ကအ်ကြိက်၊ ဂျူလာၚ် ၁၁
တွဵုရးကရေၚ် ဍုၚ်ကအ်ကြိက် သ္ကုတ်သၟဝ်ကျာဂှ် အကြာဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်တံ ဆက်က္တဵုဒှ်ဒၟံၚ်ရောၚ် ဂွံတီကေတ် ဇရေၚ်တမ်ရိုဟ်ပရိုၚ်ဗလးတိတံရ။
ပေါဲဗ္တိုက်တံဏံဝွံ စနူဂိတုဂျူလာၚ် ၁၁ အခိၚ်နူဂယးဂှ်တုဲ ဆက်က္တဵုဒှ်ဒၟံၚ် ပ္ဍဲဂကောံကွာန်မျပတိုၚ် သ္ကုတ်သၟဝ်ကျာဍုၚ်ကအ်ကြိက်ဂှ်တုဲ အကာဲအရာၜါလ္ပာ်ဇီုကပိုက်ချိုတ်တံဂှ် ဟွံဂွံတီကေတ် ဗွဲလစှ်ေဏီကီုလေဝ် လ္ပာ်ကံၚ်ဇြဳပၞာန်ဂှ် ထပ်ဗပေၚ်ဒၟံၚ်ဇြဟတ်ရ။
ဟိုတ်နူပေါဲဗ္တိုက်တုဲ အပ္ဍဲကွာန်မျပတိုၚ် မကမ်လွဟ်ဇၞော်တံ ဒတုံဗ္တိုဟ်ထ္ကးအာလဝ်တုဲ ကောန်ကွာန်ဒေသ ဗွဲမဂၠိုၚ်ဂၠေၚ် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်ဂလာန် ကောန်ကွာန်မျပတိုၚ်တံရ။
ဒပ်ကံၚ်ဇြဳပၞာန်ဝွံ အခိၚ်လၟုဟ် ဖျေံလဝ်ဒပ် အပ္ဍဲဘာဂြိုပ် ကွာန်မျပတိုၚ်တုဲ နူတမ်ဒပ် ခမရ ၅၄၇၊ ၅၄၈၊ ၅၄၉ ဖျေံသ္ဇိုၚ်ဍုၚ်ကြုၚ်ဒဵုကဵု နဘူဂှ် ပလံၚ်ဗစိုပ်ဒၟံၚ် ဇြဟတ်ပၞာန်အရီုတံဂှ်တုဲ အပံၚ်ဖအိုတ် ၂၀၀ နွံရောၚ် ဂွံတီကေတ် ဇရေၚ်တမ်ရိုဟ်ပရိုၚ်ဗလးတိတံရ။
သ္အာၚ်နူဂှ်ပၠန် လွဟ်ဇၞော်ဒပ်ကံၚ်ဇြဳပၞာန်တံ မပါလုပ် ဟိုတ်နူထောံမခတိုဟ် ကေုာံ ဗ္တိုက်ကဵုဒရုၚ်ဂှ်တုဲ အပ္ဍဲအကြာတ္ၚဲတံဏံ ညးဍုၚ်ကွာန်ကောန်အရာပ် ဒၟံၚ်ဒေသသ္ကုတ်သၠုၚ်ကျာ ပွိုၚ်ဍုၚ်ကအ်ကြိက်တံ ဇီုကပိုက်ကလိဂွံလဝ်ဝပ်ရ။
အပ္ဍဲအကြာတ္ၚဲတံဏံ ကရောၚ်ပၞာန်ဒပ်ကံၚ်ဇြဳပၞာန် ချဳဒရာၚ်ဒၟံၚ်ပရေၚ်ပၞာန် ပ္ဍဲကွာန် သ္ကုတ်သၟဝ်ကျာဍုၚ်ကအ်ကြိက်ကဵု လ္ပာ်ဂၠံၚ်အာယှတြေံတံဂှ်ကဵု အကြာဒပ်ပံၚ်ကောံ KNLA တံဂှ် ပဋိပက္ခပရေၚ်ပၞာန် ဆက်ကြံၚ်မ္ၚိုဟ်ဒၟံၚ်ရ။
စနူဂိတုဨပရဴတုဲကၠုၚ်တေံတုဲ ကရောၚ်ပၞာန်ဒပ်ကံၚ်ဇြဳပၞာန် နူပရေၚ်ပၞာန်အံၚ်ဇေယျ ကဆံၚ်ကၟိန်ဍုၚ်ဂှ်ဝွံ ချဳဒရာၚ်ကၠုၚ်ပရေၚ်ပၞာန် လ္ပာ်ဒေသကအ်ကြိက် သ္ကုတ်သၟဝ်ကျာ၊ ဂၠံၚ်ဒဵုဒဝ်နတြေံကဵု ပ္ဍဲဂၠံၚ်ဇၞော်အာယှတံဂှ်တုဲ က္တဵုဒှ်လဝ်ပေါဲဗ္တိုက် ကုဒပ်ပံၚ်ကောံ KNLA တံ ဗွဲမသ္ကာတ်မြဟ်ရ။
ကရောၚ်ပၞာန်အံၚ်ဇေယျဝွံ စဵုကဵုလအ်ကၠုၚ်ပိဂိတုဂှ် စိုပ်ဂွံၜိုတ်လ္တူဍာ်လဂေါဝ်တဝ်နဝ် ဂၠံၚ်ဇၞော်အာယှ ဗြဝတဳ−ကအ်ကြိက်ဂှ်ကဵု ပ္ဍဲကဵုကွာန် သ္ကုတ်သၟဝ်ကျာကအ်ကြိက်တံဂှ်တုဲ တက်ပ္ကဝ်အာ ပရေၚ်ပၞာန်အံၚ်ဇေယျ ကံၚ်ဇြဳပၞာန်ဏံ ဗွဲသၟဟ်အစောံဏောၚ်ဂှ် ဌာန်ဂအုပ်ပၞာန် KNLA လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ