လာန်ဒါန်၊ ဂျူလာၚ် ၁၉
ယဝ်ရဒဝ်နေဝ်ထြာပ် ဂွံဒုၚ်ရုဲစှ် နဒဒှ်သမ္မတအမေရိကာန်မ္ဂး ဂွံပံၚ်တောဲကၠောန်အာကလောန် ကုညးဂှ် ကျာတ်ကီုလေဝ် ညးတံဝွံ ဒှ်ညးဂ္စါန်ကလောန်ဏောၚ်ဂှ် သမ္မတယူကရုၚ် ဗလာဒဳမာ ဇြဳလာန်သကဳ ဟီုလဝ်ရ။
ပ္ဍဲကဵုပေါဲဆဵုဂဗသၟာန်သၟုက်တၟေၚ်မွဲ ကဵုဗဳဗဳဇြဳ မကၠောန်ဗဒှ်လဝ် ပ္ဍဲဍုၚ်လာန်ဒါန်ဂှ် သမ္မတဇြဳလာန်သကဳဂှ် ပ္ဍဲအမေရိကာန် သမ္မတဂှ် ညးလဵုမွဲဒှ်ဒှ် ပံၚ်တောဲကၠောန်အာကလောန်ဏောၚ်ဂှ် ဟီုလဝ်ရ။
သွက်ပေါဲရုဲမာဲ ဂိတုနဝ်ဝေမ်ဗာ ကၠုၚ်စိုပ်ဏံဂှ် အမာတ်ကၠတ်ထတ် အိုဝ်ဟိုၚ်အိုဝ် ဂျေဒဳဗာန်ဝွံ ဒှ်သ္ကအ်ရဲပေါဲရုဲမာဲညးရောၚ် တုဲကၠုၚ်ဟွံလအ်တေံ အလံၚ်သမ္မတဗော်ရဳပါပလေတ်ကာန် ထြာပ် လလောၚ်တြးလဝ်ရ။
ဂျေဒဳဗာန် အာယုက် ၃၉ သၞာံဂှ် ယူကရုၚ် မုဒှ်ဒှ် နကဵုညးဟွံသ္ပဂရုပုဟ်ဂှ် ကေၚ်ဟီုလဝ်ရ။
ပ္ဍဲပေါဲရုဲမာဲ ဂိတုနဝ်ဝေမ်ဗာဏံ သမ္မတတြေံ ထြာပ် ဂွံဇၞးတုဲ စိုပ်ကၠုၚ် သ္ၚိဗုမ္ဂး ကတိအမေရိကာန် ကဵုလဝ်ယူကရုၚ်တံ ကၠေံအာမာန်ဟာ ပရေၚ်ဒှ်ဓဝိၚ်သာ်ဏံတံ မံက်တိတ်ဒၟံၚ်ရ။
သမ္မတဇြဳလာန်သကဳဝွံ သွက်ဂွံတိုန်စိုပ်ကောံဓရီု ဗွိုၚ်ပရေၚ်ဍုၚ်ကွာန် ဥရဝ်ပဂှ် စိုပ်ဒၟံၚ်ဗျိတိၚ် မဒှ်ရ။
သ္ကိုပ်ဝန်ဇၞော်ဗျိတိၚ် ကဳယာ သတာမာဂှ် အခိၚ်ဆဵုဂဗကဵု သမ္မတဇြဳလာန်သကဳဂှ် အခိၚ်ၜိုတ်လဵုလအ်လအ် ဒတူလိုၚ်အာ ကရောံယူကရုၚ်ဏောၚ်တုဲ သွက်ယူကရုၚ်ဂှ် ကဵုအာအရီုဗၚ်ပၞာန် သတာလေန်ပံၚ် (၃) ပြကောဋိကိုဋ်ဏောၚ် ကဵုလဝ်ကတိရ။
သမ္မတဇြဳလာန်သကဳဝွံ သွက်ပရေၚ်ပလံၚ်ပ္တိတ် ဗၞိက်ပ္တိတ်ကာစဵုဒၞါ ၚုဟ်မးမၞုံ ၃ ဒဿမ ၅ ဗဳလဳယျာန်ပံၚ်ဂှ် ဂွံထ္ပက်အာစၟတ်တဲ တၚ်တုပ်စိုတ် စပ်ကဵုပရေၚ်ဘဏ္ဍာ ကုဗျိတိၚ်ဂှ် နွံဒၟံၚ်ရ။
ထြာပ်ဂှ် နကဵုကောန်ဍုၚ်နေတိုဝ်ဂမၠိုၚ် ယဝ်ရဟွံဂလိုၚ်ပ္တိုန်ကဵု ခရိတ်ကာစဵုဒၞါမ္ဂး ရုယှာတံ ဗ္တိုက်မ္ဂးလေဝ် ဗ္တိုက်ကေတ်ဂှ် ကေၚ်ဟီုလဝ်ရ။
တုဲပၠန် ထြာပ်ဂှ် နကဵုထိုၚ်ဝါန် သွက်ပရေၚ်စဵုဒၞါညးတံဂှ် အလဵုညးတံ ဒးကဵုသြန်ကေတ်တ်ဏောၚ်ဂှ် သ္ဂးလဝ်ပၠန်ရ။
ဟိုတ်ဂှ်ရ ယဝ်ရထြာပ် ဒှ်ကၠုၚ်သမ္မတမ္ဂး ကတိအမေရိကာန် ကဵုလဝ်ယူကရုၚ်တံ လီုအာမာန်ဏောၚ် ပရေၚ်ဒှ်ဓဝိၚ်သာ်ဏံတံ မံက်တိတ်ဒၟံၚ်ရ။
Ref: BBC