မတ်မလီု၊ ဂျူလာၚ် ၂၇
ပ္ဍဲတွဵုရးဍုၚ်မန် အပ္ဍဲသၞာံဏံ ကံၚ်ဇြဳပၞာန် စွံပွန်လ္တူကောန်အရာပ်တံတုဲ ပွဖံက်ပ္ကဝ်အခေါၚ်အရာမၞိဟ်တံဂှ် ကလိလောန်ကၠုၚ် မံက်က်ထေၚ်ၚ်ရောၚ် ညးဒေသတံကဵု ညးတာလျိုၚ် ဂကောံအခေါၚ်အရာမၞိဟ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ ပ္ဍဲကဵုကွာန် ဒၞါဲညးဍုၚ်ကွာန်ကောန်အရာပ်တံဂှ် ပေါဲဗ္တိုက်ဟွံမွဲမွဲသာ် ပန်ပှော်လွဟ်ဇၞော်ကီု၊ ဗ္တိုက်ထောံမခတိုဟ် နကဵုက္ၜၚ်ကျာကီု၊ အပ္ဍဲပေါဲဗ္တိုက်ဂှ် ရပ်ဒက်ညးဒေသတံ နဒဒှ်ဇွောံစဵုဒၞါပၞာန်ကီု၊ ရပ်ဒက်ဍဵုဍိုက်ပျဲပျာံတံကီု၊ ထ္ၜးဟိုတ်နာနာတုဲ ဆက်ကလိလောန်ဒၟံၚ် ပွရပ်စပ်တံဂှ်ရ။
ဗွဲတၟေၚ် ကံၚ်ဇြဳပၞာန်ဝွံ ပ္ဍဲကဵုဒေသ ဂကောံဇြဟတ်ပၠန်ဂတး ချဳဒရာၚ်ဇြဟတ်ခိုဟ် မပ္တံကဵုပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု၊ ကျာ်မြဟ် ကေုာံ ပ္ဍဲပွိုၚ်ဍုၚ်ရေဝ်တံဂှ် ပွဖံက်ပ္ကဝ်အခေါၚ်အရာမၞိဟ် စွံပွန်လ္တူညးဍုၚ်ကွာန်ကောန်အရာပ်တံဂှ် သာကၠောန်သ္ပကၠုၚ်ရ။
ပ္ဍဲကဵုဏံ ပ္ဍဲဂိတုဂျူလာၚ် ၁၉ တုဲကၠုၚ်တေံ ပေါဲဗ္တိုက်ဟွံမွဲမွဲသာ် ဟိုတ်နူထောံလဝ်မခတိုဟ် နကဵုက္ၜၚ်ကျာ ပ္ဍဲကွာန်ၚပုအေန် ပွိုၚ်ဍုၚ်ကျာ်မြဟ်တံဂှ်တုဲ အပံၚ်မၞိဟ် ၃၀ ပြၚ် ချိုတ်အာလဝ်တုဲ ညးကလိဂွံဝပ် နွံလဝ် ဗွဲမဂၠိုၚ်ဂၠေၚ်တုဲ လၟေၚ်ဒဒှ်ဏံဝွံ အပ္ဍဲကာလသီအဝဵုဏံ ပ္ဍဲကဵုတွဵုရးဍုၚ်မန်ဂှ် ဒှ်ပွကံၚ်ဇြဳပၞာန် ပြိုက်ဂစိုတ်လဝ် နကဵုဂအုံဗွဝ် ပရေံအိုတ်ရ။
သ္အာၚ်နူဂှ်ပၠန် ပ္ဍဲဂိတုဂျူလာၚ် ၂၃ တေံဂှ်လေဝ် ဒပ်ကံၚ်ဇြဳပၞာန် ဟိုတ်နူပန်ပှော်လွဟ်ဇၞော် ပ္ဍဲကွာန်ပျေန်ကတိုဝ် ပွိုၚ်ဍုၚ်ကျာ်ထဝ်ဂှ်တုဲ ညးဒေသ ၆ တၠ ချိုတ်တုဲ ၁၂ တၠ ဇီုကပိုက်ကလိဂွံလဝ်ဝပ်တုဲ ပ္ဍဲဒုၚ်သယိတ် ဟိုတ်နူလွဟ်ဇၞော်တုဲ ညးဒေသ ၂ တၠ ဒးချိုတ်အာလဝ်ရ။
နာဲအာဲမန် ပရိုဝ်ဂရာမ်ဒါရိုက်တာ ဌာန်ရိုက်ကၞက်အခေါၚ်အရာမၞိဟ်ဍုၚ်မန်ဂှ် ပြဝကံၚ်ဇြဳပၞာန် ဖံက်ပ္ကဝ်အခေါၚ်အရာမၞိဟ်တံဂှ်ဝွံ ဒှ်ကၠုၚ်ဒၟံၚ်ဗီုပြၚ် ဖံက်ပ္ကဝ်ကလိလောန်ဒၟံၚ် လ္တူဂကူမၞိဟ်တံဂှ်တုဲ ပွမဓဇန်ကြမ်ကြ ဟွံမွဲကဵုပွဗ္စာရဏာတံဂှ်ဝွံ စိုပ်ကၠုၚ်တၞောတ်အထောဋ်ရဂှ် ဟီုရ။
“အတိုၚ်ပိုယ်တီဂှ်တှ်ေ ကံၚ်ဇြဳပၞာန်ဂှ်တှ်ေ ပ္ဍဲကဵုဒေသစၟတ်လဝ်ဂှ် နကဵုဒပ်ဍေံတံ ကၠောန်ကၠုၚ်ပွဖံက်ပ္ကဝ်အခေါၚ်အရာမၞိဟ်တံ အဆက်က်ရ။ ဗွဲကြဴဏံ ဒှ်ကၠုၚ်သာ်လဵုရောဟီုတှ်ေ ပွမဖံက်ပ္ကဝ်သာ်ဏံဂှ်ဝွံ ဒှ်ကၠုၚ်ဗီုပြၚ် ဖံက်ပ္ကဝ်ကလိလောန်ဒၟံၚ် လ္တူဂကူမၞိဟ်တံဏောၚ်။ လၟုဟ်ဂှ်တှ်ေ ကြမ်ထ္ၜးဏာဏောၚ်၊ ညံၚ်ဂွံဖေက်ဂှ် ကၠောန်ဏာဏောၚ် ရပ်စပ်ဒၟံၚ် ဗျူဟာသာ်ဏံရ။ ပွဖံက်ပ္ကဝ်ဏံဂှ်တှ်ေ တၞောတ်အထောဋ်ရဏောၚ်။ အခိၚ်ပိုယ်တံ ကၠောန်ဒၟံၚ်ကလောန်စၟတ်သမ္တီ ပွိုၚ် ၂၀/၂၅ သၞာံဏံဂှ်တှ်ေ ပြဝဓဇန်ကြမ်ကြ ပြဝဟွံမွဲကဵုဗ္စာရဏာမၞိဟ် လ္တူနူဏံဂှ် ပိုယ်တံ ဟွံကေၚ်ဆဵုဏီပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန်ဝွံ ပ္ဍဲကဵုပေါဲဗ္တိုက် က္တဵုဒှ်ဒၟံၚ် အလုံဍုၚ်မွဲဂှ် ဟိုတ်နူကျဗြံဒၟံၚ်ဂှ်ရ ကၠောန်ကၠုၚ်ဒၟံၚ် ပွဖံက်ပ္ကဝ်အခေါၚ်အရာမၞိဟ်တံ အိုတ်အစောံဂှ်ရ နကဵုညးဍုၚ်ကွာန်တံ စွံသတိတုဲ သွက်ဂွံမံၚ်စံၚ်အိုတ်ဂှ် ညးဖ္တိုက်ဖ္အောဝ်လဝ်ရ။
အတိုၚ်လိက်ဒုၚ်စဳရေၚ် လိက်လၟေၚ်လ္ဂန်အိန်ဂှ်မ္ဂး ပ္ဍဲတွဵုရးဍုၚ်မန် သၞာံဏံ နူဂိတုဂျာန္နဝါရဳ စဵုကဵုဂိတုဂျောန် အပ္ဍဲပွိုၚ်တြဴဂိတု ဟိုတ်နူပွဖံက်ပ္ကဝ်အခေါၚ်အရာမၞိဟ်ကံၚ်ဇြဳပၞာန်တံတုဲ ကောန်အရာပ် ၇၂ တၠ ချိုတ်တုဲ ၁၃၈ တၠ ကလိဂွံလဝ်ဝပ်တုဲ ပ္ဍဲကဵုဏံ ကောန်ၚာ်သၟတ်တံ ပါလုပ်လဝ် ၁၅ တၟံကၠံရ။
မွဲလ္ပာ်ဂှ်ပၠန် ကုညးဗြဴနူဒေသ ပဋိပက္ခပရေၚ်ပၞာန် က္တဵုဒှ်ဒၟံၚ်တံဂှ် ကံၚ်ဇြဳပၞာန် ကလိလောန် ပွပကီုပရာပ်စပ်ကဵုလိၚ်ကီု၊ ရပ်ဒက်ဟွံဗဗွဲကဵုသၞောဝ်ကီု၊ လုပ်ကၠတ်ဂၠံက် ကပေါတ်မၞုံကဵုၚုဟ်မး ပ္ဍဲကဵုသ္ၚိဒၟံၚ် ညးဍုၚ်ကွာန်ပိုၚ်တံဂှ်ကီု၊ စံၚ်ပလီုပလာ်တံဂှ်လေဝ် ကလိလောန်ဒၟံၚ်ရ။
အတိုၚ်လိက်ဒုၚ်စဳရေၚ် ရုၚ် UNOCHA လလောၚ်ပ္တိတ်လဝ် ပ္ဍဲဂိတုဂျောန် ၁၀ တေံဂှ်မ္ဂး ဟိုတ်နူပဋိပက္ခပရေၚ်ပၞာန် သ္ကာတ်မြဟ်ကၠုၚ်ဂှ်ကဵု ဟိုတ်နူပွဖံက်ပ္ကဝ်အခေါၚ်အရာမၞိဟ် ကံၚ်ဇြဳပၞာန်တံဂှ်တုဲ ပ္ဍဲဍုၚ်ဗၟာ ညးဒဒိုက်ပါဲဒဴဘဲပၞာန် သၠုၚ်တိုန်ကၠုၚ် စဵုကဵု ၃ ပြကောဋိကိုဋ်ပြၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KHRG