မတ်မလီု၊ ဂျူလာၚ် ၂၇
သ္ၚိဒၟံၚ်ကွာန်ဓမ္မသ ပၟတ်တူဒှ်အာလဝ်ဆောံ ဟိုတ်နူဒပ်ကံၚ်ဇြဳပၞာန် ဗ္တိုက်ကဵုတရဴတိုက်၊ တရဴဍာ်၊ တရဴကျာတံဂှ် သွက်ဂွံကလေၚ်သိုၚ်သ္ၚိဒၟံၚ်တံဂှ် ဂကောံအလဵုအသဳတွဵုရးဍုၚ်မန် ကံၚ်ဇြဳပၞာန်ခါန်ကၞက်ဂှ်ကဵု ဌာနဝန်ဇၞော်ကောပ်ကာဲဘဲအန္တရာယ်တံ ပအပ်ကဵုလဝ်သြန်ထံက်ပၚ် သွက်သ္ၚိ ၃၈၀ ရ။
ပ္ဍဲကဵုဂကောံရီုဗၚ် ဒုၚ်လဝ်တဲ သြန်ထံက်ပၚ်တံဂှ် သီုသၚ်မန်ဂမၠိုၚ် မပါလုပ် ဂကောံဗော်သွးမှာဇန်မန်တံ၊ ဗော်ညဳသၟဟ်မန် ကေုာံ ညးတာလျိုၚ် ဗော်ဍုၚ်မန်တၟိတံဂှ်လေဝ် တိုန်စိုပ်လဝ်ရ။
ပ္ဍဲဂိတုဂျူလာၚ် ၂၅ ပ္ဍဲကဵုဘာသာသနာ ၂၅၀၀ လ္တူဍုၚ်မတ်မလီုဂှ် ဂကောံအလဵုအသဳတွဵုရး ပအပ်ကဵုလဝ် သြန်ထံက်ပၚ် မွဲသ္ၚိ ၁၀ ကိုဋ်ဒ္ကေဝ်၊ အပံၚ်ဖအိုတ် ၁၉၀၀ ကိုဋ်တုဲ ဌာနဝန်ဇၞော်ကာပယျဵုဂှ်လေဝ် ပအပ်ကဵုလဝ် ပမာဏသာ်ဏံကီုဂှ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
သ္အာၚ်နူဂှ်ပၠန် ဌာနဝန်ဇၞော်ရီုဗၚ်ဟံၚ်ပြာ် ကေုာံ ကလေၚ်ဖျေံဒၞါဲဝါဲ တွဵုရး၊ ဌာနက္ဍိုက်ပ်ကောပ်ကာဲဘဲအန္တရာယ်တံ ထံက်ပၚ်လဝ် မွဲသ္ၚိမ္ဂး ၂ ကိုဋ်ဒ္ကေဝ်၊ မ္ၚးနူကဵုသြန်ထံက်ပၚ်မွဲလ္ၚီကိုဋ်ပြၚ် ပါလုပ်သီုကဵုကပေါတ်ထံက်ပၚ်တံဂှ် ထံက်ပၚ်ကဵုလဝ် သီုကဵုကဠာကပေါတ်ရီုဗၚ်ဟံၚ်ပြာ် ၁၆ သာ်ပါတံဂှ်ရ။
တၠဒါန်မ္ၚးမွဲတၠဂှ်လေဝ် သွက်ကၟဳသောတ်ဂှ် ကဵုလဝ်ဒါန် သြန်မွဲလ္ၚီကိုဋ်တုဲ၊ သွက်ကပေါတ်သိုၚ်ခၞံသ္ၚိတံဂှ် ဌာနအလဵုအသဳမဆေၚ်စပ်တံ ကေုာံ တၠဒါန်ဂမၠိုၚ် ကဵုလဝ်သြန်ထံက်ပၚ် သွက်ကၟဳသောတ် အပံၚ်ဖအိုတ် ၜါကၠံၜါစှော်ကိုဋ်ဒ္ကေဝ်ပြၚ်ရောၚ် ကံၚ်ဇြဳပၞာန် ထ္မံက်ထ္ၜးလဝ်ရ။
ညးဒေသကွာန်ဓမ္မသမွဲတၠဂှ် “ဍေံတံဟီုလဝ် အတေံ (ဘာသာသနာ ၂၅၀၀) ဂှ်လေဝ် ကဵုလှုဲဏောၚ်။ ကဵုသီုသောတ်ဏောၚ်။ ဟီုမံၚ်စုၚ်ရ။ ဆ္ဂး ဟွံဂွံဏီပုဟ်၊ ချိုတ်ပၠိုတ်ဂှ် ဟွံဂွံတီဏီပုဟ်။ တ္ၚဲယးမှ ဂွံဏောၚ်ဂှ် ညးဟီုရ” သာ်ဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဗ္ဒါဲပန်ဂိတု အပ္ဍဲပေါဲဗ္တိုက်ကွာန်ကအ်ဗိန်ဂှ် ဒပ်ပံၚ်ကောံပၠန်ဂတးတံ လုပ်စိုပ်ချဳဒရာၚ် ပ္ဍဲကွာန်ဓမ္မသ ဒေသၜဳဂြာၚ် ပွိုၚ်ဍုၚ်ကျာ်မြဟ်ဂှ်ဂးတုဲ ဒပ်ကံၚ်ဇြဳပၞာန် ကၠောန်သ္ပဗ္တိုက်လဝ် ပ္ဍဲဂိတုမာတ် ၂၇ တေံရ။
အတိုၚ်တၚ်လလောၚ်တြး ကံၚ်ဇြဳဖေဝ်ဒရာဍုၚ်မန် MSFC လလောၚ်ပ္တိတ်လဝ် ပ္ဍဲဂိတုမာတ် ၂၈ တေံဂှ်မ္ဂး ဟိုတ်နူဒပ်ကံၚ်ဇြဳပၞာန် ရပ်စပ်ပၞာန်တိုက်၊ ပၞာန်ဍာ်၊ ပၞာန်ကျာတုဲ ပန်ပှော်လဝ် လွဟ်ဇၞော်ပန်ခြာဇမ္ၚောဲ ပ္ဍဲကွာန်ဓမ္မသဂှ်တုဲ သ္ၚိဗ္ဒါဲ ၃၀၀ ပၟတ်တူဒးလီုအာလဝ်ရ။
ဟိုတ်ဂှ်ရ ညးဍုၚ်ကွာန်ဒေသ ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ ဒဵုကဵုအခိၚ်လၟုဟ် ဒးဇူဒီုဒၟံၚ် ပ္ဍဲကဵုဘာလကျာ် ဍုၚ်မတ်မလီု၊ မတ္တမ ကေုာံ ဍုၚ်ၜါသွာၚ်တံဂှ်ရ။
ညးသ္ၚိပၟတ်တူလ္ၚဵုတံဂှ်တှ်ေ နကဵုမဒါန် ဂကောံကဵုအရီုဗၚ်ဘဲပၞာန်မန်တံဂှ် သိုၚ်ခၞံလဝ် တာဲယာယဳ ပွဳပွူ ၁၀၀ တုဲ ကလေၚ်မံၚ်ဒၟံၚ်တံလေဝ် နွံဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−MOI