ဗြဝတဳ၊ ဂျူလာၚ် ၁၂
ရုၚ်ဝိုၚ်ဝေၚ်နွံဒၟံၚ် လ္တူဍုၚ်ဗြဝတဳ တွဵုရးကရေၚ် မဒှ်ဍုၚ်ပယျဵုသေံ−ဗၟာ သီုဖအိုတ်ဂှ် သွက်ဂွံကၟာတ်ဂှ် ဂကောံရပ်လွဟ်ကရေၚ်ဒေါအ်ပန်ပှော်ၜါဂကောံ KNU/KNLA PC ကေုာံ DKBA တံ လလောၚ်ပ္တိတ်လဝ် တၚ်လလောၚ်ပၟိၚ် နကဵုစၟတ်တ္ၚဲ ဂိတုဂျူလာၚ် ၁၀ တေံရ။
သွက်ဂွံကၟာတ်ဆေၚ် ဝိုၚ်ဝေၚ် နွံလ္တူဍုၚ်ဗြဝတဳတံဂှ်ကီု၊ နကဵုကောန်ဒပ်ဂမၠိုၚ်လေဝ် ညံၚ်ဟွံဂွံကၠောန်ၜိုတ် ပ္ဍဲကမၠောန်ဂဥုဲၜူမာဲကဵု ကမၠောန်ဝိုၚ်ဝေၚ်တံဂှ် တာဒၞါလဝ်ဂှ်ရ ဟွံကလၚ်အမိၚ်မွဲသာ် ဖံက်ပလီုကၠေံမ္ဂး ကေတ်အာရေဝ် ဗွဲမစိုပ်တရဴဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
လ္တူဍုၚ်ဗြဝတဳ ဒပ် KNU/KNLA PC ၊ BGF ၊ DKBA တံ အာကၠုၚ်ချဳဒရာၚ်ဒၟံၚ်ဂှ် ဂဥုဲၜူမာဲကဵု ကမၠောန်ဝိုၚ်ဝေၚ်တံ နွံဒၟံၚ် ဗွဲမဂၠိုၚ်ဂၠေၚ်တုဲ ကမၠောန်ဂဥုဲၜူမာဲတံဏံကဵု ကမၠောန်ဝိုၚ်ဝေၚ်တံဂှ် ဒပ်ရပ်လွဟ်တံကဵု ညးမစုက်လုက်ဂမၠိုၚ် လုပ်စိုပ်ကၠောန်လဝ်အလဵုညးတံတုဲ ရုၚ်ဝိုၚ်ဝေၚ်တံဂှ်လေဝ် ဒပ်ရပ်လွဟ်တံရ ကဵုလဝ်ဂီုကၠီုတုဲ မၚ်ဒၟံၚ်ဂှ် ညးဒေသတံ ဟီုရ။
ဒပ် KNU/KNLA PC ၊ DKBA တံ အလဵုညးတံ လလောၚ်ပ္တိတ်ကၠုၚ်တၚ်လလောၚ်တြး သွက်ဂွံကၟာတ် ရုၚ်ဝိုၚ်ဝေၚ်တံဏံကဵု တာဒၞါကၠုၚ် ကောန်ဒပ်တံ ညံၚ်ဟွံဂွံကၠောန်သ္ပ ပ္ဍဲကိစ္စဂဥုဲၜူမာဲ၊ ဝိုၚ်ဝေၚ်တံဂှ်ဝွံ ဒှ်ဒၟံၚ်သ္ဇက်ဒးဂြိုၚ်ရဂှ် ညးဒေသတံ ပါ်ပါဲလဝ်ရ။
ဒပ် KNU/KNLA PC ကေုာံ ဒပ် DKBA တံ ကြဴနူလလောၚ်ပ္တိတ် သွက်ဂွံကၟာတ် ရုၚ်ဝိုၚ်ဝေၚ်တံတုဲဂှ် လုပ်စိုပ်ရပ်ဒက်လဝ် ရုၚ်ဝိုၚ်ဝေၚ် နွံလ္တူဍုၚ်လ္ၚဵုတံဂှ်တုဲ နူကဵုဆေၚ်ဝိုၚ်ဝေၚ်တံဂှ် သီဂွံလဝ် ဂဥုဲၜူမာဲ ဗွဲမဂၠိုၚ်ဂၠေၚ်တုဲ ဆေၚ်ဝိုၚ်ဝေၚ်လ္ၚဵုတံလေဝ် ကၟာတ်သီလဝ်တံ နွံလဝ်ရောၚ် ဂွံတီကေတ် ဇရေၚ်ညးဒေသတံရ။
ကံၚ်ဇြဳပရေၚ်ၜိုဟ်လလမ်ကရေၚ် KNU/KNLA PC ကဵု ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် DKBA တံဝွံ ဒှ်ဂကောံရပ်လွဟ် ထ္ပက်လဝ်စၟတ်တဲ ပ္ဍဲလိက်ကသုက် ဒေါအ်ပန်ပှော် NCA တုဲ အပ္ဍဲကာလသီအဝဵုဏံ တိုန်စိုပ်သဳကၠဳဒၟံၚ် ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် ကော်ဘိက်တံဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ