နေဗျဳဒဝ်၊ ဂျူလာၚ် ၉
ဟိုတ်နူပၞာန်ပၠန်ဂတးရပ်လွဟ် အလုံဍုၚ်မွဲတုဲ ကံၚ်ဇြဳပၞာန် ဒးရပ်စပ်ဒၟံၚ် ခရိတ်အရပ်စပ်ပၞာန် ဗွဲမဂၠိုၚ်ဂၠေၚ်ဂှ်ဝွံ သြန်အကံက်အခေါန် ဒးဆောံလေၚ်ဒၟံၚ်တံဂှ် ညံၚ်ဂွံဂွံပေၚ်ၚ် ဂ္စါန်ဗက်ကၠုၚ်ရ။
သွက်ဂွံဂွံအခေါန်ဖလှာပေၚ်ၚ်ဂှ်တုဲ ပ္ဍဲဂိတုဂျူလာၚ် ၈ တုဲကၠုၚ်တေံ ကၠောန်ဗဒှ်လဝ် ကောံဓရီုကံၚ်ဇြဳပၞာန် သ္ပအထံက်အပၚ် ပရေၚ်ကံက်အခေါန် ကဆံၚ်ကၟိန်ဍုၚ်ရ။
ပ္ဍဲကောံဓရီုဏံဂှ် ဥူဝေန်ယှုၚ် ဝန်ဇၞော်ကၟိန်ဍုၚ် ဌာနပရေၚ်ဘဏ္ဍာ ကေုာံ ကိုန်စဳမာန် ကံၚ်ဇြဳပၞာန်ဂှ် သြန်အကံက်အခေါန် ဒးကံက်တံဂှ် ညံၚ်ဟွံဂွံခၠန်အာ သွက်ဂွံဘိုၚ်ကောပ်ကာဲဂှ်ကဵု သြန်ဂွံနူအကံက်အခေါန်တံ ဂွံဗြေဝ်ကၠုၚ်ဂှ် မ္ၚးနူကဵုဌာနမဆေၚ်စပ်တံဂှ် ဂကောံအလဵုအသဳ စပ်ကဵုဒေသတံလေဝ် သွက်ဂွံကောပ်ကာဲဂှ် စၞောန်ပ္ညုၚ်ကၠုၚ်ရ။
သွက်ဂွံကံက်အခေါန်ဖလှာပေၚ်ၚ်ဂှ် သီုကဆံၚ်ကၟိန်ဍုၚ် သီုရးဒေသ ကေုာံ တွဵုရးတံ မပါလုပ် စဵုကဵုကဆံၚ်ပွိုၚ်ဍုၚ်ဂှ် ဒက်ဂကောံသ္ပအထံက်အပၚ် ပရေၚ်ကံက်အခေါန်တံတုဲ ကဵုလဝ်တာလျိုၚ်တုဲယျဂှ် လ္ပာ်ကံၚ်ဇြဳပၞာန် ဟီုကၠုၚ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် လ္ပာ်ကံၚ်ဇြဳပၞာန် ဂ္စါန်ကၠုၚ်ညံၚ်ဂွံဂွံအကံက်အခေါန်ပေၚ်ၚ်ဂှ်ဝွံ ပ္ဍဲပေါဲဗ္တိုက်အလုံဍုၚ်မွဲဂှ် ဟိုတ်နူခရိတ်အရပ်စပ်ပၞာန်တံ သၠုၚ်တိုန်ကၠုၚ်တုဲ သွက်ဂွံစဵုဒၞါ အကာဲအရာနွံပၟိက်ဒၟံၚ်သြန်တံဂှ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကံက်ဂလိုၚ်ပ္တိုန်အခေါန်ဂှ်တှ်ေ ဟိုတ်နူခရိတ်အရပ်စပ်ပၞာန်တံ ဂၠိုၚ်ဒၟံၚ်ရဏောၚ်။ ဟိုတ်နူဂၠိုၚ်ဒၟံၚ်ဂှ်ရ ပ္ဍဲပရေၚ်တက်ပ္တိတ် သြန်စက္ခူဗၟာတံဂှ်လေဝ် ပ္ဍဲလက်ထက်ကံၚ်ဇြဳပၞာန်ဏံ ပိဠက်ဗဳလဳယျာန်ပြၚ် နွံဒၟံၚ်ရ။ ဂလိုၚ်ပ္တိုန်နူဏံပၠန်တှ်ေ ဟွံခိုဟ်ရပုဟ်။ ဟွံပ္တိတ်ဂလိုၚ်ပ္တိုန် သြန်စက္ခူတံဂှ်ပုဟ်တှ်ေ ဒးကံက်ဂလိုၚ်ပ္တိုန်အကံက်အခေါန်ရဏောၚ်။ ၜါဏံရနွံ။ အေ ဂှ်တှ်ေ ရုဲထောံလ္ပာ်ကံက်ဂလိုၚ်ပ္တိုန်အကံက်ခေါန်ရ” သာ်ဝွံ သ္ဂးရ။
ကံၚ်ဇြဳပၞာန် သီကေတ်လဝ်အဝဵု နကဵုဟိုတ် စရၚ်မာဲဗၠေတ်မှာဂှ်ဝွံ စနူသၞာံ ၂၀၂၁ ဗွဲကြဴဏံတုဲ ဒဵုကဵုအခိၚ်လၟုဟ် အလုံဍုၚ်မွဲ ဒးဆေၚ်ဒၟံၚ်မုက်ကဵု ပၞာန်ပၠန်ဂတး ဂကောံဇြဟတ်ပၠန်ဂတးတံ ဗွဲမသ္ကာတ်မြဟ်ရ။
အခိၚ်လၟုဟ်ဂှ် ကံၚ်ဇြဳပၞာန်ဝွံ ဟိုတ်နူပၞာန်ထ္ပက် ဂကောံဇြဟတ်ပၠန်ဂတးတံတုဲ အလုံဍုၚ်မွဲဂှ် ဒးဗလးလဝ်တဲဍုၚ်ဇၞော် ၆၀ ဍုၚ်ဟွံအောန်တုဲ သီုကဵုဌာန်ဂအုပ်တမ်ဒပ်တံ မပါလုပ် ဗ္ဒိုပ်ဒပ် ဗ္ဒါဲ ၂၅၀၀ ဒးဒုၚ်သီလဝ်ရ။
ဆ္ဂး ကံၚ်ဇြဳပၞာန် ဒးဆောံလေၚ်လဝ်တိဍာ် ဂၠိုၚ်ကၠုၚ်ဂှ်တှ်ေ ပ္ဍဲဒေသ ဍေံတံထိၚ်ဒက်လဝ်တံဂှ် ညံၚ်ဂွံဂွံအကံက်အခေါန်ပေၚ်ၚ်ဂှ် ပ္တိတ်ကၠုၚ်ဇြဟတ် နူကဆံၚ်ကၟိန်ဍုၚ် စဵုကဵုကဆံၚ်ပွိုၚ်ဍုၚ်ဂမၠိုၚ်ရ။
ညးချဳဒရာၚ်ကတိုၚ်ကၟဟ်ပရေၚ်ဍုၚ်ကွာန်မွဲတၠဂှ် ကံၚ်ဇြဳပၞာန် ကၠောန်ကၠုၚ် သ္ဂောံကံက်ဂလိုၚ်ပ္တိုန်အခေါန်ဂှ်ဝွံ သွက်ဂွံဂွံသြန်လုပ် သွက်ဍေံတံဏောၚ်တုဲ ကံက်ဂလိုၚ်ပ္တိုန်အကံက်ခေါန်မ္ဂး တၠကမၠောန်ဂမၠိုၚ် ထပ်ဂွံအာပရဲဏောၚ်တုဲ ညးဍုၚ်ကွာန်တံရ ဒှ်ဒဒိုက်ဂှ် ဟီုလဝ်ရ။
“ကံက်ဂလိုၚ်ပ္တိုန် အခေါန်ဏံမ္ဂး ဂွံကၠုၚ်သြန်ဘဏ္ဍာ ကၟိန်ဍုၚ်ဏောၚ် ကံၚ်ဇြဳပၞာန်ဂှ်တှ်ေ အဓိက သွက်ဂွံဂွံသြန်လုပ် သွက်ဍေံတံရဏောၚ်။ သွက်ပရေၚ်ရာန်လွဟ်ဍေံတံဂှ်တှ်ေ ဂွံအာအကံက်အခေါန် ဗွဲမဂၠိုၚ်ဏောၚ်။ ရံၚ်အာလ္ပာ်တၠကမၠောန်တံဂှ်ပၠန်တှ်ေ ဒးကဵုအာ အကံက်အခေါန် တၟာဂလိုၚ်ဏောၚ်ဂှ်ရ လ္တူၚုဟ်ဖျာညးတံဂှ်လေဝ် ပ္တိုန်ကၠုၚ်ပရဲ တၟံကၠံဂၠိုၚ်ကၠုၚ်ဏောၚ်၊ ပ္ဍဲဗလးတိဏံဂှ်တှ်ေ ၜိုတ်ကဵုလဝ်အကံက်တံဂှ် ညံၚ်ဂွံထေက်တန်ၚုဟ် ပ္တိုန်ကၠုၚ်ၚုဟ်တံ နွံမာန်ဏောၚ်။ အေ ဂှ်တှ်ေ ဒှ်ဒဒိုက်ဍာံဍာံဂှ် ညးဍုၚ်ကွာန်တံရဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ မ္ဒးကၠောန်လဝ် ညံၚ်ဂွံဂွံအခေါန်ဂၠိုၚ်ဂှ်ဝွံ ထ္ၜးလဝ်ဟိုတ် အတိုၚ်သၞောဝ်သ္ဇိုၚ်ဒက်ပ္တန် ၂၀၀၈ ၝောံပိုဒ် ၃၈၉ ဇၟာပ်ကောန်ဍုၚ် တာလျိုၚ်ဒးကဵုအခေါန် အတိုၚ်သၞောဝ်တံနွံဒၟံၚ်ဂှ်ရ။
အတိုၚ်ခံက်အၚ် ၁ သၞောဝ်ဏံဂှ်မ္ဂး အကံက်အခေါန်သြန်လုပ်၊ အကံက်အခေါန်ပရေၚ်သွံရာန်ဗၞိက်၊ အကံက်အခေါန်လ္တူဗၞိက်ပၠောပ်နၚ်ဍုၚ်သ္အာၚ်တံ မပါလုပ် အခေါန်ဖလှာ စပ်ကဵုသၞောဝ်တံဂှ် မ္ၚးနူကဵုကဆံၚ်ကၟိန်ဍုၚ်ဂှ် အကံက်အခေါန်ပါလုပ် ပ္ဍဲခံက်အၚ် ၅ ဂမၠိုၚ် မပ္တံကဵုအခေါန်တိ၊ အခေါန်လ္တူဗၞိက်ပ္တိတ်အပ္ဍဲဍုၚ်တံ မပါလုပ် အခေါန်ဖလှာဂကူတၞဟ်ဟ်တံဂှ်တှ်ေ ရးဒေသ ကေုာံ တွဵုရးဂမၠိုၚ် ကံက်ဒၟံၚ်ရောၚ် သ္ဂးရ။
ညးဍုၚ်ကွာန်မွဲတၠဂှ်တှ်ေ ကံၚ်ဇြဳပၞာန် ကံက်ဂလိုၚ်ပ္တိုန်အကံက်အခေါန်မ္ဂး ညးဍုၚ်ကွာန်ဒးသုၚ်စောဲတံရဟေၚ် ဒးဂိဏောၚ်တုဲ အခိၚ်ကာလလၟုဟ်ဏံ ဒးဂၠါဲလှုဲဂှ်လေဝ် ကျာတ်ဝါတ်တုဲ ၚုဟ်ဗၞိက်တံဂှ်လေဝ် အခိၚ်တိုန်ဒၟံၚ်ဂှ် ကံက်ဂလိုၚ်ပ္တိုန်အခေါန်မ္ဂး ကျာတ်ဝါတ်ကၠုၚ်ညးသ္ကအ် ၜါကဆံၚ်ဏောၚ်ဂှ် ဟီုရ။
“ကံက်ဂလိုၚ်ပ္တိုန်အခေါန်ဏောၚ်ဟီုတှ်ေ အာဂိ လ္တူရဲရပ်စပ်သုၚ်စောဲပိုယ်တံရဏောၚ်။ ကံက်ဂလိုၚ်ပ္တိုန် လ္တူကုမ္ပဏဳ လ္တူကမၠောန်တံဂှ်တှ်ေ ကမၠောန် ကမ္ပဏဳတံဂှ်လေဝ် ဗီုလဵုဟီုဟီု ကလေၚ်ကေတ် ဇရေၚ်ရဲရပ်စပ်စသုၚ်တံဂှ်ရဏောၚ်။ ကလေၚ်ကေတ်ဏောၚ်ဂှ်ရ ရဲသုၚ်စောဲတံရ ဒးဂိဏောၚ်။ ဟိုတ်ဂှ်ရ ညးဍုၚ်ကွာန်တံ ကြေပ်ဂြတ်အာအိုတ်ဏောၚ်။ အခိၚ်ဒးဂၠါဲကျာတ်ဂှ် ထပ်ဂလိုၚ်ပ္တိုန်သီုအကံက်အခေါန်တုဲ ထပ်ဒးကဵုဒၟံၚ်မ္ဂး အရာဟွံပြေပြံၚ်တံ ဒှ်ကၠုၚ်ဏောၚ်။ နကဵုညးဍုၚ်ကွာန် ရပ်စပ်သုၚ်စောဲတံလေဝ် သာတုဲခက်ခုဲကၠုၚ်ဏောၚ်။ အခိၚ်ကာလတ္ၚဲဏံ ဂၠါဲလှုဲကျာတ်ဒၟံၚ်ဂှ် အရာရာအိုဿီုလေဝ် ၚုဟ်တိုန်ဒၟံၚ်ဂှ် အကံက်အခေါန်ဂှ်လေဝ် ဂၠိုၚ်ကၠုၚ်တှ်ေ ကျာတ်ဝါတ်အာဏောၚ်။ ခက်ခုဲအာ ၜါကဆံၚ်ရ” သာ်ဝွံ သ္ဂးရ။
အတိုၚ်တၚ်နၚ် ဂကောံသုတေသန ဗၠးၜးတံဂှ်မ္ဂး ကံၚ်ဇြဳပၞာန်ဝွံ သွက်သၞာံပရေၚ်ဘဏ္ဍာ သၞာံ ၂၀၂၃−၂၀၂၄ ဂှ် နဒဒှ်ခရိတ်အရပ်စပ်ကာစဵုဒၞါဂှ် သုၚ်စောဲလဝ် ၅၆၀၀ ဗဳလျာန်ဒ္ကေဝ်ပြၚ် ဂၠိုၚ်အိုတ်တုဲ လၟိဟ်ဏံဝွံ မွဲဒမြိပ်ဝၚ်ဒပ်ပၞာန်ဂှ်တှ်ေ ဒှ်လဝ်လၟိဟ်ဂၠိုၚ်အိုတ်ရ။
အလဵုအသဳညဳသၟဟ်ဂကူ NUG ဂှ်တှ်ေ ကံၚ်ဇြဳပၞာန်ဝွံ အပ္ဍဲပၞာန်သီအဝဵု ပွိုၚ်ပိသၞာံဏံ သွက်ခရိတ်အရပ်စပ်ပၞာန်တံဂှ် တက်ပ္တိတ်လဝ် သြန်စက္ခူ ၃၀၀၀၀ ဗဳလျာန်ဒ္ကေဝ်ပြၚ်ဂှ်ရ ဣဏံဝွံ ဒှ်ဟိုတ်သြန်ဗၟာ ဂွံစှ်ေကၠုၚ်အဓိကရောၚ်ဂှ် ပ္ဍဲဂိတုဂျူလာၚ်မံက်တေံ ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−CJ