ရေဝ်၊ ဂျူလာၚ် ၂၈
ပ္ဍဲတွဵုရးဍုၚ်မန် ပွိုၚ်ဍုၚ်ရေဝ် ပ္ဍဲကွာန်တၟအ်ကၞေၚ်ဂှ် စနူဂိတုဂျူလာၚ် ၂၇ တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရောၚ် ဂွံတီကေတ် ဇရေၚ်ညးဒေသတံရ။
ဒပ်ကံၚ်ဇြဳပၞာန် ကၠုၚ်စိုပ်ဖျေံလဝ်ဒပ် ပ္ဍဲဘာလကျာ်ကွာန်တၟအ်ကၞေၚ် နကဵုဇြဟတ် ၁၀၀ ပြၚ်ဂှ် ဒပ်ပၞာန်ဗၠးၜးကောန်ဂကူကရေၚ် KNLA၊ ဒပ် PDF တံ လုပ်စိုပ်ဗ္တိုက်လဝ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အပ္ဍဲပေါဲဗ္တိုက်က္တဵုဒှ်လဝ် လလအ်ပွိုၚ်မွဲနာဍဳပြၚ်ဂှ် ပရေၚ်ဇီုကပိုက်ချိုတ် ၜါလ္ပာ်တံ နွံကီုလေဝ် လၟိဟ်ချိုတ်တ်ပၠိုတ်တ်ဂှ် ဟွံဂွံတီကေတ်ဏီရ။
အတိုၚ်ဂလာန်ညးဒေသတံဂှ်မ္ဂး ကွာန်တၟအ်ကၞေၚ်ဝွံ ဒှ်ကွာန်ဒပ်ပၠန်ဂတး သၟဝ်ပၠတရဴ KNLA တံ ထိၚ်ဒက်လဝ်တုဲ လ္ပာ်ကံၚ်ဇြဳပၞာန် ဟိုတ်နူထ္ပက်ကၠုၚ်ကရောၚ်ပၞာန်တုဲ ပေါဲဗ္တိုက်ၜါလ္ပာ် က္တဵုဒှ်လဝ်ရ။
အပ္ဍဲအခိၚ်ပေါဲဗ္တိုက်က္တဵုဒှ်ဂှ် နူဒပ်ခလရ ၁၀၆ ဖျေံသ္ဇိုၚ်ကွာန်တၟအ်ကၞေၚ် ဍုၚ်လၟိုၚ်ဂှ် ပလံၚ်ဗစိုပ်လဝ် ဇြဟတ်ဒပ်ပံၚ်ကောံ ၈၀ ပြၚ်တုဲ နူတမ်ဒပ်ကံၚ်ဇြဳပၞာန် ဖျေံသ္ဇိုၚ်ရေဝ်ဂှ်လေဝ် ဘိုၚ်ပန်ပှော်လဝ်လွဟ်ဇၞော် ဟွံပိုတ်သ္ကုတ်ဂှ် ဂွံတီကေတ်ရ။
စပ်ကဵုအကာဲအရာပေါဲဗ္တိုက်ၜါလ္ပာ်တုဲ နူကဵုသြၚ်လောန်တိုၚ်(မ်) ဆက်စၠောံသၟာန်သၟုက်လဝ် ညးတာလျိုၚ် ဒပ်ပံၚ်ကောံဇြဟတ်ပၠန်ဂတးတံကီု သီုကဵု KNU တံဂှ်ကီုလေဝ် ဒဵုကဵုအခိၚ်လၟုဟ် ကလေၚ်သှ်ကဵုလဝ် ဟွံမွဲဏီရ။
ပ္ဍဲထလဳဂရာမ်ချာန်နေဝ် ရဲထံက်ဂလာန်ဒပ်ပၞာန်တံဂှ် အပ္ဍဲပေါဲဗ္တိုက်တၟအ်ကၞေၚ်ဂှ် လ္ပာ်ဒပ်ပံၚ်ကောံ KNLA တံ ကောန်သ္ဂံၚ်မွဲတၠ ချိုတ်တုဲ မကမ်လွဟ်လက်နက်လ္ၚဵုတံလေဝ် သီဂွံလဝ်ရောၚ် ချူထ္မံက်ထ္ၜးဒၟံၚ်တံ နွံဒၟံၚ်ရ။
ဟိုတ်နူပေါဲဗ္တိုက်တၟအ်ကၞေၚ်တုဲ ပ္ဍဲကဵုသ္ကုတ်ဂၠံၚ်ရေဝ်−ထဝါဲဂှ် ကွဳစက်ဂၠိုၚ်ကဵုကၠံ အာကၠုၚ်ဟွံဂွံဒှ်လဝ်တုဲ ၜိုတ်အခိၚ်လဒေါဝ်တ္ၚဲမှ ဂွံကလေၚ်အာကၠုၚ်လဝ်ဂှ် ဂွံတီကေတ် အတိုၚ်ဂလာန် ညးဍုၚ်ကွာန်အာတရဴတံရ။
တုဲကၠုၚ် ပ္ဍဲဂိတုဂျူလာၚ် ၂၆ တေံဂှ်လေဝ် အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ဗ္ဒါဲကွာန်စဳပျး ပွိုၚ်ဍုၚ်ရေဝ်ဂှ် လ္ပာ်ဒပ်ပၠန်ဂတးတံ ရပ်ဂွံလဝ် ကောန်ဒပ်ကံၚ်ဇြဳပၞာန်ပိတၠတုဲ လွဟ်လက်နက်မကမ်လ္ၚဵုတံလဝ် သီဂွံလဝ်ရ။
ပ္ဍဲပွိုၚ်ဍုၚ်ရေဝ် လလောၚ်တြးလဝ် ပရေၚ်အုပ်ဓုပ်ပၞာန်ဂှ် သွက်ဂွံကလေၚ်အုပ်ဓလီုတိဍာ်ဂးတုဲ စနူဂိတုဂျူလာၚ် သတ္တာဟတတိယတုဲကၠုၚ်တေံတုဲ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ပေါဲဗ္တိုက်ၜါလ္ပာ်တံ ကလေၚ်က္တဵုဒှ်ကၠုၚ် စေအ်အ်ရ။
ပရိုၚ်−သြၚ်လောန်တိုၚ်(မ်)
ဗီု−CJ