ဝါယှေန်တာန်၊ ဂျူလာၚ် ၂၇
ပေါဲသဳကၠဳဖအိုတ်ကၠေံပေါဲပၞာန် ဟာမာသ် ကေုာံ အေဿရေ ပ္ဍဲဍုၚ်ရဝ်မဂှ် ဒဒှ်ရဗလးအာ ဂကောံညးစၞးဂှ် သ္ကိုပ်ဝန်ဇၞော်အေဿရေ ဗေန်ဂျမေန် နေတာန်ညာဟု ဟီုလဝ်ရ။
ဆ္ဂး ဂလာန်ဒုသမ္မတ အမေရိကာန် ကာမာလာ ဟာရေသ် ဟီုလဝ် စပ်ကဵုပရေၚ်ဒဒှ်သ္ဇက်ဒးအောန်စိုတ် ပ္ဍဲဂါဇြာဂှ်တုဲ မံၚ်အာသ္ၚိတ်တ်ဟွံသေၚ်ပုဟ်ဂှ်တုဲ သ္ကိုပ်ဝန်ဇၞော် နေတာန်ညာဟု ကလေၚ်ခၠေဝ်ပလန်လဝ်ရ။
ကြဴနူသဳကၠဳ ကုသမ္မတအမေရိကာန် ဗိုၚ်ဒေန်၊ ဒုသမ္မတ ဟာရေသ်တံ ပ္ဍဲဝါယှေန်တာန်တုဲဂှ် အခိၚ်အာစိုပ်သဳကၠဳ ပ္ဍဲသ္ၚိဒၟံၚ်ဒဝ်နေဝ်ထြာပ် တွဵုရးဖလဝ်ရဳဒါဂှ် နေတာန်ညာဟု ဟီုပ္တိတ်လဝ် သာ်ဏံရ။
စပ်ကဵုကိစ္စဏံတုဲ ပရေၚ်လညာတ်ဟွံတုပ် အကြာအမေရိကာန် ကေုာံ အေဿရေတံ ဂွံဍန်စှ်ေအာဂှ် ကၠောန်ၜိုတ်ဒၟံၚ်ရောၚ် အလဵုအသဳအမေရိကာန် ဟီုလဝ်ရ။
ပ္ဍဲဂါဇြာ ညးဍုၚ်ကွာန်ကောန်အရာပ်တံ ဒးဇီုကပိုက်ဒးဒုၚ်စမံၚ်သိုၚ်တုဲ နကဵုဂကောံမဆက်စပ်ဂမၠိုၚ် နွံပၟိက်ဒးကေတ် တၚ်တုပ်စိုတ်မွဲမွဲယျဂှ် ဒုသမ္မတ ဟာရေသ် ဟီုလဝ်ရ။
နကဵုအေဿရေ ဖအိုတ်ကၠေံပေါဲပၞာန် နကဵုအကာဲအရာဂီုဂီုကၠီုကၠီုဂှ်တုဲ ဒးကလေၚ်ဗလး မၞိဟ်ဒးဒုၚ်သ္ပဒၞန်တံဏောၚ်တုဲ နကဵုကောန်ဍုၚ်ပါလက်သတိုၚ်တံလေဝ် နကဵုဂုဏ်သိက္ခာနွံနွံ၊ အခေါၚ်မံၚ်စံၚ် နကဵုအခေါၚ်အရာပေၚ်ၚ်တံ ထေက်ကဵုဒးဂွံဂှ် ဒုသမ္မတ ဟာရေသ် သ္ဂးရ။
သ္ကိုပ်ဝန်ဇၞော် နေတာန်ညာဟုဂှ် ဟိုတ်နူကဵုဒၟံၚ်ဂရိုဟ် နကဵုပရေၚ်ပၞာန်ဂှ်ရ ပွမပ္တိတ်ဇြဟတ် စပ်ကဵုပရေၚ်ဒေါအ်ပန်ပှော်တံ မံက်တိတ်ကၠုၚ်လဝ်ရောၚ် ဟီုရ။
ဆ္ဂး အကြာအမေရိကာန် ကေုာံ အေဿရေ အရာမလညာတ်ထ္ကးပြးတံ ဟွံမွဲဟီုဂှ် နကဵုဒုသမ္မတ ဟာရေသ် ဒဒှ်ရဒးကၠိုဟ်လဝ်ဂှ် သ္ကိုပ်ဝန်ဇၞော်အေဿရေ ဟီုရ။
ရုၚ်သၞောဝ်ဓဝ် ဂဗုတ်ရာဇဝတ်ဍုၚ်သ္အာၚ်ဂှ် ပ္တိတ်လဝ်လိက်ဝါရာန်ရပ် ကုသ္ကိုပ်ဝန်ဇၞော်နေတာန်ညာဟု ကေုာံ က္ဍိုပ်သ္ကိုပ်ဟာမာသ်ဂမၠိုၚ် နကဵုတၚ်စောဲစပ် အမှုရာဇဝတ်ပၞာန်ရ။
ပေါဲသဳကၠဳ သွက်ဂွံဖအိုတ်ကၠေံပေါဲပၞာန် အေဿရေ−ဟာမာသ် ပ္ဍဲဍုၚ်အဳတလဳ ဍုၚ်ရဝ်မဂှ် ညးစၞးကာတာ၊ အဳဂျေပ် ကေုာံ အေဿရေတံ တိုန်စိုပ်အာဏောၚ်တုဲ အမေရိကာန်ဂှ်တှ်ေ ဗလးအာ ဇၞော်သ္ကိုပ်သဳအိုၚ်အေတံဏောၚ် မဒှ်ရ။ ပေါဲသဳကၠဳဏံဂှ် သွက်ဂွံစအာ ပ္ဍဲဂိတုဂျူလာၚ် ၂၈ ဂှ် စဳဇန်လဝ်ရ။
Ref: BBC