ဗေကျေန်၊ ဂျူလာၚ် ၁၀
သွက်ဂွံပလံၚ်ဖျဴညးဒဒိုက် ရိုဝ်ဟေန်ဂျာ ဂြိပ်တိတ်ကၠုၚ်လဝ် နူဍုၚ်ဗၟာတံဂှ် သွက်ဂွံပါလုပ်ရီုဗၚ်ကဵုဂှ် သ္ကိုပ်ဝန်ဇၞော် ဗေန်ဂလာန်ဒေတ် ယှုက် ဟာသဳနာ ဖ္တိုက်ဖ္အောဝ်လဝ် ကြုက် ပ္ဍဲဂိတုဂျူလာၚ် ၁၀ တေံရ။
ပ္ဍဲလၟေၚ်တရဴဍုၚ်ကြုက် တ္ၚဲဒုတိယဂှ် သ္ကိုပ်ဝန်ဇၞော် ဟာသဳနာ ဒဒှ်ရဟီုလဝ် သွက်ကဵုရီုဗၚ်ကဵု ပ္ဍဲပရေၚ်ပလံၚ်ဖျဴ ရိုဝ်ဟေန်ဂျာတံ ဍုၚ်ဗၟာဂှ် ဝန်ဇၞော်ကာဍုၚ်သ္အာၚ် ဗေန်ဂလာန်ဒေတ် ဒံက်တာ ဟာသာန် မာမွတ် ဟီုလဝ် ပ္ဍဲပေါဲသောၚ်ကလးလိက်ပရိုၚ်ရ။
သ္ကိုပ်ဝန်ဇၞော် ဗေန်ဂလာန်ဒေတ်ဂှ်တှ်ေ အခိၚ်ဆဵုဂဗကဵု ကမ္မတဳကဵုကသပ်ပရေၚ်ဍုၚ်ကွာန် ဍုၚ်ကြုက် မဒှ်ဂကောံပၟိက်ဇၞော် ပ္ဍဲဗော်ကောန်မျူနေတ် ကြုက်ဂှ် အာတ်မိက်လဝ် သာ်ဏံရ။
အပ္ဍဲပရေၚ်ဆဵုဂဗ ၜါလ္ပာ်ဂှ် သဳကၠဳလဝ် သီုပြသၞာရိုဝ်ဟေန်ဂျာ သီုကိစ္စစပ်ကဵုဒေသ ကေုာံ စပ်ကဵုၜါဍုၚ်တံဂှ်တုဲ သွက်ဂွံဖအောန်ဖျေံ ပရေၚ်သွံရာန်ဗၞိက် အကြာဗေန်ဂလာန်ဒေတ်ကဵု ကြုက် အရာမတၞဟ်ခြာဒၟံၚ်ဂှ်ဂှ် ပ္ညဳပ္ညပ်လဝ်ရောၚ် ဂွံတီကေတ်ရ။
ဗေန်ဂလာန်ဒေတ် ဒးဒုၚ်လဝ်တဲ ရိုဝ်ဟေန်ဂျာ လအ်အာတြဴသၞာံဘာ်ယျကီုလေဝ် သွက်ဂွံကလေၚ်ပလံၚ်ဖျဴညးတံ ဍုၚ်ဗၟာဂှ် မုအစဳဇန်မွဲမှ ဟွံဂွံကၠောန်ဏီပုဟ်ဂှ် သ္ကိုပ်ဝန်ဇၞော် ဟာသဳနာ ဟီုလဝ်ရ။
သွက်ဂွံကလေၚ်ပလံၚ်ဖျဴ ရိုဝ်ဟေန်ဂျာတံဂှ် သဳကၠဳအာကဵု ဍုၚ်ဗၟာဏောၚ် ကြုက် ဟီုလဝ်တုဲ လုပ်ပ္ညဳပ္ညပ်ကဵုအာအကြာ ဗေန်ဂလာန်ဒေတ်ကဵု ဍုၚ်ဗၟာဏောၚ်ဂှ် သ္ဂးရ။
သဳကၠဳကဵု ဍုၚ်ဗၟာတုဲမ္ဂး သွက်ဂွံကလေၚ်ပလံၚ်ဖျဴ ရိုဝ်ဟေန်ဂျာတံဂှ် ညးတံ ပ္တိတ်အာဇြဟတ် ဗွဲမသၟဟ်အစောံဏောၚ်ဂှ် ဇၞော်သ္ကိုပ်ကမ္မတဳကြုက် ဝန်ဟာန်နေန် ဟီုရ။
ဗေန်ဂလာန်ဒေတ် ပ္တိတ်ဒၟံၚ်ဇြဟတ် သွက်ဂွံကလေၚ်ပလံၚ်ဖျဴ ရိုဝ်ဟေန်ဂျာတံဂှ်ကီုလေဝ် လ္ဂောံကဵုအကာဲအရာဍုၚ်ဗၟာ ပြဟ်ဟ်ဏံဂှ်မ္ဂး ဂွံပလံၚ်ဖျဴ ဒှ်ဟွံမာန် ဒှ်ဒၟံၚ်ရ။
တုဲကၠုၚ်ခြာဟွံလအ် ဟိုတ်နူမကမ်လ္ပာ်ဍုၚ်ဗၟာ ပန်ပှော်နၚ်တံဂှ်တုဲ ရိုဝ်ဟေန်ဂျာ ပၠိုၚ်ၚ်မွဲတၠ လ္ပာ်ဗေန်ဂလာန်ဒေတ်ဂှ် ဒးချိုတ်အာလဝ်ရ။
ကံၚ်ဇြဳပၞာန်ဂှ် ကော်ပ္ကောံဒၟံၚ် ရိုဝ်ဟေန်ဂျာတံ နဒဒှ်ကောန်ပၞာန်တုဲ ကုဂကောံရပ်လွဟ် ရိုဝ်ဟေန်ဂျာတံဂှ်လေဝ် ထံက်ပၚ်ကဵုလဝ် လွဟ်လက်နက်တံရောၚ် ထ္မံက်ထ္ၜးလဝ် ပ္ဍဲပရိုၚ်ဗေန်ဂလာန်ဒေတ်ဂမၠိုၚ်ရ။
Ref: BSS