ကျံက်မေဝ်၊ ဂျူလာၚ် ၂၇
ပ္ဍဲကဵုပေါဲဗ္တိုက် မက္တဵုဒှ်လဝ် ပ္ဍဲရးသေံသ္ကုတ်သၟဝ်ကျာကဵု ပ္ဍဲကဵုပွိုၚ်ဍုၚ် ရးမာန္တလေဝ် အပ္ဍဲပွိုၚ်မွဲဂိတုဂှ် ဟိုတ်နူပရေၚ်ပန်ပှော်ဗ္တိုက် ဒပ်ကံၚ်ဇြဳပၞာန်တုဲ ကောန်အရာပ် ၁၂၅ တၠ ချိုတ်တုဲ ၁၆၇ တၠ ဇီုကပိုက်ကလိဂွံလဝ်ဝပ်ရောၚ် ဒပ်ပၞာန်တအာၚ် TNLA လလောၚ်ပ္တိတ်လဝ်ရ။
ပရေၚ်ပၞာန် ၁၀၂၇ စလဝ် နူဂိတုဂျောန် ၂၅ စဵုကဵုဂိတုဂျူလာၚ် ၂၅ အပ္ဍဲပွိုၚ်မွဲဂိတုဂှ် ပ္ဍဲကဵုပွိုၚ်ဍုၚ်ကျံက်မေဝ်၊ လာယှိုဝ်၊ နံၚ်ချဵု၊ တဳပဝ်၊ မိုဝ်မုက် ကေုာံ ပွိုၚ်ဍုၚ်မိုဝ်ကုတ်တံဂှ် ဟိုတ်နူပရေၚ်ဗ္တိုက် ကံၚ်ဇြဳပၞာန်တုဲ ကောန်အရာပ်တံ ချိုတ်အာလဝ်ရောၚ် သ္ဂးရ။
အပ္ဍဲကာလပေါဲဗ္တိုက်ဏံ ပ္ဍဲကဵုမသုန်ပွိုၚ်ဍုၚ် နူကဵုရးသေံသ္ကုတ်သၟဝ်ကျာဂှ် ဟိုတ်နူကံၚ်ဇြဳပၞာန် ဗ္တိုက်ကဵုလွဟ်ဇၞော် ကေုာံ ထောံမခတိုဟ် နကဵုက္ၜၚ်ကျာဂှ်တုဲ ကောန်ၚာ်သၟတ် ၅ တၠ ကေုာံ ကောန်ထပိုယ်၊ သဳလတံ မပါလုပ် မၞိဟ်တြုံ ၅၆ တၠ၊ မၞိဟ်ဗြဴ ၃၆ တၠ ဒးချိုတ်အာလဝ်တုဲ ကောန်အရာပ် ၁၀၉ တၠ ဇီုကပိုက်ကလိဂွံလဝ်ဝပ်ရောၚ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် ပ္ဍဲရးမာန္တလေဝ် ပွိုၚ်ဍုၚ်မိုဝ်ကုတ်ဂှ်လေဝ် ကောန်ၚာ် ၉ တၠ၊ မၞိဟ်တြုံ ၁၁ တၠ ကေုာံ မၞိဟ်ဗြဴ ၈ တၠ ချိုတ်လဝ်တုဲ ညးဍုၚ်ကွာန်ကောန်အရာပ် ၅၆ တၠ ဇီုကပိုက်ကလိဂွံလဝ်ဝပ်ရောၚ် TNLA သ္ဂးရ။
ဟိုတ်နူပရေၚ်ဗ္တိုက် ကံၚ်ဇြဳပၞာန် အပ္ဍဲပွိုၚ်မွဲဂိတုဂှ်တုဲ ပ္ဍဲဍုၚ်ကျံက်မေဝ် ကောန်အရာပ်ချိုတ်အာတံ က္တဵုဒှ်လဝ် ဗွဲမဂၠိုၚ်တုဲ ပ္ဍဲဍုၚ်လာယှိုဝ်ဂှ်တှ်ေ ဒှ်ဒုတိယဂၠိုၚ်အိုတ်ရ။
ကောန်အရာပ်ဇီုကပိုက်ချိုတ် ပ္ဍဲရးသေံသ္ကုတ်သၟဝ်ကျာဂှ်ဝွံ ဟိုတ်နူဇြဟတ်ပၠန်ဂတးတံ ပန်ဗ္တိုက်ကဵု ကမ်လှောဝ် (ရှော့တိုက်ဒုံး) တံဂှ်ဏောၚ် လ္ပာ်ကံၚ်ဇြဳပၞာန် ခၠေဝ်ပၠန်ကၠုၚ် နူကဵုလိက်ပရိုၚ်တြးဝါဒမွဲကဆံၚ်ရ။
ဟိုတ်နူပေါဲဗ္တိုက် နူရးသေံသ္ကုတ်သၟဝ်ကျာတုဲ သီုဘာဗ္တောန်လိက် ကေုာံ ဘာလကျာ်တံဂှ် ၁၀၈ မ လီုလာ်အာလဝ်တုဲ ညးဒေသ ၃၀၀၀၀ ပြၚ်ဝွံလေဝ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ဂွံတီကေတ် အတိုၚ်တၚ်လလောၚ်တြး TNLA ရ။
ပ္ဍဲပရေၚ်ပၞာန် ၁၀၂၇ သ္ကုတ် ၂ ဏံ ဒပ်ပၞာန်တအာၚ် TNLA ၊ MDF-PDF ကေုာံ ဒပ်ပံၚ်ကောံ PDF (မိုးကုတ်ဗျူဟာ) တံ သီဂွံလဝ် ဍုၚ်နံၚ်ချဵု တွဵုရးသေံ၊ ဍုၚ်သေအ်ကူ ကေုာံ ပွိုၚ်ဍုၚ်မိုဝ်ကုတ် ရးမာန္တလေဝ်တံ မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ