မတ်မလီု၊ ဂျူလာၚ် ၁၂
ဗၞိက်တိတ်နူဒေသ တိတ်နူတွဵုရးဍုၚ်မန်တံဂှ် သွက်ဂွံပလံၚ်ပ္တိုန် အပ္ဍဲဍုၚ်၊ မ္ၚးဍုၚ်တံကဵု သွက်ဍာ်ဒကေဝ်ဗၞိက်ပ္တိတ်တံ ဂွံသၠုၚ်ကၠုၚ်ဂှ် ကၠောန်အာရုၚ်စက်တံကဵု ဒေသကွက်စက်တံဏောၚ်ဂှ် ကံၚ်ဇြဳပၞာန် ဟီုကြီုလဝ်ရ။
သွက်ဂွံကၠောန်ဗဒှ် ဒၞါဲကွတ်စက်တံဂှ် တုဲကၠုၚ်ဂိတုဂျူလာၚ် ၁၀ တေံ ပ္ဍဲရုၚ်အလဵုအသဳတွဵုရး နွံဍုၚ်မတ်မလီုဂှ် သ္ကိုပ်ဝန်ဇၞော်တွဵုရး ဥူအံၚ်ကျဳတုၚ် ကံၚ်ဇြဳပၞာန်ခါန်ကၞက်လဝ်ဂှ် သ္ကိုပ်သ္ကတုဲ ကော်ကၠောန်ဗဒှ်လဝ် ကမ္မတဳကောပ်ကာဲထ္မံက်ရုပ်ရဴ ဒေသအပိုၚ်အခြာကွတ်စက်ရ။
ပ္ဍဲကောံဓရီုဏံဂှ် သွက်ဂွံပလံၚ်ပ္တိုန် ဗၞိက်တိတ်နူဒေသတံ အပ္ဍဲဍုၚ်၊ မ္ၚးဍုၚ်တံဂှ်ကီု ဍာ်ဒကေဝ်ဗၞိက်ပ္တိတ်တံ သၠုၚ်တိုန်ကၠုၚ်မ္ဂး ဂွံကၠုၚ်ဗွဝ်ဖျာဂၠိုၚ်ကၠုၚ်ဏောၚ်တုဲ သွက်ကမၠောန်ပရေၚ်ပိုန်ဒြပ် ဂွံတန်တဴအာဍာ်ဇမၠိၚ် ဂွံဒှ်ကၠုၚ်ဂှ် ကၠောန်ၜိုတ်ဒၟံၚ်ရောၚ် ဟီုလဝ်ရ။
သ္အာၚ်နူဂှ်ပၠန် ဒုၚ်သ္ဇိုၚ်ကဵုဗၞိက်အပြောံတိတ်နူဒေသ အပ္ဍဲတွဵုရးတံဂှ်တုဲ ဗၞိက်ပ္တိတ်ၚုဟ်မးသၠုၚ်ၚ်တံဂှ် ကၠောန်ပ္တိတ်အာ နဒဒှ်ပရေၚ်ပိုန်ဒြပ်တုဲ ဗၞိက်ထ္ပက်အဇာဗၞိက်ပၠောပ်တံဂှ် သွက်ဂွံသၠုၚ်ပ္တိုန်ကၠောန်ပ္တိတ်ကၠုၚ်မာန်ဂှ် ပ္တဝ်က္ဍိုပ်ရေၚ်တၠုၚ်ဒၟံၚ်ရောၚ် သ္ဂးရ။
တၠကမၠောန်ပရေၚ်ပိုန်ဒြပ် အပ္ဍဲဒေသမွဲတၠဂှ် ပၟတ်ဓာတ်လလဳရဂှ် ညံၚ်ဂွံမှာန် အခိၚ်ကဵုဟွံမာန်ဒၟံၚ်ဂှ် ကၠောန်အာဒၞါဲဒေသအပိုၚ်အခြာကွတ်စက်တံဏောၚ် ဟီုလဝ်ဂှ်ဝွံ ဒှ်ဒၟံၚ်ၜိုတ်ကလၚ်ဂွံရတုဲ ဒှ်ကၠုၚ်ဟွံမာန်ပုဟ်ဂှ် ပါ်ပါဲလဝ်ရ။
“အခိၚ်လၟုဟ်ဂှ်တှ်ေ ဟွံလောဲပုဟ်။ ကၠောန်ဗဒှ်အပိုၚ်အခြာဒေသကွတ်စက်ဟီုဂှ် ၜိုတ်ကဆံၚ် ပ္တိတ်ဂအာၚ်ရ ကၠောန်ဂွံဏောၚ်။ ကမၠောန်ကွတ်စက်ဂွံဂေတ်ဂြိပ်ဂှ်တှ်ေ စမြိုၚ်သ္ဇိုၚ်ဍေံ နွံပၟိက်တၟာဂလိုၚ်ဏောၚ်။ ပြဟ်ဟ်ဏံ ဒးဟီု မကြပ်အိုတ်ဂှ်မ္ဂး အခိၚ်ဏံ ပၟတ်ဓာတ်လလဳသ္ဇိုၚ်တံရဂှ် ဟွံမှာန်ပုဟ်ဟီုတှ်ေ ညအ်ဂှ် ဒှ်ဒၟံၚ်ကဆံၚ် ဟီုဒၟံၚ်ၜိုတ်ကလၚ်ဂွံရဏောၚ်” သာ်ဝွံ သ္ဂးရ။
လ္ပာ်ကံၚ်ဇြဳပၞာန် သွက်ဂွံကၠောန်ဒေသကွတ်စက်တံဂှ် ဟီုဒၟံၚ်ကီုလေဝ် ဒေသကွတ်စက်နွံဒၟံၚ်အပ္ဍဲဍုၚ်တံရဂှ် ဂေတ်ဂြိပ်မှာန်န်ဟွံမာန်ရတုဲ ဒှ်ဒၟံၚ်ၜိုတ်ကဆံၚ်လိၚ်စ ဂိုဝ်ဒံၚ်ရဂှ် တၠကမၠောန်ပရေၚ်ပိုန်ဒြပ်ဂမၠိုၚ် ထံက်ထ္ၜးလဝ်အိုတ်ရ။
အပ္ဍဲတွဵုရးဂှ် ပ္ဍဲလက်ထက်အလဵုအသဳတုဲကၠုၚ်တေံ ကၠောန်ဗဒှ်လဝ် ဒေသကွတ်စက်မတ်မလီုကဵု ကျံက်တာန်ကီုလေဝ် ဟွံအံၚ်ဇၞးလဝ်တုဲ ဗွဲကြဴဏံ ဒၞါဲကွတ်စက်တံဏံဝွံ ဒှ်ကၠုၚ်လဝ် စဵုကဵုဒးကၟာတ်ထောံရ။
တၠကမၠောန်ဗၞိက်ပ္တိတ်မွဲတၠဂှ်လေဝ် လ္ပာ်ကံၚ်ဇြဳပၞာန် သွက်ဂွံထ္မံက်ရုပ်ရဴ ဒေသကွတ်စက်တံဂှ် ဟီုဂးဒၟံၚ်ကီုလေဝ် ဒေသကွတ်စက်ကၠောန်လဝ်ကၠာတေံရဂှ် ရုပ်ရဴဟွံမံက်ဏီတုဲ ဂွံကၠောန်ပ္တိတ် ဗၞိက်ပ္တိတ်ကဆံၚ်သၠုၚ်တံဟီုဂှ်လေဝ် လ္ဂောံကဵုအကာဲအရာလၟုဟ်တှ်ေ ဂွံဓလိုက်တမ်ရိုဟ် ဒှ်ဟွံမာန်ပုဟ်ဂှ် ဟီုရ။
“ဗ္ဒါဲမုဟ်ဍုၚ်ဂှ်တှ်ေ ဍေံတံ ကၠောန်လဝ်ဒၞါဲဒေသကွတ်စက် ၃၆၄ ဨကရ၊ နူလက်ထက်အလဵုအသဳ NLD တေံရ ရုၚ်စက်ဇၞော်ဇၞော်တံဂှ် မူစိဨက ၜိုတ်မူစိ ခုတ်ပ္တန်ဒၟံၚ်တုဲ ကၠောန်ဒၟံၚ်ရ။ ဒဵုကဵုအခိၚ်လၟုဟ်လေဝ် ရုပ်ရဴဟွံမံက်ဏီပုဟ်။ ရဝ်ဗာ စုက်အိုတ်ကဵုပိုယ်ဂှ်တှ်ေ ဗၞိက်ပ္တိတ်ကဆံၚ်သၠုၚ်တှ်ေ ဟွံလောဲကွေံပုဟ်။ တာယာ ကဆံၚ်သၠုၚ်ၚ်ဟီုဂှ် အတိုၚ်အကာဲအရာလၟုဟ်ဟီုတှ်ေ ဂွံဓလိုက်တမ်ရိုဟ်ဂှ် ဟွံလောဲဏီပုဟ်။ ဓလိုက်လဝ်သြန် ဗွဲမဂၠိုၚ်ဂၠေၚ်တုဲမှ ဂတမွဲဗီု လက္ကရဴမွဲဗီု ဒှ်ကၠုၚ်တှ်ေ ညအ်ဂှ် ရံၚ်ကဵုလ္ပာ်ပရေၚ်ပိုန်ဒြပ်တှ်ေ ဂွံအံၚ်ဇၞးဂှ် ဒှ်ဟွံမာန်ပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ကၠောန်ဗဒှ်ဒေသကွတ်စက်တံဂှ်တုဲ ဂွံကၠောန်ပ္တိတ် ဗၞိက်ပ္တိတ်ကဆံၚ်သၠုၚ်တံဂှ်ဟီုတှ်ေ ပရေၚ်ဓလိုက်တမ်ရိုဟ်တံဂှ်ဟေၚ် ဒှ်အဓိကတုဲ အတိုၚ်အကာဲအရာ ပရေၚ်ဂီုကၠီု ကေုာံ ပရေၚ်ဍုၚ်ကွာန်လၟုဟ်တှ်ေ ပရေၚ်ဓလိုက်တမ်ရိုဟ်ဍုၚ်သ္အာၚ်တံ ဂွံလုပ်စိုပ်မာန် ဟွံမွဲပုဟ်ဂှ် ညးဆက်ဟီုရ။
ကၠောန်ဗဒှ်အာ ဒေသကွတ်စက်တံဏောၚ် လ္ပာ်ကံၚ်ဇြဳပၞာန် ဟီုဂးဒၟံၚ်ကီုလေဝ် အပ္ဍဲကာလသီအဝဵုဏံ ပရေၚ်ဓလိုက်တမ်ရိုဟ်ဍုၚ်သ္အာၚ် နူဒေသကွတ်စက်တံ တိတ်အာဂှ်ကီု၊ ဂွံကၠုၚ်ပၟတ်ဓာတ်လလဳ အောန်ကၠုၚ်တုဲ ကမၠောန်ဂမၠိုၚ် ဂေတ်ဂြိပ်လၟေၚ်ၚ်ဟွံမာန်ကီု၊ ကပေါတ်ဗၞိက်အပြောံတံ ၚုဟ်တိုန်ကၠုၚ် ကဵုဆဂှ်ရ ကမၠောန်ဂမၠိုၚ် ဂွံဂေတ်ဂြိပ်ဂှ် ဒှ်ဒၟံၚ်အခက်အခုဲရ။
အလုံဍုၚ်မွဲ ဒေသကွတ်စက် ဟွံအောန်နူကဵု ၆၀ နွံဒၟံၚ်တုဲ ဒၞါဲကွတ်စက်တံဏံဝွံ အပ္ဍဲကာလသီအဝဵုဏံ ကမၠောန်ဂမၠိုၚ် ဂွံဂေတ်ဂြိပ်မာန်ဂှ်ကီု ဂွံဆက်ဒတူလိုၚ်အာကီုဂှ် ဒးရုန်ဂ္စါန်ဒၟံၚ်တၟာလှ်ေရ။
ပရိုၚ်−သြၚ်လောန်တိုၚ်(မ်)
ဗီု−MOI