မတ်မလီု၊ ဂျူလာၚ် ၂၈
ပ္ဍဲတွဵုရးဍုၚ်မန် ဟိုတ်နူဗြဲရိုပ်ဂူ ဍာ်ဇၞော်ဍာ်ကလိုပ်တံတုဲ ကွာန်ဗ္ဒါဲ ၁၀၀ ဍာ်ဗၠိုက်ဒၟံၚ်တုဲ ညးဍုၚ်ကွာန်ဒးဘဲပၞာန် နွံဒၟံၚ်ကဵုဠက်ရောၚ်ဂှ် ဂွံတီကေတ် အတိုၚ်ဂလာန် ညးတာလျိုၚ် ဂကောံရီုဗၚ်ဟံၚ်ပြာ်မှာဇန်တံရ။
စနူဂိတုဂျူလာၚ် ၂၄ တုဲကၠုၚ်တေံတုဲ ဟိုတ်နူဗြဲဂူလဝ် ဗွဲမသ္ကာတ်မြဟ်တုဲ အပ္ဍဲတွဵုရး ပွိုၚ်ဍုၚ်ဂမၠိုၚ် မပ္တံကဵုပွိုၚ်ဍုၚ်ၜဳကလေၚ်၊ သဓီု၊ ပံၚ်၊ မတ်မလီု၊ ၜါသွာၚ်၊ ဇြပ်ဗု၊ ရေဝ်၊ မုဟ်ဍုၚ် ဒၞါဲအရာပ်သဝ်ဝ်တံကဵု ပ္ဍဲကဵုကွာန်တံဂှ် ဍာ်ဇၞော်ဍာ်ကလိုပ် စက္တဵုဒှ်လဝ်ရ။
ဍာ်ဇၞော်ကီု သီုကဵုဍာ်ၜဳ ထပ်သၠုၚ်တိုန်ကၠုၚ်ဂှ်တုဲ စနူဂိတုဂျူလာၚ် ၂၇ တုဲ ကွာန်နူကဵုပွိုၚ်ဍုၚ်ၜဳကလေၚ်၊ သဓီု၊ ပံၚ်၊ ရေဝ် ကေုာံ ပွိုၚ်ဍုၚ်ဇြပ်ဗုတံဂှ် ဗ္ဒါဲ ၁၀၀ ဍာ်ဗၠိုက်ဒၟံၚ်တုဲ ပွိုၚ်ဍုၚ်ၜဳကလေၚ်ဝွံ ကွာန် ဗ္ဒါဲ ၆၀ ဍာ်ဗၠိုက်ဒၟံၚ် ဂၠိုၚ်အိုတ်ရ။
အပ္ဍဲကဵုပွိုၚ်ဍုၚ်ၜဳကလေၚ် ဍာ်ဇၞော်ဂှ် ညးဒေသနူအရာပ်လ္တူဍုၚ် ၜိုတ် ၂၀၀၀ ပြၚ်ဓဝ်ရဟေၚ် ပလံၚ်ကဵုလဝ် ဒၞါဲဗ္ဒိုပ်ဟံၚ်ပြာ်ယာယဳတံမာန်လဝ်တုဲ ညးဒေသ နူကဵုကွာန်ရးတံဂှ်တှ်ေ ဒးဆုဲပြံၚ်ဒၟံၚ် ဒၞါဲဗၠးဘဲတံ နကဵုအစဳဇန်ညးကုညးဂှ် ညးတာလျိုၚ် ဂကောံရီုဗၚ်ဟံၚ်ပြာ်တံ လဴထ္ၜးလဝ်ရ။
ဂကောံရီုဗၚ်ဟံၚ်ပြာ်တံ ဂွံအာစိုပ် ကွာန်ဍာ်ဗၠိုက်ဒၟံၚ်တံဂှ် ဂၠုၚ်စက်ကီု ကပေါတ်ထံက်ပၚ်တံကီုဂှ် ဟွံရုမ်ဂပ် ဒှ်ဒၟံၚ်တုဲ လ္ပာ်ကံၚ်ဇြဳပၞာန်လေဝ် ဒဵုကဵုအခိၚ်လၟုဟ် ရီုဗၚ်ရေၚ်တၠုၚ်ကဵုလဝ် စဵုကဵုဟွံမွဲ အောန်ဒၟံၚ်ရောၚ် သ္ဂးရ။
ဟိုတ်နူဍာ်ဇၞော်ဍာ်ကလိုပ်တုဲ တ္ၚဲဏံ နူဂယးတေံ ပ္ဍဲကဵုသ္ကုတ်ဂၠံၚ်လ္ဂုၚ်−ထဝါဲ နူကဵုပွိုၚ်ဍုၚ်ၜဳကလေၚ်၊ သဓီု၊ ပံၚ်၊ မုဟ်ဍုၚ်၊ ဇြပ်ဗု၊ ပွိုၚ်ဍုၚ်ရေဝ်တံဂှ် ဂၠံၚ်ကွဳစက်တံဂှ် ဍာ်ကၠောံဒၟံၚ်တုဲ ကွဳစက်ဇၞော်၊ ကွဳစက်ဍောတ်တံဂှ် စွံသတိတုဲ ဒးအာကၠုၚ်ဒၟံၚ်ရ။
ပ္ဍဲကဵုသ္ကုတ်ဂၠံၚ်ၜဳကလေၚ် ကဵု ဂၠံၚ် (ကျိုက္ကော်) ဂှ် ဂၠံၚ်ကွဳစက် ဍာ်ကၠောံ ထပ်ဒှ်ဒၟံၚ်တုဲ ကၟာတ်လဝ်အခေါၚ်တတ်ကၠောံအာကၠုၚ်တံ ယာယဳရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media