မဳယာမဳ၊ ဂျူလာၚ် ၁၇
သမ္မတတြေံ အမေရိကာန် ဒဝ်နေဝ်ထြာပ်ဝွံ ဂဗုတ်စောဲစပ်လဝ်ညး ရပ်စပ်လဝ်လိက်ဓလုက် ဟွံဒးကဵုဒၞါဲဂှ် နာဲဗ္စာ ဖလဝ်ရဳဒါမွဲတၠ ညးခါန်ကၞက်ပ္တိုန်လဝ်ဂှ် တးပါဲထောံလဝ်ရ။
ဗီုပြၚ်ခါန်ကၞက်ပ္တိုန်လဝ် ညးကဵုကသပ်တၟေၚ် ဂျက်သမေတ်ဂှ်ဝွံ ဟွံဒးရးပုဟ်ဂှ် နာဲဗ္စာဏံ ဟီုလဝ်ရ။
တၚ်သ္ဂုတ်သွာတ်ဏံဝွံ သွက်သမ္မတတြေံ ဒဝ်နေဝ်ထြာပ်ဂှ် ဒှ်တဴပေါဲအံၚ်ဇၞးဇၞော်ဇၞော်မွဲတုဲ ညးဝွံ ကြဴနူတိတ်အာ နူသ္ၚိဗုတုဲဂှ် ဆက်ထိၚ်ဒဝ်လဝ် လိက်စၟတ်သမ္တီ မကၞိက်လဒဵုလဝ်တံဂှ်တုဲ က္တဵုဗဒှ်တဴ အန္တရာယ် ပရေၚ်ဂီုကၠီုကောန်ဂကူရောၚ် ဒးဒုၚ်စောဲစပ်လဝ်ရ။
ညးရေၚ်တၠုၚ်ဂဗုတ်သွက်ထြာပ်ဂမၠိုၚ် ကြဴနူဟီုစာန်စးလဝ် ဒဒှ်ရအခေါၚ်ဗက်ရေၚ်တၠုၚ် သွက်ဂွံဂွံအခိၚ်ကလေၚ်လ္ၚတ် တၚ်သ္ဂုတ်သွာတ်ရုၚ်သၞောဝ်ဓဝ်ကၟိန်ဍုၚ် မဖျေံလဝ် ပ္ဍဲသမ္မတတြေံ အခေါၚ်ဗၠးနူဒုဟ်ဒဏ်နွံဂှ်တုဲဂှ် နာဲဗ္စာ အဳလဳယာန် ကာန်နန် တးပါဲလဝ် ဂဗုတ်ဏံရ။
ပ္ဍဲကဵုဂဗုတ် ဒးဒုၚ်စောဲစပ်လဝ် ပ္ဍဲတွဵုရး ဖလဝ်ရဳဒါဂှ် သမ္မတတြေံ ထြာပ်ဝွံ နကဵုတၚ်ရန်တၟံနွံနွံ ထိၚ်ဒဝ်လဝ် တၚ်နၚ်ကာစဵုဒၞါကၟိန်ဍုၚ်ရောၚ် ဒးဒုၚ်စောဲစပ်လဝ်ဂှ်ရ ယဝ်ရဒုဟ်ဒဏ်ပြာကတ်မ္ဂး ဒးဒုၚ်ဖျေံစၟတ် စဵုကဵုဒဏ်ထံၚ် ၁၀ သၞာံမာန်ရ။
ညးဝွံ ပံၚ်ပ္တိတ်ကသပ် သွက်ဂွံကၟာတ်လဒဵုတာဒၞါ ဌာနသၞောဝ်ဓဝ်တုဲ သီုကဵုဟီုဂးပ္တိတ်လဝ် အရာမဗၠေတ်မှာတံရောၚ်ဂှ် ဒးဒုၚ်စောဲစပ်လဝ်ရ။
ထြာပ် ကြဴနူတိတ်နူကဆံၚ်ဌာနန္တရသမ္မတတုဲ ပ္ဍဲကဵုသ္ၚိဒၟံၚ်ညး ဖလဝ်ရဳဒါဂှ် ဆက်သီဂိုၚ်လဝ် လိက်စၟတ်သမ္တီဓလုက် ပေန်တဂေါန်တံကဵု သဳအိုၚ်အေတံရ။
အကြာဏံ ပ္ဍဲကဵုပေါဲကောံဓရီုညးဍုၚ်ကွာန် မကၠောန်ဗဒှ်လဝ် ပ္ဍဲတွဵုရးပါန်သေဝ်ဗေနဳယျာဂှ် ဒးဒုၚ်ပန်လဝ်ကဵုသေနာတ်ကီုလေဝ် ထြာပ် မဗၠးကၠုၚ်နူဘဲလမျီုဂှ်ဝွံ ပ္ဍဲပေါဲရုဲမာဲ နဝ်ဝေမ်ဗာဏံ နဒဒှ်ညးဂွံဇၞး ကုသမ္မတလၟုဟ် ဗိုၚ်ဒေန်ဂှ် ယၟုဒယှ်ဒၟံၚ်ရ။
Ref: AFP