ဝါယှေန်တာန်၊ ဂျူလာၚ် ၂၀
သမ္မတလၟုဟ် ဂျဵုဗိုၚ်ဒေန် ယဝ်ရနုက်တိတ်နူပေါဲရုဲမာဲသမ္မတ ဂိတုနဝ်ဝေမ်ဗာဏံဂှ်မ္ဂး အကာဲအရာသာ်လဵု ဒှ်ကၠုၚ်ရောဟီုဂှ် ဂြောဝ်ဂတာညး စသဳကၠဳဒၟံၚ်ယျဂှ် တမ်ရိုဟ်ပရိုၚ်ၜါတၠ တီကေတ်လဝ် ပရေၚ်သဳကၠဳဏံဂှ် ဟီုရ။
လစွံစိုတ်ညးဂမၠိုၚ် မဆက်စပ်ကဵု ပရေၚ်သဳကၠဳ ပရေၚ်နုက်တိတ်ဂှ် နကဵုသမ္မတဗိုၚ်ဒေန် နုက်တိတ်ဟာ၊ ဟွံတိတ်ဟာဂှ် အလဵုညး ဒးသ္ဂုတ်သွာတ်ထေက်ရောၚ် ဟီုလဝ်ရောၚ် သ္ဂးရ။
မဟာမိတ်ညး ဍုက်ကေတ်အိုတ်တံဂှ်တှ်ေ နကဵုသမ္မတဗိုၚ်ဒေန် ဗော်ညး သွက်ဂွံကေတ်ဇၞး ဒဝ်နေဝ်ထြာပ်ဂှ် ညံၚ်ဂွံဒှ်ဒၟံၚ်ခိုဟ်အိုတ်ဂှ် ထေက်ကဵုဒးကၠောန်လဝ်ရောၚ် ပတှ်ေစှ်ေစိုတ်ရ။
ဂြောဝ်ဂတာသမ္မတဗိုၚ်ဒေန်ဂှ် ယဝ်ရသ္ဂုတ်သွာတ်အာ ဟွံလုပ်ပြိုၚ်ပေါဲရုဲမာဲရပုဟ်မ္ဂး အကာဲအရာဒှ်ကၠုၚ်မာန်တံဂှ် ဒဒှ်ရစွံအဓိက သဳကၠဳဒၟံၚ်ဂှ် တမ်ရိုဟ်ပရိုၚ်ဂမၠိုၚ် ဟီုလဝ်ရ။
ပ္ဍဲကဵုတၚ်နၚ် ညးတံချပ်ဒၟံၚ်ဂှ် အကာဲအရာပရေၚ်ထတ်ယုက် သမ္မတဗိုၚ်ဒေန်၊ အကာဲအရာဇီုကပိုက်ကၠုၚ် လ္တူဂြောဝ်ဂတာမာန် ကေုာံ ပရေၚ်ဍုၚ်ကွာန်ညိၚ်ဝတ်တံ ဒှ်တမ် ပါလုပ်ဂှ် သ္ဂးရ။
သွက်ဂွံနုက်တိတ်နူပေါဲရုဲမာဲ အခိၚ်က္ဍိုပ်သ္ကိုပ် ဒဳမဝ်ကရေတ်တေတ်တံ ကဵုဒၟံၚ်ဇြဟတ်ဂရိုဟ်ဂှ် သမ္မတဗိုၚ်ဒေန်ဂှ်တှ်ေ နုက်တိတ်ဟွံသေၚ်ပုဟ်ဂှ် ဟီုလဝ်ရ။
သမ္မတဝွံ အခိၚ်ဟီုပြိုၚ်ဂလာန် ကုဒဝ်နေဝ်ထြာပ်ဂှ် အရာဟွံပြေပြံၚ်တံ က္တဵုဒှ်လဝ်တုဲ ပ္ဍဲကောံဓရီုနေတဝ်ဂှ်လေဝ် သမ္မတယူကရုၚ် ဇြဳလာန်သကဳဂှ် ဗၠေတ်မှာစကဵု သမ္မတရုယှာ ပူတေန်တုဲ ဆက်လဝ်မိတ်ရ။
ဟိုတ်နူအကာဲအရာသာ်ဏံတုဲ သမ္မတဗိုၚ်ဒေန် အာယုက် ၈၁ သၞာံဂှ်ဝွံ ယဲဗျုအန္တရာယ်ဇဳ ထၞေန်စိုပ်ဒၟံၚ်ယျ ဂလာန်သာ်ဏံ မံက်တိတ်လဝ်တုဲ စပ်ကဵုအစောံစရာဲ သ္ဂောံယိုက်ဂၠေၚ်တာလျိုၚ် နဒဒှ်သမ္မတဂှ်လေဝ် သံသယဂမၠိုၚ် က္တဵုဒှ်လဝ်ရ။
ညးမၞုံအခေါၚ်ဟီုဂး သ္ၚိဗု အာန်ဒရူ ဗာတဳဂှ်တှ်ေ သွက်ဗိုၚ်ဒေန်ဂွံနုက်တိတ် ဂြောဝ်ဂတာညး သဳကၠဳဒၟံၚ်ရောၚ်ဟီုဂှ် ကယျာန်ပါဲလဝ်ရ။
အကြာဏံ သမ္မတတြေံ ဒဝ်နေဝ်ထြာပ် ဒးဒုၚ်ပန်ဂစိုတ်ကဵုသေနာတ် ပ္ဍဲဒၞါဲမၞိဟ်ကောံကလောံမွဲတုဲ ဗၠးကၠုၚ်နူဘဲလမျီုဂှ် ဂွံဇၞးကေတ်ပေါဲရုဲမာဲမာန် ဂလာန်ဟီုဂးဒၟံၚ် သာ်ဏံဂှ်လေဝ် မံက်တိတ်ဒၟံၚ်ရ။
Ref: NBC