ၜၚ်ကံက်၊ ဂျူလာၚ် ၁၅
အလဵုအသဳသေံ စဳဇန်လဝ် သွက်ဂွံဂလိုၚ်ပ္တိုန်ကဵု သြန်ဂိတုသဝ်အိုတ်ဂှ်ကီုလေဝ် ကောန်ကလောန်ဆုဲပြံၚ်ဂမၠိုၚ်ဝွံ ပ္ဍဲကဵုပပဵုပ္တိုန်ကဵုလဝ်သြန်ဂိတု ကၠာတေံဂှ် ဟွံတၞီလုပ်လဝ်တုဲ အစောံစရာဲဂွံအာတ်မိက်မာန်ဂှ်လေဝ် ဟွံမွဲ ဒှ်ဒၟံၚ်ဂှ် ညးချဳဒရာၚ်က္တိုၚ်ကၟဟ် ပရေၚ်သၟာကမၠောန်တံ ဟီုရ။
ပ္ဍဲဍုၚ်သေံ ပ္ဍဲကဵုသြန်ဂိတုသဝ်အိုတ်တံဂှ် အပ္ဍဲသၞာံဏံ ပပဵုပ္တိုန်ကဵုလဝ် စဵုကဵုၜါဝါတုဲ သွက်ဂွံပပဵုပ္တိုန်ကဵု မွဲဝါပၠန် နွံဒၟံၚ်ကီုလေဝ် တၠကမၠောန်တံဂှ်တှ်ေ သွက်သၟာကမၠောန်ဆုဲပြံၚ်တံဂှ် ဟွံပပဵုပ္တိုန်ကဵုသြန်ဂိတုမွဲသာ် စွံလဝ်အိုတ်ရောၚ် ညးချဳဒရာၚ်ကတိုၚ်ကၟဟ်ဂမၠိုၚ် ဟီုရ။
ကောန်ကလောန်ဆုဲပြံၚ်ဂမၠိုၚ်ဝွံ သြန်ဂိတုညးတံဂွံတံဂှ် ကလေၚ်ပလံၚ်ဖျဴဒၟံသ္ၚိဂှ်ရ ပ္ဍဲကဵုဂလိုၚ်ပ္တိုန်ကဵု သြန်ဂိတုကဆံၚ်သဝ်အိုတ်တံဂှ် ဟွံစုတ်လဝ်ညးတံပုဟ်ဂှ် က္ဍိုပ်သ္ကိုပ်သွာၚ်ကမၠောန်တံ ဟီုလဝ်ရ။
ပ္ဍဲဍုၚ်သေံဂှ် တန်တဴကဵုဒၞါဲကဵု ဂကူကမၠောန်တံဂှ်တုဲ ကလိဂွံသြန်ဂိတုသဝ်အိုတ်တံ တၞဟ်ခြာဒၟံၚ်ကီုလေဝ် လၟုဟ်ဂှ်တှ်ေ မွဲတ္ၚဲ သွက်ဂွံပပဵုပ္တိုန်ကဵု ၃၇၀ ၝာတ် (၁၀ ဒဝ်ဠာ) ဂှ် စဳဇန်လဝ်ဂှ် ဌာနဝန်ဇၞော်သၟာကမၠောန်တံ ဟီုရ။
ပ္ဍဲဍုၚ်သေံဂှ် သၟာကမၠောန်ဆုဲပြံၚ်ဍုၚ်ဗၟာ ၂ ပြကောဋိကိုဋ် နွံတုဲ လၟိဟ်ဏံဝွံ ၜိုတ် ၇၅ တၟံကၠံ သၟာကမၠောန်ဆုဲပြံၚ် နွံဒၟံၚ်ပ္ဍဲဍုၚ်သေံတံ မဒှ်ရ။
အလဵုအသဳသေံဂှ် သွက်ဂွံပပဵုပ္တိုန်ကဵု သြန်ဂိတုဂှ် စဳဇန်လဝ်တုဲ သြန်ဂိတုဟွံပဵုကၠုၚ်ကီုလေဝ် သွက်ပရေၚ်ဂြောဝ်ဂတာတုဲ ကောန်ကလောန်ဍုၚ်ဗၟာ ဒးဆက်ကၠောန်ဒၟံၚ်ကမၠောန် ပ္ဍဲဍုၚ်သေံတံဂှ် နွံဒၟံၚ်ရ။
ပ္ဍဲဍုၚ်သေံဂှ် အတိုၚ်သြန်ဂိတုသဝ်အိုတ် မခုတ်လဝ်ဂှ်ဟွံသေၚ် မွဲတ္ၚဲ နကဵု ၂၀၀ ၝာတ် ကောန်ဍုၚ်ဗၟာ ဒးကၠောန်ဒၟံၚ်ကလောန်တံလေဝ် နွံဒၟံၚ်ရ။
ပ္ဍဲကဵုကောန်ကလောန်ဆုဲပြံၚ်တံဂှ် လိက်တၞးလုပ်သၞောဝ်တံ ဟွံမွဲဂှ်ရ အတိုၚ်သြန်ဂိတုစၟတ်လဝ်ဂှ် ဟွံဂွံသၟးဟွံက အခေါၚ်ဂွံတေၚ်လေဝ် ဟွံမွဲ ဒှ်ဒၟံၚ်ရောၚ် ညးချဳဒရာၚ်က္တိုၚ်ကၟုဟ် ပရေၚ်သၟာကမၠောန်ဍုၚ်သေံတံ ဟီုရ။
ပြသၞာဏံဝွံ ပ္ဍဲဒေသပယျဵု ညံၚ်ရဴမာဲချံက်တံဂှ် က္တဵုဒှ်ဂၠိုၚ်ဒၟံၚ်တုဲ စကာဒၟံၚ်ကောန်ကလောန်ဍုၚ်ဗၟာတံ ပ္ဍဲကဵုကမၠောန်ဇိၚ်ဂၠိက်ယာတ် ကမၠောန်သာ်တံဏံ နကဵုၚုဟ်တန်တန်ဂှ် ဂွံတီကေတ်ရ။
သၟာကမၠောန် ကၠောန်ဒၟံၚ်ကလောန် ပ္ဍဲကမၠောန်ပရေၚ်တဵုလွဳတံဝွံ မွဲတ္ၚဲ ဂွံမံၚ် ၜိုတ် ၃၆ ၝာတ်ရဏောၚ်ဂှ် ဂွံတီကေတ်ရ။
ကောန်ကလောန် တၞးလိက်လုပ်သၞောဝ် နွံတံရဂှ် ဖေက်ဒးဒုၚ်ဂၠါဲသၞကဵု တၠကမၠောန်တံကီု၊ ဖေက်ဒးတိတ်နူကမၠောန်တံဂှ်တုဲ ဟွံဂံၚ်တေၚ်စိုပ် ဒှ်ဒၟံၚ်တုဲ ယဝ်ရအာတေၚ်မ္ဂးလေဝ် အခိၚ်စၟဳတ်ဂှ် လအ်လဗွဲမလောန်ရောၚ် ညးချဳဒရာၚ်ကတိုၚ်ကၟဟ်တံ ဟီုရ။
ကောန်ကလောန်လ္ၚဵုတံဂှ် အာစိုပ်တေၚ်လဝ် ပ္ဍဲရုၚ်ကလောန်တံကီုလေဝ် စဵုကဵုလအ်အာကဵုသၞာံ ဟွံဂွံဖျေံသ္ဂုတ်သွာတ်ဏီပုဟ်ဂှ် ညးချဳဒရာၚ်ကတိုၚ်ကၟဟ်ဂမၠိုၚ် ဟီုရ။
Ref: RFA