လ္ဂုၚ်၊ ဂျူလာၚ် ၁၁
ပ္ဍဲတွဵုရးသေံ ပေါဲဗ္တိုက်တံ သ္ကာတ်မြဟ်ဒၟံၚ်တုဲ ပ္ဍဲရခေၚ်ဂှ် အခိၚ်ဒပ်ပၞာန်ရခေၚ် အေအေ သီဂွံဒၟံၚ် တိဍာ် မွဲတုဲမွဲဂှ် ညးစၞးကံၚ်ဇြဳပၞာန်တံဝွံ အာစိုပ်ဍုၚ်ကြုက် ဂၠိုၚ်ၚ်ကဵုဝါတုဲ ကလိဂွံဒၟံၚ် လွဟ်လက်နက်တၟိတၟိ နူအလဵုအသဳဗေကျေန်ရောၚ် သ္ဂးရ။
ကံၚ်ဇြဳပၞာန် ကျဒၟံၚ်ပၞာန် ဇၟာပ်ပ်ပေါဲဗ္တိုက် နူဒေသနာနာတံဂှ် နူဗေကျေန် ထံက်ပၚ်ကဵုဒၟံၚ် လွဟ်လက်နက်တၟိတၟိတံရောၚ်ဂှ် တမ်ရိုဟ်ပရိုၚ်လ္ၚဵုတံ ဟီုရ။
တုဲကၠုၚ် ပ္ဍဲဂိတုဂျောန် ၁၉ တေံ ညးစၞးတၟေၚ်ဍုၚ်ကြုက် စပ်ကဵုဍုၚ်ဗၟာ တာန်ယှဳကျောန်ဝွံ ကၠုၚ်စိုပ်နေဗျဳဒဝ်တုဲ ဆဵုဂဗလဝ်ကဵု ဝန်ဇၞော်ကာဍုၚ်သ္အာၚ် ကံၚ်ဇြဳပၞာန် ဥူတာန်ဇြိုဲရ။
ပ္ဍဲဂိတုဂျောန်အိုတ်ဂှ် သမ္မတတြေံ ဥူတုၚ်ဇြုၚ် အာစိုပ်လဝ် ဍုၚ်ကြုက်တုဲ ဆဵုဂဗလဝ်ကဵု ဝန်ဇၞော်ကာဍုၚ်သ္အာၚ် ဍုၚ်ကြုက် ဝါန်ယဳရ။
ကြဴနူဂှ်တုဲ ဒုက္ဍိုပ်သ္ကိုပ်ကံၚ်ဇြဳပၞာန် သဵုဝေန်ဝွံ အာစိုပ်လဝ် ဍုၚ်ကြုက်တုဲ ကြဴနူသီအဝဵုတုဲ ညးဝွံ ဒှ်ကောန်ဂကောံကံၚ်ဇြဳပၞာန် အာစိုပ်လဝ်ဍုၚ်ကြုက် ကဆံၚ်သၠုၚ်အိုတ်မွဲရ။
လှဲပြံၚ်အဝဵုတုဲ သွက်ဂွံကလေၚ်ပြံၚ်လွေဟ် သၞောတ်ဒဳမဝ်ကရေဇြဳ သီုကဵုပေါဲရုဲမာဲဂှ် ကြုက် ဟီုလဝ်ကဵု ဥူတုၚ်ဇြုၚ် သွက်ဂွံလှေံလှန် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် ဌာန်ပရိုၚ် CNA နိဿဲကေတ် တမ်ရိုဟ်ပရိုၚ်ဒပ်ပၞာန်တံတုဲ ထ္မံက်ထ္ၜးလဝ်ရ။
ကံၚ်ဇြဳပၞာန်ဂှ်တှ်ေ သွက်အဝဵုညးတံ ဂွံဆက်တန်တဴအာဂှ် သွက်ဂွံလၞိန်ဗပိန် ဂကောံဇြဟတ်နွံပၟိက်ဒဳမဝ်ကရေဇြဳတံဂှ် ဒဒှ်ရအာတ်မိက်လဝ် အရီုဗၚ်ကြုက်ဂှ်လေဝ် ထ္မံက်ထ္ၜးလဝ် ပ္ဍဲပရိုၚ်ဝွံရ။
လွဟ်လက်နက်တၟိ ကြုက်ထံက်ပၚ်ကဵုဂှ်ဝွံ အပ္ဍဲၜါသတ္တာဟ ဟွံသေၚ်မ္ဂး အပ္ဍဲပွိုၚ်မွဲဂိတု စိုပ်ကၠုၚ် အပ္ဍဲဍုၚ်ဗၟာဏောၚ်ဂှ် တမ်ရိုဟ်ပရိုၚ်မွဲဂှ် ဟီုရ။
Ref: AsiaNews