ရေဝ်၊ ဂျူလာၚ် ၁၁
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ဗ္ဒါဲကွာန်ကျာ် ပွိုၚ်ဍုၚ်ရေဝ် တွဵုရးဍုၚ်မန်ဂှ် ကောန်ဒပ်ကံၚ်ဇြဳပၞာန် ၅ တၠ ချိုတ်အာလဝ်ရောၚ် ဂွံတီကေတ် ဇရေၚ်ဗော်ဍုင်မန်တၟိ ဗ္တိုက်သရိုဟ်တၠအဝဵုပၞာန် NMSP AD ရ။
ပ္ဍဲဂိတုဂျူလာၚ် ၉ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ် နူတမ်ဒပ် ခမရ စၟတ် ၁၀၆ ဖျေံသ္ဇိုၚ်တၟအ်ကၞေၚ် နကဵုဇြဟတ် ၅၀ ပြၚ် ဒပ်ကံၚ်ဇြဳပၞာန် တိတ်ကၠုၚ် သွက်ဂွံကၠောန်သ္ပၚးတးတိဍာ်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ ဂွံပရိုၚ်တုဲ မၚ်ဗ္တိုက်လဝ်ရ။
အပ္ဍဲပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ်ၜါနာဍဳဂှ် လ္ပာ်ကံၚ်ဇြဳပၞာန် ဇီုကပိုက်ချိုတ်အာတံ နွံလဝ်တုဲ လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံ ဇီုကပိုက်ကလိဂွံဝပ် ဟွံမွဲပုဟ်ဂှ် သ္ဂးရ။
အပ္ဍဲပေါဲဗ္တိုက်ဏံဂှ် လ္ပာ်ကံၚ်ဇြဳပၞာန် ကောန်ဒပ် ၅ တၠ ချိုတ်တုဲ ဟွံအောန်နူကဵု ၂ တၠ ကလိဂွံလဝ်ဝပ်ရောၚ် နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ NMSP AD ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်ပေါဲဗ္တိုက်ဒှ်ဒၟံၚ်ဂှ် လ္ပာ်ကံၚ်ဇြဳပၞာန် ထပ်စိုပ်ကၠုၚ် နကဵုဇြဟတ် ဗ္ဒါဲ ၅၀ ဂှ်ရ ဒပ်ပံၚ်ကောံ ဂကောံဇြဟတ်ပၠန်ဂတးတံ ဒးဆုတ်ကလေၚ်လဝ်ရောၚ် ဂွံတီကေတ်ရ။
ပရေၚ်ဗ္တိုက်ဏံဂှ် ဗော်ဍုၚ်မန်တၟိ NMSP AD ကဵု ဒပ်စဵုဒၞါညးဍုၚ်ကွာန်ပွိုၚ်ဍုၚ်ရေဝ် YPDF ( တောၚ်ညို) တံ ပါလုပ်ဗ္တိုက်လဝ်ရ။
အတိုၚ်ဂလာန် ညးဒေသတံဂှ်မ္ဂး အပ္ဍဲပေါဲဗ္တိုက်ၜါလ္ပာ်ဏံ ညးဒေသကွာန်တၟိမွဲတၠ တေက်ဒးမကမ် ဇီုကပိုက်ကလိဂွံလဝ်ဝပ်ရ။
ကြဴနူပေါဲဗ္တိုက်ဂှ်တုဲ ဒပ်ကံၚ်ဇြဳပၞာန် ထပ်ဖျေံလဝ်ဒပ် ပ္ဍဲပွဳပွူဗ္ဒါဲကွာန်တၟိဂှ်တုဲ တ္ၚဲဏံ ဂိတုဂျူလာၚ် ၁၀ စဵုကဵုအခိၚ်လဒေါဝ်တ္ၚဲဂှ် ပေါဲဗ္တိုက်ၜါလ္ပာ် ကလေၚ်က္တဵုဒှ်လဝ် ဟွံမွဲဏီပုဟ်ဂှ် ဂွံတီကေတ်ရ။
ပ္ဍဲပွိုၚ်ုဍုၚ်ရေဝ် လလောၚ်တြးလဝ်ပရေၚ်အုပ်ဓုပ်ပၞာန်ဂှ် လ္ပာ်ကံၚ်ဇြဳပၞာန် ပပဵုပ္တိုန်ဇြဟတ်ဒပ်ကီု၊ ထ္ပက်ကရောၚ်ပၞာန်ကီု၊ ကၟာတ်လဒဵုစၟဳတ် နကဵုဟိုတ်ပရေၚ်ဂီုကၠီုတံဂှ် သၠုၚ်ပ္တိုန်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−NMSP AD