ကျံက်ကျဳ၊ ဂျူလာၚ် ၁၁
ရးဗဂေါ ပ္ဍဲပွိုၚ်ဍုၚ်ကျံက်ကျဳ ပ္ဍဲကွာန်ညးဍုၚ်ကွာန်ကောန်အရာပ်တံ သ္ပဒတဴတံဂှ် ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော် ကေုာံ နကဵုဒရုၚ်တံဂှ်တုဲ ကောန်အရာပ်ၜါတၠ ချိုတ်တုဲ မွဲတၠ ဇီုကပိုက်ကလိဂွံလဝ်ဝပ်ရောၚ် ဗော်သွးကောန်ဂကူကရေၚ် KNU ဗဟဵု လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုဂျူလာၚ် ၈ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ် နူတမ်ဒပ်ခမရ စၟတ် ၃၀၇ ထောံလဝ်မခတိုဟ် နကဵုဒရုၚ် အပ္ဍဲကွာန်(လေးအိမ်စု) ဂှ်တုဲ ကိုဝ်ကျဝ်ယျေဝ် ညးဒေသအာယုက် ၃၅ သၞာံ၊ မမိုဝ်ဝါ အာယုက် ၄၄ သၞာံတံ ဇီုကပိုက်ချိုတ်အာလဝ်ရ။
အပ္ဍဲပရေၚ်ပန်ပှော် လွဟ်ဇၞော် ကေုာံ ဒရုၚ် နူကဵုကံၚ်ဇြဳပၞာန်တံဂှ် သ္ၚိဒၟံၚ်ညးဒေသ ဟွံအောန်နူကဵုၜါမ လီုလာ်အာလဝ်တုဲ ညးဍုၚ်ကွာန်ကောန်အရာပ်တံလေဝ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ညးဒေသ နူပွိုၚ်ဍုၚ်ကျံက်ကျဳ ပါလုပ်ဒၟံၚ် ပ္ဍဲတိဍာ်အုပ်ဓုပ်ခရိုၚ်ညံၚ်လေဝ်ပေန် KNU တံဂှ်ဝွံ အပ္ဍဲကာလသီအဝဵုဏံ ဒးဆေၚ်ဒၟံၚ်မုက်ကဵု ပရေၚ်ဝးပ္ကဝ်အခေါၚ်အရာမၞိဟ် နူဒပ်ကံၚ်ဇြဳပၞာန်တံ၊ ဒးဒုၚ်ရပ်နဒဒှ်ဇွောံစဵုဒၞါပၞာန်တံ၊ ဒးဒုၚ်ရပ်ဒက်ဍဵုဍိုက်ပျဲပျာံ ဂစိုတ်ဂယိုၚ်ဒၟံၚ်တံ မဒှ်ရ။
အတိုၚ်တၚ်လလောၚ်တြး KNU ဂှ်မ္ဂး ပ္ဍဲတိဍာ်အုပ်ဓုပ်ကဝ်တူလေဝ် ဒပ်မဟာ နွံဒၟံၚ်ထပှ်ဂှ် ခရိုၚ်ညံၚ်လေဝ်ပေန်ဝွံ ဟိုတ်နူပွဖံက်ပ္ကဝ်အခေါၚ်အရာမၞိဟ် နူဒပ်ကံၚ်ဇြဳပၞာန် မကလိလောန်ဒၟံၚ်တံဂှ်တုဲ ညးဍုၚ်ကွာန်ဒေသ မသုန်ကိုဋ်ပြၚ် ဒးထောံလသာသ္ၚိဌာန် ဒးဂြိပ်ဒဴဒၟံၚ် ဂၠိုၚ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီု−KNU