မတ်မလီု၊ ဂျူလာၚ် ၁၁
ပ္ဍဲကဵုတိုက်သြန် အပ္ဍဲတွဵုရးဍုၚ်မန်တံဂှ် ညးပ္တိတ်ကၠုၚ်လှုဲ ဂၠိုၚ်ကၠုၚ်တုဲ အတိုၚ်တိုက်သြန်တံ စၞောန်လဝ်ဂှ်ရ ပ္တိတ်ကဵုဒၟံၚ်လှုဲ နကဵုဗ္ၜတ်ဏောၚ်ဂှ် ညးပ္တိတ်လှုဲတံကဵု တၠကမၠောန်ပရေၚ်ပိုန်ဒြပ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တိုက်သြန်ပုဂ္ဂလိက မၞိဟ်တီဂၠိုၚ် အပ္ဍဲဍုၚ် ၇ ဂှ် လ္ပာ်ကံၚ်ဇြဳပၞာန် ကေတ်အရေဝ်တုဲ ပ္ဍဲကဵုတိုက်သြန်တံဂှ်တှ်ေ ရဲပ္တိတ်ကၠုၚ်လှုဲတံ ဂၠိုၚ်ကၠုၚ်တုဲ ဓဝ်ပတှ်ေလ္တူတိုက်သြန်တံလေဝ် စှ်ေကၠုၚ်တုဲ ညးဟွံကလေၚ်ကၠုၚ်စုတ်လှုဲတံ နွံလဝ်ရ။
ဟိုတ်နူအကာဲအရာလၟုဟ်တံတုဲ ပ္ဍဲကဵုတိုက်သြန်တံဂှ်တှ်ေ သြန်သှ်ေအောန်ကၠုၚ်ကီု၊ ဟိုတ်နူပရေၚ်ဂီုကၠီုတုဲ ပလံၚ်ဗစိုပ်သြန် ကျာတ်ကၠုၚ်ကီု၊ နူကဵုတိုက်သြန် ဂအုပ်ရုၚ်မဆေၚ်စပ်တံဂှ် ပလံၚ်ဗစိုပ်သြန် အောန်ကၠုၚ်တုဲ သွက်ဂွံပ္တိတ်လှုဲဂှ် အခက်အခုဲနွံကၠုၚ်ရ။
ပ္ဍဲကဵုတိုက်သြန်တံဂှ် သြန်သှ်ေအောန်စှ်ေကၠုၚ်တုဲ တန်တဴကဵုသြန်သှ်ေဒၟံၚ်တံဂှ်တုဲ မွဲတၠမ္ဂး ပ္တိတ်ကဵုဒၟံၚ် အကြာ ၅ ကိုဋ် စဵုကဵု ၁၀ ကိုဋ်တုဲ တိုက်သြန်လ္ၚဵုတံဂှ်တှ်ေ အတိုၚ်ဗ္ၜတ်ခုတ်လဝ်ဂှ် ပ္တိတ်ကဵုဒၟံၚ်တံ နွံဒၟံၚ်ရောၚ် ဂၠိုက်ဂၠါဲဂွံတီကေတ် နူကဵုဗွိုၚ်တိုက်သြန်တံရ။
တၠကမၠောန်ပရေၚ်ပိုန်ဒြပ်မွဲတၠဂှ် ပ္ဍဲကဵုတိုက်သြန်တံဂှ် ဒးပ္တိတ်ဒၟံၚ်လှုဲ နကဵုသၞောတ်ဗ္ၜတ်တုဲ ကမၠောန်ဂမၠိုၚ် ဂွံဂေတ်ဂြိပ်ဂှ် အခက်အခုဲနွံကၠုၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒးပ္တိတ်လှုဲကျာတ်ကၠုၚ်။ ပါ်တုဲတှ်ေ ပ္တိတ်ကဵုဒၟံၚ်ကီုလေဝ် လှုဲဏံဂှ် အခက်အခုဲနွံဒၟံၚ်ဏောၚ်။ လ္ၚဵုတံဂှ်တှ်ေ ဂွံမလှုဲမှ ပြေပြံၚ်ဏောၚ်လေဝ်။ ဥပမာ ရာန်မွဲမွဲဂၠံၚ် ဂွံကဵုကဵုဗာန်ဂှ် လ္ၚဵုတံဂှ်တှ်ေ ပြေပြံၚ်တုဲ ဗွဲမဂၠိုၚ်ဂှ်တှ်ေ ကဵုဗာန်ဂှ် ဟွံပြေပြံၚ်အိုတ်ပုဟ်။ ဂွံဒုၚ်တဲ ကဵုဗာန်ဂှ်လေဝ် ဍေံတံဂှ် ဒုၚ်ဒၟံၚ်တဲ ကဵုမလှုဲသၟးရတုဲ အဏံ ၜိုတ်နွံပၟိက် ပ္တိတ်ဟွံဂွံမ္ဂး ဒှ်အခက်အခုဲဏောၚ်။ အာအတိုၚ်ဏံမ္ဂး ဒှ်ဒဒိုက်ဂၠိုၚ်ဏောၚ်။ တၚ်အခက်အခုဲလေဝ် ဂၠိုၚ်ဏောၚ်” သာ်ဝွံ သ္ဂးရ။
တိုက်သြန်အပ္ဍဲဍုၚ် မပ္တံကဵု တိုက်သြန်ယိုဝ်မ၊ တိုက်သြန်ကောန်ဍုၚ်ဗၟာဂမၠိုၚ်၊ တိုက်သြန်ပရေၚ်ဖောအ်ဗြေဝ် ကမၠောန်အဇာဍောတ် ကေုာံ အဇာလဒေါဝ်၊ တိုက်သြန်ယူအေဘဳ တံ မပါလုပ် တိုက်သြန် ၇ ဂှ် နကဵုတၚ်စောဲစပ် ပ္တိတ်လဝ်ကဵုသြန်ဂလေံ သွက်သ္ၚိကၠအ် လောန်ၜက်နူကဵုဗ္ၜတ် တိုက်သြန်ဗဟဵု စၞောန်လဝ်ဂှ်တုဲ ကံၚ်ဇြဳပၞာန် ကေတ်လဝ်အရေဝ် ပ္ဍဲဂိတုဂျူလာၚ် ၁ တေံရ။
ကြဴနူကံၚ်ဇြဳပၞာန် ကေတ်အရေဝ် တပ်ဒဏ် လ္တူတိုက်သြန် ၇ ဂှ်တုဲ အပ္ဍဲဍုၚ် ပ္တိတ်ကၠုၚ်လှုဲတံ ဂၠိုၚ်ကၠုၚ်တုဲ တိုက်သြန်ဂမၠိုၚ် ဂွံဆက်ဂေတ်ဂြိပ်ဂှ် ဒှ်ဒၟံၚ်ဒဒိုက်ယျဂှ် ဂွံတီကေတ် နူကဵုဗွိုၚ်တိုက်သြန်ဂမၠိုၚ်ရ။
ညးယိုက်ဝန် တိုက်သြန်ပူဂဵုမွဲတၠဂှ် ပ္ဍဲတိုက်သြန် မလှုဲအောန်ကၠုၚ်တုဲ သြန်သှ်ေဒၟံၚ်တံဂှ် ဒးပ္တိတ်ကဵုဒၟံၚ် နကဵုသၞောတ်ဗ္ၜတ်ရဂှ် ဟီုလဝ်ရ။
“ပ္ဍဲကဵုဗာန်ဂှ်တှ်ေ လှုဲဟွံမွဲတုဲ ၜိုတ်နွံဂှ် ပ္တိတ်ကဵုဒၟံၚ်။ မလှုဲအောန်စှ်ေအာတုဲ မွဲတၠတှ်ေ ပါ်ကဵုဒၟံၚ် အကြာ ၅ ကိုဋ် စဵုကဵု ၁၀ ကိုဋ်ရ။ မလှုဲဂၠိုၚ်တှ်ေ ၜိုတ်နွံဂှ် ၁၀၀ ဒှ်ဒှ် ၂၀၀ ဒှ်ဒှ် ပ္တိတ်ကဵုမွဲတဲဓဝ်ရ။ အခိၚ်မလှုဲဂၠိုၚ်တှ်ေ ကလေၚ်ဂွံဏောၚ်။ နွံတှ်ေ ၜိုတ်နွံဂှ် ပ္တိတ်ကဵုဒၟံၚ်ရ။ ပ္ဍဲကဵုပိုယ်တံ အောန်ဒၟံၚ်ဟီုတှ်ေ သီုညးဖအိုတ် ဂွံပ္တိတ်ဂွံဂးတုဲ ခုတ်လဝ်ရ” သာ်ဝွံ သ္ဂးရ။
ပ္ဍဲကဵုတိုက်သြန်ဂမၠိုၚ် ဟိုတ်နူအသိၚ်အလိုန်မလှုဲအောန်တုဲ ပ္ဍဲဂိတုဂျူလာၚ် ၁၀ ဂှ် ကံၚ်ဇြဳပၞာန် ကော်လဝ် နာယက ကေုာံ ဥက္ကဌ တိုက်သြန်ဂမၠိုၚ် သွက်ဂွံတိုန်စိုပ် ပ္ဍဲနေဗျဳဒဝ်ဂှ်တုဲ သဳကၠဳအာ ကမၠောန်စပ်ကဵုတိုက်သြန်တံဏောၚ်ဂးတုဲ ကော်ဘိက်လဝ်သ္ၚိတ်တ်ရ။
တၠပညာပရေၚ်ပိုန်ဒြပ်တံဂှ်တှ်ေ ဖဵုအဆက်လက္ကရဴ ကံၚ်ဇြဳပၞာန် ကေတ်အရေဝ် လ္တူတိုက်သြန်ဂှ် ညးဍုၚ်ကွာန်ဂမၠိုၚ် ပ္တိတ်ကၠုၚ်မလှုဲ နလၟိဟ်ဗွဲမဂၠိုၚ်ဂၠေၚ်တံ နွံကၠုၚ်မ္ဂး တိုက်သြန်ဂမၠိုၚ် သရိုဟ်စှ်ေအာမာန်ရောၚ် ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−TLT