နေဗျဳဒဝ်၊ ဂျူလာၚ် ၉
သွက်ဂွံကၠောန်ဗဒှ်ပေါဲရုဲမာဲတုဲ အတိုၚ်သၞောဝ်ပ္တိုန်စရၚ်ဗော်ပရေၚ်ဍုၚ်ကွာန် ကံၚ်ဇြဳပၞာန် ကလေၚ်စၞောန်ပျးလဝ်ဂှ်မ္ဂး ပ္ဍဲကဵုအာတ်ပ္တိုန်လဝ်စရၚ် နကဵုအခေါၚ်ဒက်ပ္တန်ဗော်တံဂှ် ဗော်ပရေၚ်ဍုၚ်ကွာန် ၅ ဗော် ဒးဒုၚ်တးပါဲလဝ်ရ။
အတိုၚ်တၚ်လလောၚ်တြး ကမ္မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက်လဝ်ဂှ်မ္ဂး ဗော်ကောန်ကရက်ကောန်ဂကူကချေၚ်၊ ဗော်အခေါၚ်အရာမၞိဟ် ကေုာံ ဒဳမဝ်ကရေဇြဳ၊ ဗော်ကောန်ဂကူရခေၚ်၊ ဗော်ညးဍုၚ်ကွာန်ချေၚ် ကေုာံ ဗော်ပရေၚ်ဖောအ်ဗြေဝ်တောတက်ကၟိန်ဍုၚ်တံ မဒှ်ရ။
ဗော်ကောန်ကရက်ကောန်ဂကူကချေၚ်၊ ဗော်အခေါၚ်အရာမၞိဟ် ကေုာံ ဒဳမဝ်ကရေဇြဳ မအာတ်ပ္တိုန်လဝ် အခေါၚ်ဆက်ဒက်ပ္တန်ဗော်တံဂှ် ကမ္မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက်ပ္တိုန်လဝ်ဂှ် တးပါဲလဝ်ရောၚ် ပ္ဍဲဂိတုဂျူလာၚ် ၈ တေံ လလောၚ်ပ္တိတ်လဝ်ပရိုၚ်ရ။
ဗော်ကောန်ဂရက်ကောန်ဂကူကချေၚ်ဂှ် နကဵုသၞောဝ်ပ္တိုန်စရၚ်ဗော်ပရေၚ်ဍုၚ်ကွာန် ၝောံပိုဒ် ၆၊ ဗော်အခေါၚ်အရာမၞိဟ် ကေုာံ ဒဳမဝ်ကရေဇြဳဂှ် နကဵုၝောံပိုဒ် ၅ တံဒှ်တမ် ဟွံကိတ်ညဳကဵု တၚ်စၞောန်ပျး ပါလုပ်ပ္ဍဲၝောံပိုဒ်တံဏံဂှ်တုဲ တးပါဲလဝ်ရောၚ် ထ္ၜးလဝ်ဟိုတ်ရ။
အတိုၚ်တၚ်စၞောန် ၝောံပိုဒ် ၆ ဂှ်မ္ဂး ပွမချူဇန်စန်ဒက်ဆဝ်မ္ၚုဟ် မဖန်ဗဒှ်ကဵု ပဋိပက္ခ စပ်ကဵုပရေၚ်ကောန်ဂကူ ပရေၚ်ဘာသာ မၞိဟ်ဂမၠိုၚ် ဟွံသေၚ်မ္ဂး မၞိဟ်မွဲမွဲတံဂှ်ကီု ပါလုပ်သီုကဵုအဝဵုအပိုၚ်အခြာပိတန်တံဂှ် ကၠောန်သ္ပဟွံဂွံ တၚ် ၆ တၚ် ပါလုပ်ရ။
ပ္ဍဲၝောံပိုဒ် ၅ ဂှ်တှ်ေ ယၟုဗော် မိက်ဂွံဒက်ပ္တန်ဂှ်ကီု၊ အလာံ၊ တဆိပ်၊ ဗီုပြၚ်ဒက်ပ္တန်၊ သဘဴဓဝ်ပရေၚ်ဍုၚ်ကွာန် ကေုာံ လၟိဟ်ကောန်ဗော် ခုတ်လဝ်၊ သြန်ဗွဝ် ကေုာံ ပွမပံက်ရုၚ်တံ ဒှ်တမ် ဒးပ္တိုန်ထ္ၜးကဵုအာ ချိုတ်တ်ပၠိုတ်တ်ဏောၚ်ဂှ် စၞောန်ပျးလဝ်ရ။
သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် အခိၚ်ကာလလၟုဟ် သွက်အခေါန်ပ္တိုန်စရၚ်ဗော်ဂှ် ဂွံဍိုက်ပေၚ် အတိုၚ်တၚ်စၞောန်ပျးတံဂှ် ဟွံလောဲသွာတုဲ လ္ပာ်ကံၚ်ဇြဳပၞာန်လေဝ် ၜိုတ်ဗော်ဂွံလဝ်တၚ်တုပ်စိုတ် ကုညးတံရဟေၚ် ကဵုဒၟံၚ်အခေါၚ် ဒှ်ဒၟံၚ်သဘဴဏံဏောၚ်ဂှ် သ္ၚဳဂၠိပ်လဝ်ရ။
“အခိၚ်ဗီုလၟုဟ် အတိုၚ်ဍေံတံ (စကစ) ဟီုရ။ ဂွံဍိုက်ပေၚ်ဂှ် ဟွံလောဲပုဟ်။ ဍိုက်ပေၚ်ရဟီုကၠာ နကဵုဟိုတ်နာနာသာ် ဗီုနူကၠၚ်ဂှ် ပါဲထောံမ္ဂး လ္ပာ်ဇကုလေဝ် အခေါၚ်ဟီုဟွံမွဲပုဟ်။ အေ ဂှ်တှ်ေ ၜိုတ်ဗော်ဒက်လဝ်မဟာမိတ် ကုဍေံတံရ ကဵုလဝ်အခေါၚ်။ ဗော်သှ်ေတံဂှ်တှ်ေ ဍေံတံဟွံမိက်ကဵုအခေါၚ်ရပုဟ်” သာ်ဝွံ သ္ဂးရ။
ပ္ဍဲဂိတုဂျူလာၚ် ၁ တေံဂှ်လေဝ် ဗော်ပရေၚ်ဍုၚ်ကွာန်ဝှ်ကြံၚ်ကောန်ဍုၚ်အရၚ် ဗော်ကောန်ဂကူရခေၚ်ဂှ် ဟွံကိတ်ညဳကဵု တၚ်စၞောန်ပျး သၞောဝ်ပ္တိုန်စရၚ်ဗော်ပရေၚ်ဍုၚ်ကွာန် အတိုၚ်ၝောံပိုဒ် ၇ ဂှ်ဂးတုဲ ဒးဒုၚ်တးပါဲလဝ် အခေါၚ်ပ္တိုန်စရၚ်ဗော်ရ။
ပ္ဍဲဂိတုဂျောန် ၁၅ တေံဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် ပ္ဍဲဂိတုအံက်တဝ်ဗာ သၞာံဏံ ကံက်စရၚ်လၟိဟ်မၞိဟ်သ္ဂာဗ္တံတုဲ ကၠောန်အာပေါဲရုဲမာဲ သၞာံ ၂၀၂၅ ဂတဏံဏောၚ်ဂှ် ဟီုပ္တိတ်ကၠုၚ်လဝ် အလန်ပထမကိုပ်ကၠာအိုတ်ရ။
ကြဴနူဂှ်တုဲ ဗော်ပရေၚ်ဍုၚ်ကွာန် ပ္တိုန်လဝ်အခေါၚ်ဒက်ပ္တန်ဗော် ကေုာံ အာတ်ပ္တိုန်လဝ်အခေါၚ်ပ္တိုန်စရၚ်ဗော် ပ္ဍဲကမ္မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက်လဝ်တံဂှ် စၟဳတ်တုဲ ဗော်ဟွံကိတ်ညဳကဵု တၚ်စၞောန်ပျးတံဂှ် တးပါဲကၠုၚ်လဝ် အဆက်က်ရ။
ဟိုတ်ဂှ်ရ ဗော်ဒှ်ပြသၞာမာန် လ္တူပေါဲရုဲမာဲ ကံၚ်ဇြဳပၞာန် ကၠောန်ဗဒှ်တံဂှ်ကဵု ဗော်ပြိုၚ်ဟွံမာန်တံဂှ် ထ္ၜးဟိုတ်နာနာတုဲ ဒှ်ဒၟံၚ်အကာဲအရာ ပလီုအာဏောၚ်ဂှ် ဥူဖေတာန် ထံက်ထ္ၜးလဝ်ရ။
“စပ်ကဵုပေါဲရုဲမာဲဍေံတံတုဲ ၜိုတ်ဗော်ကလေၚ်စာန်စးဟွံမာန်တံဂှ်ရ ဒှ်ဒၟံၚ်ဍာ်ကဵုလဝ်အခေါၚ်။ ဗော်သှ်ေတံဂှ်တှ်ေ ဗော်ဒှ်ပြသၞာမာန် စပ်ကဵုပေါဲရုဲမာဲဂှ်ကီု ဗော်ဍေံတံမာန်ဟွံမာန်တံဂှ် မွဲဟွံသေၚ်မွဲ ထ္ၜးဟိုတ်တုဲ ပလီုအာဏောၚ်။ တးပါဲတှ်ေ တးပါဲဏောၚ်။ ဂွံဆဵုကေတ် အကာဲအရာသာ်ဏံရ” သာ်ဝွံ သ္ဂးရ။
ၝောံပိုဒ် ၇ ဂှ်ဝွံ ကုဂကောံဒးဒုၚ်လလောၚ်တြးလဝ် နဒဒှ်ဂကောံဟွံလုပ်သၞောဝ်၊ ဂကောံစၟတ်လဝ် ကလိလောန်လဝ် ပြဝပကီုပရာပ် ကေုာံ မၞိဟ်ပူဂဵုတံဂှ် တိုက်ရိုက်ကဵုဒှ် တိုက်ရိုက်ဟွံသေၚ်ကဵုဒှ် ဂကောံဗော်သွးကဵုဇြဟတ်ရီုဗၚ်တံဂှ် အခေါၚ်အာတ်ပ္တိုန် နဒဒှ်ဗော်ပရေၚ်ဍုၚ်ကွာန် ဟွံမွဲပုဟ်ဂှ် ထ္မံက်ထ္ၜးလဝ်ရ။
ပ္ဍဲဂိတုမေတေံလေဝ် ဗော်ညးဍုၚ်ကွာန်ချေၚ်ဂှ် နကဵုသၞောဝ်ပ္တိုန်စရၚ်ဗော်ပရေၚ်ဍုၚ်ကွာန် ၝောံပိုဒ် ၄ ၊ ဗော်ပရေၚ်တောတက်ဖောအ်ဗြေဝ်ကၟိန်ဍုၚ်ဂှ် နကဵုၝောံပိုဒ် ၆ တံဒှ်တမ် ဟွံကိတ်ညဳကဵု တၚ်စၞောန်ပျး ပါလုပ်ပ္ဍဲၝောံပိုဒ်တံဂှ်ဂးတုဲ ကမ္မယှေန်ပေါဲရုဲမာဲ တးပါဲလဝ် အခေါၚ်ပ္တိုန်စရၚ်ဗော်တံဂှ်ရ။
ဗော်ဒးဒုၚ်ကယျာန်ပါဲသီုဖအိုတ်တံဂှ် ဟိုတ်ဟွံကိတ်ညဳကဵု တၚ်စၞောန်ပျး ပါလုပ်ပ္ဍဲသၞောဝ်တံဂှ်ရနွံတုဲ ဗွဲလစှ်ေ ဂှ်တှ်ေ လ္ပာ်ကမ္မယှေန် လလောၚ်ပ္တိတ်ကဵုလဝ်သမ္တီ ချိုတ်တ်ပၠိုတ်တ် ဟွံမွဲရ။
အခိၚ်လၟုဟ် ကမ္မယှေန်ပေါဲရုဲမာဲဂှ် ကဵုလဝ်အခေါၚ်ပ္တိုန်စရၚ်ဗော် ကုဗော်ပရေၚ်ဍုၚ်ကွာန် ၄၉ ဗော်ဂှ်တုဲ သီုဗော် NLD မပါလုပ် ဗော် ၄၀ ဗော်ဂှ်တှ်ေ ပလီုထောံလဝ် အတိုၚ်သၞောဝ်ပ္တိုန်စရၚ်ဗော်ပရေၚ်ဍုၚ်ကွာန် ၝောံပိုဒ် ၂၅ ရ။
ပရိုၚ်−သြၚ်လောန်တိုၚ်(မ်)
ဗီု−CJ