မတ်မလီု၊ ဂျူလာၚ် ၁၃
ဂကောံပၞာန်သီအဝဵုတအ် နကဵုနဲကဲနာနာ ဟိုတ်နူဆက်ကလိလောန်ဒၟံၚ် ပွဖံက်ပ္ကဝ်အခေါၚ်အရာမၞိဟ်တံဂှ်တုဲ ပ္ဍဲဂိတုဇျောန် တုဲကၠုၚ်တေံ အလုံကၟိန်ဍုၚ် လၟိဟ်မၞိဟ်ဗြဴဗဒါဲ (၇၀) တၠဒးချိုတ်အာလဝ်ရောၚ် ပ္ဍဲစၟတ်တ္ၚဲဂျူလာၚ် (၁၀) ဂှ် ဂကောံသမဂ္ဂမၞိဟ်ဗြဴကၟိန်ဍုၚ်ဗၟာ လလောၚ်ပ္တိတ်လဝ်ရ။
မၞိဟ်ဒးချိုတ်အာတအ်ဂှ် ဟိုတ်နူဒပ်ပၞာန်ဗၟာ ထောံဖျေံမခတိုဟ်နကဵုက္ၜၚ်ကျာတုဲ မၞိဟ် (၄၄) တၠ ဟိုတ်နူပန်ကဵုလွဟ်ဇၞော်တုဲ မၞိဟ်(၁၆) တၠ ဟိုတ်နူပြိုက်ဂစိုတ် မသက္ကုဟိုတ်ဂှ် မၞိဟ်(၅) တၠ ကေုာံ ဟိုတ်နူလိုန်ဒး မာၚ်တိုပ်တိတုဲ ၂ တၠ အပံၚ်ဖအိုတ် (၆၇) ဒးချိုတ်အာရ။
အတိုင်တင်နင်နူ ဂကောံသမဂ္ဂမၞိဟ်ဗြဴကၟိန်ဍုၚ် လၟိဟ်မၞိဟ်ဗြဴဒးအိုတ်လမျီုတအ်ဂှ်ဝွံ နူရးသက်ကိုၚ်ဂှ် (၂၈) တၠ ဒှ်ဒၟံၚ်ဂၠိုၚ်အိုတ်တုဲ နူရခေၚ် (၁၃) တၠ သေံ (၁၁)တၠ မဂွဵုဂှ် (၇)တၠ နူမာန္တလေဝ် (၄) တၠ ကဵု ဗဂေါကဵုကချေၚ် မွဲမွဲရး (၂) တၠ ပါလုပ်ဒၟံၚ်ရ။
ပ္ဍဲဂှ် မၞိဟ်ဗြဴအယုက် (၁၈) လပါ်သၟဝ် (၁၄) တၠပါလုပ်တုဲ ဟိုတ်နူဂကောံပၞာန် ဗ္တိုက်ကဵုက္ၜၚ်ကျာကီု၊ လိုန်ဒးမာၚ်တိုပ်တိကီု၊ ပန်ကဵုလွဟ်ဇၞော်ကီု၊ ဒးဒုၚ်ပျဲပျာံပ္ဍဲထံၚ်စာတ်ကီု၊ ဒးဒုၚ်သ္ပကောန်ဗြဴတံဂှ်တုဲ ညးဗြဴ ၅၇ တၠ ဇီုကပိုက်ကလိဂွံလဝ်ဝပ်ရ။
စရၚ်မၞိဟ်ဗြဴအိုတ်လမျီုကဵုမၞိဟ်ဗြဴဒးဘဲဒဏ်တအ်ဂှ် ပဵုတိုန်ကၠုၚ်နူဂိတုမေတုဲ ဂိတုဂျောန်တုဲကၠုၚ်တေံ ပ္ဍဲရးသက်ကိုၚ်၊ ပ္ဍဲမာန္တလေဝ် ကေုာံ ပ္ဍဲရးဗဂေါတံဂှ် ညးဗြဴ ၁၀ တၠ ဒုဟ်ဟွံမွဲမွဲသာ် ဒးဒုၚ်ရပ်လဝ်ထိၚ်ဂှ် ဂကောံသမဂ္ဂမၞိဟ်ဗြဴဍုၚ်ဗၟာ သ္ဂးရ။
ပ္ဍဲမၞိဟ်ဗြဴဒးဒုၚ်ရပ်ဏာ (၈) တၠတအ်ဂှ် စရှ်ဒးပ္ကဴ ပ္ဍဲတ္ၚဲက္တဵုဒှ်မၞိဟ်ဒဝ်အံၚ်သာန်သုကျဳတုဲ ဒးဒုၚ်ရပ်လဝ်တုဲ ပ္ဍဲမ္ၚးဏံ လၟိဟ် မၞိဟ်ဗြဴဒးဒုၚ်ရပ်ဏာကဵု မၞိဟ်ဒးဒုၚ်ဖံက်ပလီုအခေါ်ၚ်အရာတအ်ဂှ် လၟိဟ်ဂၠိုၚ်နူဏံဒှ်မာန်ဏောၚ် ဂကောံသမဂ္ဂမၞိဟ်ဗြဴ ပတိတ်လဝ်နွံရ။
ပရိုၚ်−သြၚ်လောန်တိုၚ်(မ်)
ဗီု−CJ