ၜၚ်ကံက်၊ ဂျူလာၚ် ၁၈
ပ္ဍဲကဵုဗ္ဒမ် ဟဝ်တေဝ်ကဆံၚ်သၠုၚ် နွံလ္တူဍုၚ်ၜၚ်ကံက်မွဲဂှ် ပရူဒဒှ်ကောန်ဍုၚ်သ္အာၚ် ၆ တၠ ချိုတ်ဒၟံၚ် ပ္ဍဲဂိတုဂျူလာၚ် ၁၆ ဂှ် ဒပ်ဗၠာဲသၟိၚ်သေံတံ ဂၠိုက်ဂၠါဲစၟဳတ်ဒၟံၚ်တုဲ ညးချိုတ်အာဂမၠိုၚ်ဝွံ ဒးလဝ်ဂျိရောၚ် သၞာဲဒဴဂမၠိုၚ် ဒှ်ဒၟံၚ်သံသယရ။
ညးမခချိုတ်အာ သီုတြဴတၠဂှ် ဒှ်ဇာတိဗဳယေတ်နာမ် ပါလုပ်သီုကဵုညးမရပ်လဝ်စၟတ်တဲကၠောံဍုၚ် အမေရိကာန်ၜါတၠဂှ်ဝွံ ပ္ဍဲဂိတုဂျူလာၚ် ၁၃ ကဵု ၁၄ ဂှ် စိုပ်ကၠုၚ်တုဲ ဒှ်ညးကၠုၚ်စိုပ်ဇူဒီုလဝ် ပ္ဍဲဟဝ်တေဝ် Grand Hyatt Erawan လ္တူဍုၚ်ၜၚ်ကံက် အခိၚ်ဟွံတုပ်ညးသ္ကအ်ပုဟ်ဂှ် ဒပ်ဗၠာဲသၟိၚ်တံ ဟီုရ။
မၞိဟ်မွဲဂကောံဏံ မၞိဟ်တြုံပိတၠကဵု မၞိဟ်ဗြဴပိတၠ ပါလုပ်ဂှ်ဝွံ ဗ္ဒမ်ညးတံဇူဒီုတံဂှ် ဟွံတုပ်ကီုလေဝ် ဂွံဆဵုကေတ်လဝ် ဇွညးတံ ပ္ဍဲကဵုမွဲဗ္ဒမ်တုပ်ပ် မဒှ်ရ။
ပ္ဍဲကဵုဗ္ဒမ်ဂွံဆဵုကေတ်လဝ်ဇွတံဂှ် လက္ချန်ဒှ်လဝ်သေက်ဇဵုတံလေဝ် ဟွံဂွံဆဵုကေတ်ပုဟ်ဂှ် သၞာဲဒဴဗၠာဲသၟိၚ် တဳတဳသာအာန်သာဝါန် ဟီုကဵု အ္စာပရိုၚ်ဂမၠိုၚ်ရ။
ညအ်ဂှ် ဒှ်ဂဗုတ်သ္ပအန္တရာယ် ဇကုဇကုဟွံသေၚ်၊ ညးမွဲမွဲ နကဵုဟိုတ်မိက်သ္ဂောံကဵုအိုတ်လမျီုတုဲ ကၠောန်လဝ်ရောၚ် ဒဒှ်ရသၞာဲဒဴဗၠာဲသၟိၚ် တဳတဳဂှ် ဟီုလဝ်တုဲ ဒဒှ်ရဂၠါဲဒၟံၚ် ပူဂဵုမရနုက်ကဵုထပှ် မဆက်စပ်ဒၟံၚ်ကဵု ညးဒးချိုတ်အာတံဂှ် ဟီုဗပေၚ်လဝ်ရ။
ကြဴနူညးတံ စှ်ေနူက္ၜၚ်ကျာတုဲ ဇၟာပ်ပ်လဂါံဇိုၚ်ဂှ် ပိုယ်တံ ဗက်ဒၟံၚ်ရောၚ် သၞာဲဒဴဗၠာဲသၟိၚ် တဳတဳဂှ် ဟီုလဝ်ရ။
အတိုၚ်စၟဳတ်လဝ်ကၠာတဲဏံဂှ်မ္ဂး ဟိုတ်နူဒှ်သၞတုဲ ဟွံသေၚ်မ္ဂး ဟိုတ်နူပရေၚ်ကၠတ်ဂၠံက်တုဲ ဝပ်ဇီုကပိုက်ဂွံလဝ်တံဂှ် ဟွံဆဵုကေတ်သက်သဳကီုလေဝ် ညးမချိုတ်အာသီုဖအိုတ်ဂှ်ဝွံ ဒဒှ်ရၚိတ်ဖျေံလဝ် ကပေါတ်မၞုံကဵုဂျိဂှ် ဂွံဆဵုကေတ်ဂှ် ညးဟီုရ။
ဟိုတ်ပရူပရာတံဂှ်တှ်ေ ပိုယ်တံ ဒးထ္မံက်ပ္တိတ်ဒၟံၚ်ဂှ်ကီု၊ ပြဟ်ဟ်ဏံ ထ္ၜးသက်သဳမာန်ဂှ်တှ်ေ ညးမချိုတ်အာတံဝွံ ဇကုဇကု ဂစိုတ်ကေတ်ဟွံသေၚ်တုဲ ညးတၞဟ်သ္အာၚ်မွဲ ဂစိုတ်တုဲ ဒးချိုတ်အာလဝ်ဏောၚ်ဂှ်လေဝ် သၞာဲဒဴဗၠာဲသၟိၚ် တဳတဳဂှ် ဟီုရ။
အခိၚ်ဒေသ ဇိုၚ်သဝ်တ္ၚဲ ၜိုတ် ၅ နာဍဳဝိုက်ဂှ် ဒဒှ်ရမၞိဟ်ချိုတ်နွံဒၟံၚ်ဂှ် နူညးယိုက်ဝန်ဟဝ်တေဝ်တံ ဆက်ဖုၚ်ကဵုကၠုၚ်ပရိုၚ်တုဲ ကောန်ဒပ်ဗၠာဲသၟိၚ်တံ ဂွံဆဵုကေတ်လဝ်ဇွတံဂှ်ရ။
ဗ္ဒမ်ဟဝ်တေဝ် နူကဵုမသုန်ထပ်ဂှ် ကောန်ကလောန်သ္အးဇ္ၚးတံ အခိၚ်ကၠုၚ်သ္ဂောံၚးတးဂှ် ဂွံဆဵုကေတ်လဝ်ဇွဂှ်ရ။ သ္ကိုပ်ဝန်ဇၞော် သာရဳထာ အာစိုပ်လဝ် ကရောံသၞာဲဒဴဗၠာဲသၟိၚ်တံ ဂိတုဂျူလာၚ် ၁၆ အခိၚ်ဇိုၚ်သဝ်တ္ၚဲဂှ် ကဵုလဝ်စၞောန် သွက်ဂွံဂၠိုက်ဂၠါဲထ္မံက်ပ္တိတ် ဗွဲမပြဟ်ဂှ် ဂွံတီကေတ်ရ။
ဍုၚ်သေံ မပိုၚ်ပြဳလဝ် ပရေၚ်ပိုန်ဒြပ် ဒုတိယဇၞော်အိုတ် ပ္ဍဲအာယှဒိုဟ်အဂၞဲဏံဂှ် ကဏ္ဍအာတရဴဂၠးတိဂှ်ဝွံ ဒှ်ဇြဟတ်ဒဳ အဓိကမွဲတုဲ သၞာံဏံ ညးအာတရဴ ၃၅ ပြကောဋိကိုဋ် လုပ်စိုပ်ဏောၚ်ဂှ် အလဵုအသဳ စၟဳစလဝ်ရ။
Ref: Agencies