ဗဳယေန်ကျေန်၊ ဂျူလာၚ် ၂၆
အကြာကံၚ်ဇြဳပၞာန်ကဵု ဂကောံရပ်လွဟ်မဟာမိတ်တံ အခိၚ်ပေါဲဗ္တိုက်သ္ကာတ်မြဟ်ကၠုၚ်ဂှ် ကယျာန်ပါဲဒၟံၚ် သွက်ဂွံသဳကၠဳပ္ညဳပ္ညပ်ဂှ်ရ ဂိတုဂျူလာၚ် ၂၅ ပ္ဍဲကောံဓရီုအာဇြဳယာန်ဂှ် ဝန်ဇၞော်ကာဍုၚ်သ္အာၚ်အေန်ဒိုဝ်နဳယှာ ပ္တိုန်ဒုဟ်ပါ်ပါဲလဝ် ဂကောံဝေၚ်ဒၟံၚ်ပၞာန် ပ္ဍဲဍုၚ်ဗၟာတံဂှ်ရ။
အခိၚ်ကၠောန်ဗဒှ်လဝ် ကောံဓရီုကၟာတ်တြၚ် ဝန်ဇၞော်ကာဍုၚ်သ္အာၚ်အာဇြဳယာန် ပ္ဍဲဍုၚ်လာအိုဝ်ဂှ် ဝန်ဇၞော်ကာဍုၚ်သ္အာၚ်အေန်ဒိုဝ်နဳယှာ ရာတ်နဝ် မာသူဒဳဂှ် နကဵုကံၚ်ဇြဳပၞာန် ကြဴနူသီအဝဵုတုဲ ဂွံမွဲၜါဂိတုဂှ် ကတိပရေၚ်ၜိုဟ်လလမ်ကဵုလဝ်ဂှ် ယဝ်ရဟွံသ္ပဂရုပုဟ်ဟီုမ္ဂး နူကဵုကောံဓရီုအာဇြဳယာန်တံဂှ် ဒးတိတ်အာမ္ၚးဝိုၚ်ဏောၚ် ဟီုလဝ်ရ။
ပွဖ္တိုက်ဖ္အောဝ်အာဇြဳယာန် သွက်ဂွံထ္မံက်ရုပ်ရဴ တၚ်တုပ်စိုတ် ၅ တၚ်ဂှ် ကံၚ်ဇြဳပၞာန် ဟွံသ္ပဂရုတုဲမံၚ်လဝ်ဂှ်ရ ဒၟါနူပြသၞာဍုၚ်ဗၟာတုဲ က္တဵုဗဒှ်ကဵုပရေၚ်ဇီုကပိုက် လ္တူဓဝ်ပတှ်ေ ဂကောံအာဇြဳယာန်ရ။
ဟိုတ်နူဟွံဒ္ဂေတ်ဗက်သာ်ဏံတုဲ အာဇြဳယာန် တာဒၞါလဝ် သ္ကိုပ်ဗိုလ်ပၞာန်ဂမၠိုၚ် နူကဵုတိုန်စိုပ်ကောံဓရီုအာဇြဳယာန်ဂှ်ကီုလေဝ် ကုကလုတ်တမာန် ကဆံၚ်သၠုၚ်မွဲတၠဂှ် ကဵုလဝ်အခေါၚ်တိုန်စိုပ်ရ။
စပ်ကဵုပရေၚ်ထ္မံက်ရုပ်ရဴ တၚ်တုပ်စိုတ်အာဇြဳယာန် ၅ တၚ်ဂှ်တုဲ ပရေၚ်တောတက်ဟွံမွဲဏီပုဟ်ဟီုမ္ဂး ပ္ဍဲကဵုကောံဓရီု ကေုာံ ပေါဲသဳကၠဳ ဝန်ဇၞော်ကာဍုၚ်သ္အာၚ်အာဇြဳယာန်တံဂှ် နူဍုၚ်ဗၟာ အခေါၚ်တိုန်စိုပ်ဂှ် ရဲနူကဵုကဆံၚ်ပရေၚ်ဍုၚ်ကွာန်ဟွံသေၚ်တံဂှ်ရ ဒးဆက်ကဵုအာအခေါၚ်တိုန်စိုပ်တံဏောၚ်ဂှ် ဝန်ဇၞော် မာသူဒဳ ဟီုရ။
ပ္ဍဲကောံဓရီုတံဂှ်တှ်ေ ညးစၞးဍုၚ်ဗၟာတံ ဟီုဂးလဝ် အရာရာအိုဿီု ညံၚ်ပြေပြံၚ်ဒၟံၚ်ရောၚ် ဝန်ဇၞော် မာသူဒဳ ဟီုလဝ်တုဲ အကာဲအရာဗလးတိဏံဂှ်တှ်ေ ဒဒှ်ရဟွံပြေပြံၚ် ထ္ၜးပျးဒၟံၚ်ဂှ် သ္ဂးရ။
သၞာံတုဲကၠုၚ်တေံ ဥက္ကဌအာဇြဳယာန်တြေံ အေန်ဒိုဝ်နဳယှာ ပ္တိတ်လဝ်ဇြဟတ် ညံၚ်ဂကောံဗော်သွး မဆက်စပ် ပ္ဍဲဍုၚ်ဗၟာတံသီုဖအိုတ် ဂွံပါလုပ် ပ္ဍဲပေါဲသဳကၠဳဝိုၚ်တက်ကျာဂှ်ကီုလေဝ် ပွပ္တိတ်ဇြဟတ်ပရေၚ်ၜိုဟ်လလမ် အာဇြဳယာန်ဂှ်ဝွံ ဆက်အာဂတဟွံမာန် ဒှ်ဒၟံၚ်ရ။
ဂကောံရပ်လွဟ်ကောန်ဍုၚ်အရၚ်တံကဵု ဒပ်ပၠန်ဂတးတံ သီဂွံလဝ် တိဍာ်ဗွဲမဂၠိုၚ်တုဲ ပ္ဍဲအကာဲအရာဒပ်ပၞာန် အုပ်ဓုပ်ပေၚ်ၚ်ဟွံမာန်ရဂှ် တၚ်စၟဳပရေၚ်သဳကၠဳတံ ဟွံကၠးဖ္ဍးဒှ်ကၠုၚ်ရ။
ပ္ဍဲဍုၚ်ဗၟာ စပ်ကဵုပေါဲသဳကၠဳတံ ဟွံမွဲဂှ်တုဲ ဒဒှ်ရဒှ်ဓဝိၚ်ဂှ် ဝန်ဇၞော်ကာဍုၚ်သ္အာၚ် မလေဝ်ယှာ ဟီုလဝ်ရ။
ဝန်ဇၞော်ကာဍုၚ်သ္အာၚ် ဍုၚ်သေံဂှ်တှ်ေ သွက်ဂွံသဳကၠဳ ကုဂကောံဗော်သွးမဆက်စပ် ပ္ဍဲဍုၚ်ဗၟာတံသီုဖအိုတ်ဂှ် ပ္ဍဲအရာပ္တိတ်ဇြဟတ်ပရေၚ်ၜိုဟ်လလမ်ဂှ် ညံၚ်ဂွံပါလုပ်အာ နူကဵုအခန်ကဏ္ဍဇၞော်ဇၞော်ဂှ် နကဵုဍုၚ်သေံ ကလိဂွံလဝ်ထံက်ဂလာန် အာဇြဳယာန်ရောၚ် ဟီုလဝ်ရ။
Ref: Reuters