုၚ်မန်ဂှ်တုဲ တၠကၠအ်ထၜိုတ်မွဲတၠ ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဂျူလာၚ် ၇ အခိၚ်နူဂယး ၜိုတ် ၉ နာဍဳ အခိၚ်ဂကောံဒပ်ပံၚ်ကောံကံၚ်ဇြဳပၞာန်တံ မၚ်တောပ်ဗ္တိုက်ဒၟံၚ်ဂှ် ဂ္စါန်ပန်ညးသၟတ်ၜါတၠ ညးၜါကွဳလိုန်ဓာတ်မွဲမဂှ်တုဲ ဒးအာတၠကၠအ်ထၜိုတ် စဴကၠုၚ်နူကၠအ်ဂှ်တုဲ ချိုတ်အာလဝ်ရ။
ဟိုတ်နူပရေၚ်ပန်ပှော် ဂကောံဒပ်ပံၚ်ကောံ ကံၚ်ဇြဳပၞာန်တံဂှ်တုဲ တၠကၠအ်ထၜိုတ် ညးဒေသအရုတ်တံၚ် မၞုံယၟုဥူဝေန် အာယုက် ၅၀ ဂှ်ဝွံ ဒးမကမ်ကလိဂွံအာလဝ်ဝပ် ပ္ဍဲသြိုဟ်၊ ဒူစး၊ ပ္ဍဲဗုၚ်တံဂှ်တုဲ ချိုတ်အာလဝ် ပ္ဍဲဒၞါဲဒှ်ပရူတံဂှ်ရ။
ဇွရုပ် ဥူဝေန် ချိုတ်အာလဝ် အပ္ဍဲပရေၚ်ပန်ပှော်ဂှ် လ္ပာ်ကံၚ်ဇြဳပၞာန် ဟွံကဵုအခေါၚ်ပလံၚ် ဇရေၚ်ရုၚ်ဂဥုဲရေဝ်မွဲသာ် သွက်ဂွံဖျေံကမ္မဌာန်သ္ပကုသိုလ် ပ္ဍဲကဵုကွာန်ဂှ် ကဵုလဝ်ဇြဟတ်ဂရိုဟ်ရောၚ် ညးဒေသတံ လဴထ္ၜးလဝ်ရ။
ပ္ဍဲပွဳပွူဗ္ဒါဲကွာန်အရုတ်တံၚ်ဂှ် ဒပ်ပၠန်ဂတးတံ ချဳဒရာၚ်ဒၟံၚ်ပရေၚ်ပၞာန်တံ နွံဒၟံၚ်တုဲ စနူသၞာံတုဲမံက်တေံဂှ်တုဲ ဒပ်ကံၚ်ဇြဳပၞာန် မၚ်တောပ်ဗ္တိုက်ကၠုၚ်ဒၟံၚ်တံ နွံဒၟံၚ်ရ။
ပ္ဍဲကဵုပွိုၚ်ဍုၚ် လလောၚ်တြးလဝ် ပရေၚ်အုပ်ဓုပ်ပၞာန်ဂှ် လလောၚ်ပ္တိတ်လဝ်အမိၚ်ဒေသန္တရ ပတေၚ်ဂြတ်လဝ်စေဝ်ပၞောန်ဂမၠိုၚ် မပါလုပ် သီုကဵုအမိၚ်မၞိဟ်တြုံၜါတၠ ဍိုက်ကွဳလိုန်ဓာတ်တုပ်ပ်ဟွံဂွံတံဂှ်တုဲ ပရေၚ်ပန်ပှော်လွဟ်ဇၞော်တံဂှ် ကၠောန်သ္ပဒၟံၚ် အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−Social Media