ဘာအၚ်၊ အဝ်ဂါတ် ၁
တွဵုရးကရေၚ် ပွိုၚ်ဍုၚ်ဗွဲမဂၠိုၚ် အပ္ဍဲကာလဍာ်ဇၞော်ဍာ်ကလိုပ်ဏံ ညးဍုၚ်ကွာန် ၅ တၠ ချိုတ်လဝ်တုဲ ညးဍုၚ်ကွာန် ဗ္ဒါဲ ၃၀၀၀၀ ဒးဆုဲပြံၚ်လဝ် ဇရေၚ်ဗ္ဒိုပ်ဒးဘဲပၞာန်တံရောၚ်ဂှ် ဂွံတီကေတ် ဇရေၚ်ဂကောံရီုဗၚ်ဟံၚ်ပြာ်မှာဇန် ကေုာံ ကံၚ်ဇြဳပၞာန်တွဵုရးရ။
တုဲကၠုၚ်ဂိတုဂျူလာၚ် ၂၅ တေံ ပ္ဍဲတွဵုရးကရေၚ် လ္တူဍုၚ်ဗြဝတဳ ပယျဵုသေံ−ဗၟာဂှ် ဗြဲရိုပ်ဂူလဝ်တုဲ ဍာ်ၜဳ (သောင်းရင်း) ပဵုတိုန်ကၠုၚ် နကဵုအသိၚ်တုဲ ဍာ်ဇၞော်အာလဝ် ဗၞတ်ပွိုၚ် ၃ တ္ၚဲတုဲ အပ္ဍဲကာလဍာ်ဇၞော်ဏံဂှ် ကောန်ၚာ်မွဲတၠ မပါလုပ် ညးဍုၚ်ကွာန် ၃ တၠ ဒးချိုတ်အာလဝ်တုဲ သ္ၚိဒၟံၚ်ဗွဲမဂၠိုၚ်ဂၠေၚ် ဒးလီုလာ်အာလဝ်ရ။
ဍုၚ်ဗြဝတဳ အပ္ဍဲဍာ်ၜဳ(သောင်းရင်း) ဍာ်ဇၞော်ဂှ် ဒးပံက်လဝ် ဗ္ဒိုပ်ရီုဗၚ်ဟံၚ်ပြာ်ဘဲဍာ်ယာယဳ ၁၃ တုဲ သ္ၚိကၟိန် ၁၄၃၇၊ လၟိဟ်မၞိဟ်ဂၠိုၚ်ကဵုလ္ၚီ ဒးဇူဒီုဒၟံၚ် ပ္ဍဲဗ္ဒိုပ်ဟံၚ်ပြာ်ဂှ်တုဲ ပ္ဍဲဂိတုဂျူလာၚ် ၂၇ ဂှ် ဍာ်ၜဳကလေၚ်စှ်ေအာလဝ်ရ။
အတိုၚ်တၚ်လလောၚ်တြး ဌာနစမ်ၜတ်အကာဲအရာဗြဲကျာ ဂိတုဂျူလာၚ် ၃၁ ဂှ်မ္ဂး ဍာ်ၜဳ(သောင်းရင်း) ဝွံ ၜက်ဒၟံၚ် ဗ္ၜတ်ဂၠးမုက်ဍာ်ဍုၚ်ဗြဝတဳ ဗၞတ် ၁ ပေပြၚ်ဒၟံၚ်တုဲ ဍာ်ၜဳဏံဝွံ မွဲတ္ၚဲပၠန်မ္ဂး သၠုၚ်တိုန်ကၠုၚ် ၁ ပေဘာ်မာန်တုဲ ဒၟါနူဆက်နွံဒၟံၚ် လ္တူဂၠးမုက်ဍာ်ဍုၚ်ဂှ်ရ ညးမံၚ်စံၚ် ကြပ်ကဵုဇိုၚ်ၜဳတံကဵု လ္ပာ်သဝ်ဝ်တံဂှ် သွက်ဂွံစွံသတိဗွဲတၟေၚ်အိုတ်ဂှ် ကဵုလဝ်သမ္တီရ။
သ္အာၚ်နူဂှ်ပၠန် ပ္ဍဲဍုၚ်ကျာ်ဍုၚ်၊ ပွိုၚ်ဍုၚ်လှာဒကှ်ဂှ် အပ္ဍဲကာလဍာ်ၜဳ (ဟောင်သရော) ဍာ်ဇၞော်ဂှ် မၞိဟ်တြုံမွဲတၠ ချိုတ်တုဲ အခိၚ်လၟုဟ် ပ္ဍဲဍုၚ်ကျာ်ဍုၚ် ဍာ်ကလေၚ်စှ်ေအာယျဂှ် ဂွံတီကေတ် အတိုၚ်ဂလာန်ညးဒေသတံရ။
ပ္ဍဲဍုၚ်ဘာအၚ် ဍာ်ၜဳသၚ်လောန် စိုပ်ဒၟံၚ်လ္တူဂၠးမုက်ဍာ်ဒးဂွိၚ်ဂှ်ဝွံ ပ္ဍဲဂိတုဂျူလာၚ် ၃၁ ဂှ် ဍာ်ကလေၚ်စှ်ေအာကီုလေဝ် ဆက်နွံဒၟံၚ် လ္တူဂၠးမုက်ဍာ်ဍုၚ်ဂှ်ဖိုဟ် မဒှ်တုဲ မွဲတ္ၚဲပၠန်မ္ဂး စှ်ေကၠုၚ် ၁ ပေဘာ်မာန်တုဲ ဆက်နွံဒၟံၚ် လ္တူဂၠးမုက်ဍာ်ဍုၚ်ဂှ်မာန်ရောၚ် ဌာနစမ်ၜတ်အကာဲအရာဗြဲကျာ ချိၚ်ခယျလဝ်ရ။
အပ္ဍဲကဵုဍာ်ဇၞော် ပွိုၚ်ဍုၚ်ဘာအၚ်ဂှ် ညးဍုၚ်ကွာန်မွဲတၠ ဒးအိုတ်အာလဝ်လမျီုတုဲ ညးဍုၚ်ကွာန် ၈၀၀၀ ပြၚ် ဒးမံၚ်စံၚ်ဒၟံၚ် ပ္ဍဲဗ္ဒိုပ်ရီုဗၚ်ဟံၚ်ပြာ်ဒးဘဲဍာ်တုဲ နွံပၟိက်ဒၟံၚ်ကဵု အရီုဗၚ်ဍာ်သုၚ်၊ စၞစတံရောၚ်ဂှ်လေဝ် ဂကောံရီုဗၚ်ဟံၚ်ပြာ်မှာဇန်တံ ဟီုရ။
ပ္ဍဲတွဵုရးကရေၚ် ဟိုတ်နူဍာ်ဇၞော်တုဲ ပ္ဍဲကဵုဍုၚ်ဘာအၚ်၊ ဗြဝတဳ၊ ကျာ်ဍုၚ်၊ လိုၚ်ဗၠဲ၊ ကမမံၚ်၊ ပိုၚ်ကြုၚ်၊ လှာဒကှ်၊ ကအ်ကြိက်၊ ကြုၚ်ဒဵုတံဂှ် ဒးမံၚ်ဘဲဍာ်တုဲ ဒးပံက်လဝ် ဗ္ဒိုပ်ဟံၚ်ပြာ် ၆၀ တုဲ ညးဍုၚ်ကွာန် ၂၈၀၀၀ ပြၚ် လုပ်စိုပ်ဇူဒီုဒၟံၚ်ရောၚ် ဂွံတီကေတ်ရ။
ၚုဟ်ဗၞိက်ဖျာသၠုၚ်တုဲ အခိၚ်ဒးမံၚ်ဘဲပၞာန်ဂှ် ဟိုတ်နူဍာ်ဇၞော်ဏံတုဲ ညးဍုၚ်ကွာန်နွံအပ္ဍဲတွဵုရးကရေၚ် ဗွဲမဂၠိုၚ်ဂၠေၚ် ဒးဂဗဒၟံၚ်ကဵု အခက်အခုဲနာနာသာ် မပ္တံကဵုအခက်အခုဲပရေၚ်ပိုန်ဒြပ်ဘဝမၞိဟ်၊ အခက်အခုဲပရေၚ်ထတ်ယုက် ကေုာံ အခက်အခုဲပရေၚ်အာကၠုၚ်တံရ။
ပရိုၚ်−သြၚ်လောန်တိုၚ်(မ်)
ဗီု−CJ