နျူယျံက်၊ ဂျူလာၚ် ၁၂
ကံၚ်ဇြဳပၞာန်ဝွံ ဍုၚ်ညးတံ ထိၚ်ဒက်ဟွံမာန်ဂှ် ရံၚ်ကေတ်ပ္တိတ်ဒၟံၚ်ဇြဟတ် သွက်ဂွံပလီုပလာ်ဏောၚ်ဂှ် ညးစၞးတၟေၚ် ကုလသမဂ္ဂ စပ်ကဵုဍုၚ်ဗၟာ ဟီုလဝ် ပ္ဍဲဂိတုဂျူလာၚ် ၁၁ တေံရ။
ဟိုတ်နူပရေၚ်ဗ္တိုက် ဂကောံဇြဟတ်ဒဳမဝ်ကရေဇြဳတံကဵု ဂကောံရပ်လွဟ်ကောန်ဍုၚ်အရၚ်တံဂှ်တုဲ ကံၚ်ဇြဳပၞာန်ဝွံ သံၚ်ဗြံၚ်ဒၟံၚ်တုဲ တၚ်တုပ်စိုတ်ဒေါအ်ပန်ပှော် ကြုက်လုပ်အကြာတုဲ ပ္ညဳပ္ညပ်လဝ်ကဵုဂှ်လေဝ် ဟွံဒုၚ် ဒှ်ဒၟံၚ်ရ။
အခိၚ်လၟုဟ် ဒပ်ပၞာန်ဗၟာဝွံ လဇုဲအလုဲဒၟံၚ်တုဲ ဆောံလေၚ်ဒၟံၚ် ကောန်ပၞာန်တံရောၚ်ဂှ် သ္ဂးရ။
သ္အာၚ်နူဂှ်ပၠန် ဒးဗလးဒၟံၚ်တဲ စမြိုၚ်စပ်ကဵုလ္ပာ်ပၞာန်တံဂှ်တုဲ တိဍာ်ဂမၠိုၚ် ဆောံလေၚ်ဒၟံၚ်ရောၚ် ညးစိုန်သ္ကီု ကုလသမဂ္ဂ တောမ် အာန်ဒရူ ပ္ဍဲအရာဟီုလဝ်ကဵု ဌာနဂီုကၠီုဍုၚ်သေံဂှ် ဟီုစုတ်လဝ်ရ။
ကံၚ်ဇြဳပၞာန်ဝွံ ဍုၚ်ဍေံတံ ထိၚ်ဒက်ဟွံမာန်ရဂှ် ဒှ်ဒၟံၚ်ဗီုပြၚ် ပ္တိတ်ဒၟံၚ်ဇြဟတ် သွက်ဂွံပလီုကၠေံဂှ် ညးစၞးတၟေၚ် တောမ်အာန်ဒရူ ဟီုရ။
ကံၚ်ဇြဳပၞာန်ဝွံ ဟိုတ်နူဒးဆောံလေၚ်လဝ်တုဲ ဒဒှ်ရဗ္တိုက်ဒၟံၚ် ကောန်အရာပ်တံဂှ်ကီု အပ္ဍဲပွိုၚ်တြဴဂိတုတုဲကၠုၚ်တေံ ဗ္တိုက်ကၠုၚ် ရုၚ်ဂဥုဲ ကေုာံ ဘာလကျာ် ဘာဗ္တောန်လိက်တံ သာဂၠိုၚ်ကၠုၚ်ဂှ် ညးဟီုဗပေၚ်လဝ်ရ။
ကံၚ်ဇြဳပၞာန်ဂှ် သွက်ညးတံဒးကျဗြံလဝ်ဂှ် ဒက်ဝဲ ကုကောန်အရာပ်တုဲ ဗ္တိုက်ဒၟံၚ်တုဲ ဗွဲတၟေၚ် တိဍာ်ဍေံတံ ဒးဗလးလဝ်တဲတံဂှ် သာတုဲကၠောန်သ္ပကၠုၚ်ဒၟံၚ် ပရေၚ်ဗ္တိုက််တံရောၚ် တောမ်အာန်ဒရူ ဟီုရ။
အတိုၚ်အကာဲအရာလၟုဟ်မ္ဂး ကံၚ်ဇြဳပၞာန်ဝွံ ၜိုတ်နေဗျဳဒဝ် ကေုာံ ၜိုတ်ဍုၚ်ဇၞော်တံသၟးရ ထိၚ်ဒက်ဂွံလဝ်တုဲ ပ္ဍဲဒေသတၞဟ်ဟ်တံဂှ် ကျတုဲကျပၠန် ဒှ်ဒၟံၚ်ရ။
အခိၚ်ဒးဆေၚ်ဒၟံၚ်မုက်ကဵု ပရေၚ်ဗ္တိုက်ဒပ်ပၠန်ဂတးတံ ဇၞော်ကဵုဇြဟတ်တံဂှ် ကံၚ်ဇြဳပၞာန် ပကောံဒၟံၚ်ဇြဟတ် ပ္ဍဲမာန္တလေဝ် နဒဒှ်ပၞာန်ဒုၚ်ရောၚ် သ္ဂးရ။
Ref: DailyStar