ဗဳယာန်ကျေန်၊ ဂျူလာၚ် ၂၂
လာအိုဝ် ဥက္ကဌဒးအလန်အာဇြဳယာန်ဂှ် စနူဂိတုဂျူလာၚ် ၂၂ ဏံတုဲ ဒဒှ်ရကၠောန်ဗဒှ်အာ ကောံဓရီုဝန်ဇၞော်ကာဍုၚ်သ္အာၚ် မရနုက်ကဵု ၂၇ ဝါဂှ်ကဵု ကောံဓရီုမဆက်စပ်ဂမၠိုၚ် ပ္ဍဲဍုၚ်ဗဳယာန်ကျေန်ဏောၚ်ဂှ် လလောၚ်တြးလဝ်ရ။
သွက်ဂွံကၠောန်ဗဒှ်အာ ပရေၚ်ဆဵုဂဗသဳကၠဳ ၂၅ ကုညးစၞးလ္ၚီပြၚ် နူကဵုဍုၚ် ၃၁ ဍုၚ်ဂှ် စဳဇန်လဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ဌာနဝန်ဇၞော်ကာဍုၚ်သ္အာၚ် လာအိုဝ်ရ။
ညံၚ်ဗွိုၚ်အာဇြဳယာန် ဇြဟတ်ဂွံခိုဟ်ကၠုၚ်ဂှ်ကီု၊ အစဳဇန်ဖောအ်ဗြေဝ်တောတက် မစှ်ေကဵုမဟာဗျူဟာ သၞာံ ၂၀၁၅ ၊ ကိစ္စကေၚ်ကာဍုၚ်သ္အာၚ်တံဂှ် သဳကၠဳအာဏောၚ် ဂွံတီကေတ်ရ။
နကဵုဝန်ဇၞော်ကာဍုၚ်သ္အာၚ်လာအိုဝ် ဆဵုဂဗကဵု ဝန်ဇၞော်ကာဍုၚ်သ္အာၚ်အာဇြဳယာန်တံတုဲ သွက်ဂွံထ္မံက်ရုပ်ရဴ တၚ်တုပ်စိုတ်စပ်ကဵုဍုၚ်ဗၟာ ၅ တၚ်ဂှ် သဳကၠဳအာဏောၚ် မဒှ်ရ။
လာအိုဝ်ဂှ် သွက်ဂွံဒုၚ်တဲကၠောန်ဗဒှ်အာ ကောံဓရီုဝန်ဇၞော်ကာဍုၚ်သ္အာၚ် အာဇြဳယာန် ကေုာံ ကြုက်၊ ဂျပါန်၊ ကိုဝ်ရဳယျာသၠုၚ်ကျာပိဍုၚ်ဂှ်လေဝ် နွံဒၟံၚ်ရ။
ပါဲနူပိဍုၚ်ဏံတုဲ ဝှဝ်ရာမ်စပ်ကဵုဒေသအာဇြဳယာန် မရနုက်ကဵု ၃၁ ဝါ ပါလုပ်သီုကဵု အိန္ဒိယ၊ ရုယှာ၊ နျူဇြဳလာန် ကေုာံ အမေရိကာန်တံဂှ်လေဝ် ဒုၚ်တဲကၠောန်အာဒၟံၚ်ဏီ မဒှ်ရ။
ပ္ဍဲအရာသောၚ်ကလး ပြသၞာဍုၚ်ဗၟာဂှ် ဥက္ကဌတြေံ အာဇြဳယာန်၊ ဥက္ကဌပစ္စုပ္ပန်ဏံကဵု ဍုၚ်သ္ဂောံဒှ်ကၠုၚ်ဥက္ကဌ ဂတဏံတံသၟးဟွံက ကၟိန်ဍုၚ်မိက်ဂွံသောၚ်ကလးပရေၚ်ဍုၚ်ဗၟာတၞဟ်ဟ်တံဂှ် ပံၚ်တောဲတုဲ သွက်ဂွံဂၠါဲအာသွဟ်ဂှ် ဍုၚ်သေံ တုဲကၠုၚ်ခြာဟွံလအ်တေံ ပ္တိုန်လဝ်ဂလာန်ရ။
ဂလာန်ဍုၚ်သေံ ပ္တိုန်လဝ်ဂှ် လာအိုဝ် ဒုၚ်လဝ်တၠုၚ်တုဲ သဳကၠဳဂၠါဲအာသွဟ် ကေုာံ အေန်ဒိုဝ်နဳယှာ၊ မလေဝ်ယှာတံဏောၚ် မဒှ်ရ။
တၚ်တုပ်စိုတ်အာဇြဳယာန် ၅ တၚ် သ္ဂောံသောၚ်ကလး ပြသၞာဍုၚ်ဗၟာ ကုလသမဂ္ဂလေဝ် ထံက်လဝ်ဂလာန်ဂှ် ကံၚ်ဇြဳပၞာန် ဟိုတ်နူထ္မံက်ရုပ်ရဴဟွံမာန်ဂှ်ရ အကြာဍုၚ်အာဇြဳယာန်တံဂှ် လစွံစိုတ်ထ္ကးပြးတံ နွံဒၟံၚ်ရ။
ကံၚ်ဇြဳပၞာန် ထ္မံက်အာရုပ်ရဴ တၚ်တုပ်စိုတ်အာဇြဳယာန်ဂှ်ဏောၚ် ကဵုလဝ်ကတိတုဲမှ ဟွံဒှ်ကလောန် ဒှ်ဒၟံၚ်ရ။
နူကဵုကောံဓရီုဏံ နကဵုကံၚ်ဇြဳပၞာန် သွက်ဂွံထ္မံက်ရုပ်ရဴ တၚ်တုပ်စိုတ်ဏံဂှ် ကဵုကၠုၚ်ဇြဟတ်ဓရိုဟ်သာ်လဵုရောဟီုဂှ် ဒးမၚ်ကျောဝ်ဒၟံၚ်ဏီဏောၚ် မဒှ်ရ။
Ref: Nova News