ရေဝ်၊ ဂျူလာၚ် ၂၇
တွဵုရးဍုၚ်မန် ပွိုၚ်ဍုၚ်ရေဝ် ဗ္ဒါဲကွာန်စဳပျး ပ္ဍဲကဵုသ္ကုတ်ဂၠံၚ်ရေဝ်−ထဝါဲဂှ် ပေါဲဗ္တိုက်အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံ က္တဵုဒှ်ဒၟံၚ် အဆက်က်ရောၚ် ဂွံတီကေတ် ဇရေၚ်ညးဒေသတံရ။
ဒပ်ကံၚ်ဇြဳပၞာန် ပ္တိတ်ဒၟံၚ်ဇြဟတ် သွက်ဂွံကလေၚ်ထိၚ်ဒက် သ္ကုတ်ဂၠံၚ်ရေဝ်−ထဝါဲဂှ်ဝွံ စနူဂိတုဂျူလာၚ် သတ္တာဟတတိတုဲ ဒၞါဲဒေသဂကောံဇြဟတ်ပၠန်ဂတးတံ ချဳဒရာၚ်ဒၟံၚ်လ္ၚဵုတံဂှ် ထ္ပက်ကရောၚ်ပၞာန် လုပ်စိုပ်ချဳဒရာၚ်တံဂှ် ထပ်ကၠောန်သ္ပကၠုၚ်ရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ဂိတုဂျူလာၚ် ၂၅ အခိၚ်ဇိုၚ်သဝ်တ္ၚဲ ၜိုတ် ၃ နာဍဳ အကြာဒဒန်ဇုက်ကဵု ကွာန်စဳပျးဂှ် ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ်ဘာ်နာဍဳပြၚ်ရ။
သ္အာၚ်နူဂှ်ပၠန် ပ္ဍဲဂိတုဂျူလာၚ် ၂၆ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ်လေဝ် ဗ္ဒါဲကွာန်စဳပျး လ္တူဂၠံၚ်ကွဳစက် ရေဝ်−ထဝါဲဂှ် ပေါဲဗ္တိုက်ၜါလ္ပာ် ထပ်က္တဵုဒှ်လဝ်ရောၚ် ညးဒေသတံ ဟီုရ။
ဟိုတ်နူပေါဲဗ္တိုက်ဏံတုဲ ညးဍုၚ်ကွာန်အာတရဴတံဝွံ ဒးမၚ်လဝ် ပွိုၚ်မွဲနာဍဳပြၚ်တုဲ ညးဒေသတံဂှ်တှ်ေ ဟွံတိတ်မ္ၚးအာကၠုၚ်မွဲသာ် ဒးအောပ်မံၚ်လဝ် အပ္ဍဲသ္ၚိဂှ် ဂွံတီကေတ်ရ။
စပ်ကဵုအကာဲအရာပေါဲဗ္တိုက်ၜါလ္ပာ်တုဲ နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ ဗ္တိုက်သရိုက်တၠအဝဵုပၞာန် NMSP AD ဂှ်ကီု ညးတာလျိုၚ် ဒပ်ပံၚ်ကောံပၠန်ဂတးလ္ၚဵုတံကီုဂှ် လ္ပာ်သြၚ်လောန်တိုၚ်(မ်) ဆက်စၠောံလဝ်ကီုလေဝ် ဒုၚ်တဲသှ်ကဵုလဝ်ဂှ် ဟွံမွဲဏီရ။
တုဲကၠုၚ် ပ္ဍဲဂိတုဂျူလာၚ် ၂၄ တေံဂှ်လေဝ် ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲကုန်ကျာ် တၟအ်ကၞေၚ်ကွာန်တၟိဂှ် သီုဗော်ဍုၚ်မန်တၟိ AD မပါလုပ် ဂကောံဇြဟတ်ပၠန်ဂတးတံ အာစိုပ်ဗ္တိုက်လဝ်တုဲ အပ္ဍဲပေါဲဗ္တိုက်ဂှ် ကောန်ဒပ်ကံၚ်ဇြဳပၞာန်မွဲတၠ ချိုတ်အာလဝ်ရ။
ပ္ဍဲကဵုပွိုၚ်ဍုၚ်ရေဝ် မလလောၚ်တြးလဝ် ပရေၚ်အုပ်ဓုပ်ပၞာန် ပ္ဍဲတွဵုရးဍုၚ်မန် မွဲပွိုၚ်ဍုၚ်ဓဝ်ဂှ် ဟိုတ်နူဒပ်ကံၚ်ဇြဳပၞာန် လုပ်စိုပ်ထ္ပက်ကရောၚ်ပၞာန်တံတုဲ ပရေၚ်ပၞာန်ၜါလ္ပာ် သာကြံၚ်မ္ၚိုဟ်ဒၟံၚ်တုဲ ညးဒေသတံလေဝ် ပေါဲဗ္တိုက်ၜါလ္ပာ်တံ သ္ကာတ်မြဟ်ကၠုၚ်ဂှ် ဂွိၚ်ဒၟံၚ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီု−Daw Na Column