ကအ်ကြိတ် ၊ ဂျူလာၚ် ၁၃
ကရောၚ်ပၞာန်အံၚ်ဇေယျကံင်ဇြဳပၞာန် ကဆံၚ်ကၟိန်ဍုၚ်ဂှ် ဟိုတ်နူပန်ဖျေံ ကမ်လှောဝ်အဆက်က်တုဲ ညးဒေသ (၃) တၠ သီုကောန်ၚာ် (၂) တၠ ဒးအာလဝ်ဝပ်နွံတုဲ သ္ၚိ (၁၂) မ မဒးလီုလာ်အာနွံရောၚ် နူကဵု KNU ဗဟဵု ပ္ဍဲစၟတ်တ္ၚဲ ဂျူလာၚ် (၁၂) ဂှ် လလောၚ်ပ္တိတ်လဝ်နွံရ။
ကရောၚ်ပၞာန်အံၚ်ဇေယျဝွံ ပ္ဍဲစၟတ်တ္ၚဲ ဂျူလာၚ် (၉) တုဲကၠုၚ်တေံလေဝ် ပေါဲဗတိုက်ဟွံဒှ်မွဲသာ် ပန်ဖျေံမံၚ်လွဟ်ကြာန်ကြာန် ဗၞတ် (၁၀) မ ပြၚ် ပ္ဍဲပွိုၚ်ဍုၚ်ကအ်ကြိတ် ကွာန်ထဳမူထ မနွံသၟဝ်တိဍာ် KNU ပိုၚ်ပြဳလဝ်ဂှ်ရ။
ဟိုတ်နူ ကမ်လှောဝ် ဒတုံဗ္တိုဟ်ထ္ကးအာတုဲ ကောန်ၚာ်အယုက် (၅) သၞာံမွဲတၠ အယုက် (၁၁) သၞာံမွဲတၠ ကဵု မၞိဟ်တြုံ အယုက် (၅၅)သၞာံမွဲတၠ ဒၟံၚ်ကွာန်ထဳမူထတံ ဇီုကပိုက်ဒးအာလဝ်ဝပ်ရ။
သအာၚ်နူဂှ်ပၠန် ပ္ဍဲကွာန်ထဳမူထဂှ် သ္ၚိညးဒေသ (၁၂) မ ကွဳစက် ၂ ဖ္ဍိုက် ကဵု ကပေါက်ရပ်စပ်သ္ၚိတအ်ဂှ်လေဝ် ဒးလီုလာ်အာလဝ်နွံရောၚ် ထ္မံက်ထၜးလဝ် ပ္ဍဲတၚ်လလောၚ်တြး KNU ဗဟဵု ရ။
ဒပ်ကံၚ်ဇြဳပၞာန်ဝွံ သွက်ဂွံကလေၚ်ထိၚ် ဒေသတေန်ဂါန်ညဳနံၚ် ပွိုၚ်ဍုၚ်ဗြဝတဳမာန်ဂှ် စနူဂိတုဨပရဴတုဲကၠုၚ်တေံတုဲ ထ္ပက်ပၞာန်ဗ္တိုက်ကၠုၚ် နကဵုကရောၚ်ပၞာန်အံၚ်ဇေယျ ကဆံၚ်ကၟိန်ဍုၚ်ရ။
ဆဂး ကရောၚ်ပၞာန်အံၚ်ဇေယျဝွံ ဟိုတ်နူ ဒပ်ပံၚ်ကောံ KNLA တအ် ကၟာတ်လဒဵုဗ္တိုက်လဝ်တုဲ ပ္ဍဲဒေသတေန်ဂါန်ညဳနံၚ်ဂှ် လအ်အာပွိုၚ် (၃) ဂိတုကီုလေဝ် ထ္ပက်ဟွံမာန်တုဲ ဆက်နွံဒၟံၚ် ပ္ဍဲဂၠံၚ်ဇၞော်အာရှ ဗြဝတဳ- ကအ်ကြိတ် လ္တူဗဒါဲဍာ်လ္ဂေါဝ်တဝ်နဝ်ကဵု လ္ပါ်ကွာန် သ္ကုတ်သၟဝ်ကျာကအ်ကြိက်တံဂှ်ရ။
ကရောၚ်ပၞာန်အံၚ်ဇေယျ ကံၚ်ဇြဳပၞာန်ဂှ် ဗ္တိုက်သရိုဟ်အာ ဗွဲမသၟဟ်အစောံဏောၚ်တုဲ နကဵုကောန်ပၞာန်ညးမပါလုပ်မံၚ် ပ္ဍဲကရောၚ်ပၞာန်ဏံဂမၠိုၚ် သွက်ဂွံလုပ်စိုပ်ဖျေံလွဟ် ဇရေၚ် KNU ဂှ် ဌာန်ဂအုပ်ဒပ်ပၞာန်ဗၠးၜးကောန်ဂကူကရေၚ် KNLA လလောၚ်ပ္တိတ်ကဵုလဝ်သတိ ပ္ဍဲဂိတုဂျူလာၚ် ၅ တေံရ။
ပရိုၚ်−သြၚ်လောန်တိုၚ်(မ်)
ဗီု−KNU