ထဝါဲ၊ အဝ်ဂါတ် ၁
ဒပ်ကံၚ်ဇြဳပၞာန် လုပ်ကၠတ်ဂၠံက်သ္ၚိဒၟံၚ်ညးဒေသ နူကဵုကွာန်မံၚ်မေဝ်ယှံၚ် ပွိုၚ်ဍုၚ်ထဝါဲ ရးတၞၚ်သဳတံဂှ် ဒးဒုၚ်ဗ္တိုက်တုဲ ၁၀ တၠ ချိုတ်အာလဝ်ရောၚ် ဒပ်ပံၚ်ကောံစဵုဒၞါညးဍုၚ်ကွာန်တံ လလောၚ်ပ္တိတ်လဝ် ပ္ဍဲဂိတုဂျူလာၚ် ၃၁ တေံရ။
တုဲကၠုၚ်ပ္ဍဲဂိတုဂျူလာၚ် ၂၄ တေံ ဒပ်ကံၚ်ဇြဳပၞာန် ဇြဟတ်ဒပ် ၇၀ ပြၚ် ကြဴနူလုပ်စိုပ်ကၠုၚ် ပ္ဍဲကဵုကွာန်ဏံတုဲဂှ် ဟိုတ်နူပရိုၚ် လုပ်စိုပ်ကၠတ်ဂၠံက်ဒၟံၚ် သ္ၚိဒၟံၚ်ညးဒေသတံဂှ်တုဲ ဒပ်ပံၚ်ကောံစဵုဒၞါညးဍုၚ်ကွာန်တံ အာစိုပ်ဗ္တိုက်လဝ်ရ။
ပ္ဍဲကဵုပရေၚ်ဗ္တိုက်ဏံဂှ် ပရေၚ်ပန်ပှော်ၜါလ္ပာ် က္တဵုဒှ်လဝ် လလအ်ပွိုၚ် ၂၀ မိနေတ်တုဲ လ္ပာ်ကံၚ်ဇြဳပၞာန် ဟိုတ်နူဒးဒုၚ်ကြတ်ဗ္တိုက်လဝ်တဲဒ ပရေၚ်ဇီုကပိုက်ချိုတ်တံ ဂၠိုၚ်လဝ်ရောၚ် ညးဒုၚ်တာလျိုၚ်လလောၚ်ပရိုၚ် ဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပရေၚ်ဗ္တိုက်ဏံ လ္ပာ်ကံၚ်ဇြဳပၞာန် ကောန်ဒပ် ၁၀ တၠ ချိုတ်တုဲ သၞာဲဒဴဗၠာဲသၟိၚ်မွဲတၠ မပါလုပ် ဒ္စါံတၠ ကလိဂွံလဝ်ဝပ်တုဲ လ္ပာ်ဒပ်ပံၚ်ကောံစဵုဒၞါညးဍုၚ်ကွာန်တံ ဇီုကပိုက်ဒးဟွံမွဲပုဟ်ဂှ် သ္ဂးရ။
ပ္ဍဲပရေၚ်ဗ္တိုက်ဏံဂှ် သီုဒပ်စဵုဒၞါညးဍုၚ်ကွာန်ပွိုၚ်ဍုၚ်ဍာ်ဗု မပါလုပ် DNLA, TPLF, ပကဖထဝါဲ ဨဒေန်မူ၊ DGRF ၊ ဒပ်ပံၚ်ကောံကရောၚ်ပၞာန် သာဂရတံ ပါလုပ်ရ။
ဒပ်ကံၚ်ဇြဳပၞာန် ဖျေံဒပ် ပ္ဍဲကွာန်မံၚ်မေဝ်ယှံၚ် ပွိုၚ်မသုန်တ္ၚဲတုဲ လုပ်စိုပ်ကၠတ်ဂၠံက်လဝ် သ္ၚိဒၟံၚ်ညးဒေသတံဂှ်ဝွံ ကြဴနူဒးဒုၚ်ဗ္တိုက်တုဲ ပ္ဍဲဂိတုဂျူလာၚ် ၂၈ ဂှ် ကရောၚ်ပၞာန်ကလေၚ်တိတ်အာဂှ် ဂွံတီကေတ် ဇရေၚ်ညးဒေသတံရ။
ကရောၚ်ပၞာန်ဏံဝွံ ရပ်ဒက်လဝ် ညးဒေသကွာန်မံၚ်မေဝ်ယှံၚ် ဟွံအောန်နူကဵု ၃ တၠတုဲ ပ္ဍဲကဵုဏံ ကိုဝ်ဇြဝ်ဝ် အာယုက် ၂၅ သၞာံဝွံ ဒဵုကဵုအခိၚ်လၟုဟ် ဟွံဂွံပရိုၚ်မွဲသာ် ကၠေံဒၟံၚ်တုဲ ညးဒေသသှ်ေတံဂှ်တှ်ေ ကလေၚ်ဗၠးကၠုၚ်ယျဂှ် ဂွံတီကေတ်ရ။
ပ္ဍဲကွာန်မံၚ်မေဝ်ယှံၚ်ဂှ် ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် ကေုာံ ဖျေံဒၟံၚ်ဒပ်တံ မွဲဏှမွဲဏှဂှ်တုဲ ညးဍုၚ်ကွာန်ဒေသဗွဲမဂၠိုၚ်ဝွံ လောန်ကၠုၚ်နူၜါဂိတုတုဲကၠုၚ်တေံရ ထောံလသာသ္ၚိဌာန်ဂြိပ်ဒဴပါဲဒလေတ်အာတုဲ ဒဵုကဵုအခိၚ်လၟုဟ် ဟွံဂံၚ်ကလေၚ်စဴဌာန်ဒၟံၚ်ဏီဖိုဟ်ရ။
ပရိုၚ်−သြၚ်လောန်တိုၚ်(မ်)
ဗီု−CJ