ရေဝ်၊ အဝ်ဂါတ် ၁
သွက်ဂွံကလေၚ်အုပ်ဓလီု သ္ကုတ်ဂၠံၚ်ဇြပ်ဗု−ရေဝ်−ထဝါဲ မဒှ်ဂၠံၚ်ဇၞော်ပျဳထံၚ်သု စၟတ် ၈ ပေၚ်ၚ်ဂှ် ကံၚ်ဇြဳပၞာန် ဂလိုၚ်ပ္တိုန်ဇြဟတ်တုဲ ပ္တိတ်ကၠုၚ်ဒၟံၚ်ဇြဟတ် နကဵုပရေၚ်ချဳဒရာၚ်ပရေၚ်ပၞာန်တံရောၚ်ဂှ် ဂွံတီကေတ် ဇရေၚ်ညးဒေသတံကဵု ဂကောံပၠန်ဂတးတံရ။
နကဵုကံၚ်ဇြဳပၞာန် ကောန်ပၞာန်နူကရောၚ်ပၞာန်အံၚ်ဇေယျ ကဆံၚ်ကၟိန်ဍုၚ် မကလေၚ်ရုပ်သီလဝ်ဂှ်ကီု၊ ပါလုပ်သီုကဵုကောန်ပၞာန်စှ်ေနူတန်ဗ္တောန်ကွတ်ပၞာန်တၟိတၟိတံ ကေုာံ ကောန်ပၞာန်တြေံတြေံတံဂှ် ပံၚ်တုဲ တြးကၠုၚ်ဇြဟတ် စဵုကဵုသ္ကုတ်ဂၠံၚ်ဇြပ်ဗု−ရေဝ်−ထဝါဲတုဲ ချဳဒရာၚ်ကၠုၚ်ဒၟံၚ်ရ။
ဂကောံပၞာန်မၚ်ကွာန်ရုတ်တံၚ် ဇြဟတ် ၇၀ ကံၚ်ဇြဳပၞာန် ပအပ်ကဵုလဝ်လွဟ် ပ္ဍဲကဵုဍုၚ်ဒပ်ရေဝ် နွံသၟဝ်တဲဌာန်ဂအုပ်ပၞာန်ရးအဂၞဲ အပ္ဍဲသတ္တာဟတုဲကၠုၚ်တေံဂှ်လေဝ် ပါလုပ်ဒၟံၚ် ပ္ဍဲကရောၚ်ပၞာန်ဏံဂှ် ဂွံတီကေတ် ဇရေၚ်ညးဒေသတံရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဖျေံသ္ဇိုၚ်ရေဝ်သၠုၚ်ကျာဂှ် ပ္ဍဲရေဝ်သၠုၚ်ကျာကဵု လ္ပာ်ဍာ်ဗုတံဂှ် ဒပ်ကံၚ်ဇြဳပၞာန် ချဳဒရာၚ်ဒၟံၚ် နကဵုကရောၚ်ပၞာန်ပန်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နကဵုကံၚ်ဇြဳပၞာန်လၟုဟ်ဏံ လ္ပာ်ရေဝ်သၠုၚ်ကျာဂှ် ချဳဒရာၚ်ဒၟံၚ် နကဵုကရောၚ်ပၞာန်ပန်ကရောၚ် နွံဒၟံၚ်ရ။ ကရောၚ်ပၞာန်ပန်ကရောၚ် နကဵုကောန်ပၞာန်စှ်ေနူတန်ဗ္တောန်ကွတ်ပၞာန်တၟိတၟိ လၟေၚ် (၁) တံဂှ် ပံက်ကဵုမၞိဟ်တြေံတြေံတံတုဲ ဒက်ပ္တန်လဝ်ဂှ်နွံရ။ တုဲတှ်ေ ချဳဒရာၚ်ဒၟံၚ် လ္ပာ်ရေဝ်သၠုၚ်ကျာကဵု လ္ပာ်သ္ကုတ်သၟဝ်ကျာဍာ်ဗု အဓိကဂှ် နွံ” သာ်ဝွံ သ္ဂးရ။
ပ္ဍဲသ္ကုတ်သၟဝ်ကျာ ပွိုၚ်ဍုၚ်ရေဝ်ဂှ်တှ်ေ ပ္ဍဲကဵုဗ္ဒိုပ်ဖျေံသ္ဇိုၚ်တမ်ဒပ်ကံၚ်ဇြဳပၞာန်တံကဵု ဒၞါဲဒဒန်ဂၠိၚ်ၚ်တံဂှ် ပ္တိတ်လဝ်ဗာန်ကာတံ၊ ဂဒုက် မစှ်ေကဵုဗျူဟာတံဂှ်တုဲ ကၠောန်ကၠုၚ်ဒၟံၚ်ဗီုပြၚ် သၞေဟ်ကၚ်စဵုဒၞါတံဂှ်ရ။
သ္အာၚ်နူဂှ်ပၠန် ပ္ဍဲရေဝ်သၠုၚ်ကျာဂှ် ဟိုတ်နူပရေၚ်ပၞာန်ကြံၚ်မ္ၚိုဟ်ကၠုၚ်ဒၟံၚ်ဂှ်ရ မွဲဒမြိပ်ဂၠံၚ်ကွဳစက်ရေဝ်−ထဝါဲ လ္တူကုန်ဒဵု ဒၞါဲမစှ်ေကဵုဗျူဟာတံဂှ် ဒက်ပ္တန်ကၠုၚ် ဗ္ဒိုပ်ပၞာန်ဍောတ်တ်တံ ခိုၚ်ၚ်ဗိုန်န်ဂှ် နာဲနဂါ လဴထ္ၜးလဝ်ရ။
ညးဒေသရေဝ်မွဲတၠဂှ်တှ်ေ လ္တူဂၠံၚ်ဇၞော် တတ်အာကွာန်ဝါခမိ၊ ကွာန်( ရွာသာအေး) ၊ ကွာန်ဗေလၟိုၚ်၊ ပါၚ်ဂၠံၚ်နှေဟ်ခရေၚ် ကေုာံ ကွာန်ကျာ် နွံလ္တူသ္ကုတ်ဂၠံၚ်ဇြပ်ဗု−ရေဝ်ဂှ် ကောန်ဒပ်ကံၚ်ဇြဳပၞာန်တံ ကေတ်လဝ်ဒၞါဲရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပြဟ်ဟ်ဏံ နူဇြပ်ဗု စဵုကဵုဍုၚ်ရေဝ် ဒပ်ကံၚ်ဇြဳပၞာန်တံ လ္တက်ကယျိုၚ်ပၞာန်တုဲ မွဲမွဲဒၞါ အကြာ ၃၀ ကဵု ၄၀ နွံဂှ် ညးဒေသတံ ဆက်ဟီုရ။
“ပြဟ်ဟ်ဏံ နူစပွိုၚ်ဍုၚ်ရေဝ်ဏံတုဲ စဵုကဵုလ္ပာ်ဇြပ်ဗုဂှ် ဍေံတံ (စကစ) နွံဒၟံၚ်ရ။ ဆ္ဂး ( ဒဵုကဵုမွဲဒမြိပ်ဂၠံၚ်ကွဳစက် ဇြပ်ဗု−ရေဝ်) ဂှ် ဟွံပေၚ်ဏီပုဟ်၊ ဒၞါဲသၠးဒၟံၚ်ညိညဂှ်နွံ။ ဗဒေါအ်ကွဳစက်တံဂှ်တုဲ လဆောဝ်လဆောဝ် စၟဳတ်ဒၟံၚ်သီုဖုၚ်တံမုတံ ညိညကီုရ။ လဆောဝ်တှ်ေ ဟွံစၟဳတ်ပုဟ်။ မွဲဒၞါဲတှ်ေ အောန်အိုတ် ၜိုတ် ၃၀/၄၀” သာ်ဝွံ သ္ဂးရ။
ဟိုတ်နူပရေၚ်ချဳဒရာၚ် ကံၚ်ဇြဳပၞာန်တုဲ စနူဂိတုဂျူလာၚ် သတ္တာဟတတိယတုဲ သီုကဵုကွာန် နူပွိုၚ်ဍုၚ်ဇြပ်ဗုညိညကီု၊ စဵုကဵုကွာန်တၟအ်ကၞေၚ်၊ ကွာန်ကၞေၚ်တၟအ် ကေုာံ ကွာန်လိမ္မဴ ပ္ဍဲပွိုၚ်ဍုၚ်ရေဝ်တံဂှ် ပေါဲဗ္တိုက်ဆေၚ်မုက် ကုဒပ်ပံၚ်ကောံပၠန်ဂတးတံ က္တဵုဒှ်ဒၟံၚ်မွဲဏှမွဲဏှရ။
ပ္ဍဲဂိတုဂျူလာၚ် ၂၉ တေံ လ္တူဂၠံၚ်ဇၞော်ပျဳထံၚ်သု စၟတ် ၈ အကြာကွာန်( ရွာသာအေး) ကဵု ကွာန်ဝါခမိ ပွိုၚ်ဍုၚ်ဇြပ်ဗုဂှ် နကဵုဇြဟတ်ဒပ် ၁၀၀ ပြၚ်ဂှ် ပါ်ကရောၚ်ပၞာန်ၜါတုဲ ကံၚ်ဇြဳပၞာန် ထ္ပက်လဝ်ပၞာန်ရ။
ဟိုတ်ဂှ်ရ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တုက်ဆေၚ်မုက် က္တဵုဒှ်လဝ် လလအ်ပွိုၚ်ဘာ်နာဍဳတုဲ လ္ပာ်ကံၚ်ဇြဳပၞာန် ကောန်ဒပ်မသုန်တၠ ချိုတ်လဝ်ရောၚ် ဂွံတီကေတ် နူကဵုကရောၚ်ပၞာန်ဒံၚ်ညဵုရ။
လအာတုပ်သာ်ဂှ်ကီု ပ္ဍဲဂိတုဂျူလာၚ် ၂၉ ဂှ်ရ ဗ္ဒါဲကွာန်ကၠအ်လိမ္မဴ ပွိုၚ်ဍုၚ်ရေဝ်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ပေါဲဗ္တိုက်ၜါလ္ပာ် သ္ကာတ်မြဟ်လဝ်တုဲ အပ္ဍဲပေါဲဗ္တိုက်ဂှ် ညးဍုၚ်ကွာန်ကောန်အရာပ်ၜါတၠ ဒးမကမ်ကလိဂွံအာလဝ်ဝပ်ဏီရ။
နာဲနဂါဂှ်တှ်ေ ပရေၚ်ချဳဒရာၚ်ပရေၚ်ပၞာန် ကံၚ်ဇြဳပၞာန်ဂှ်ဝွံ ညံၚ်ကောန်ပၞာန်စှ်ေနူတန်ဗ္တောန်တၟိတၟိတံ ဂွံစိုန်သ္ကီု စပ်ကဵုတိဍာ်တံကဵု ဂွံကလေၚ်ထိၚ်ဒက် သ္ကုတ်ဂၠံၚ်ဇၞော်ပျဳထံၚ်သု စၟတ် ၈ တံ မဒှ်ရောၚ်ဂှ် ဟီုလဴထ္ၜးလဝ် လညာတ်ညးရ။
“ပရေၚ်ချဳဒရာၚ်ညးတံဂှ်တှ်ေ လညာတ်အဲမ္ဂး နွံ ၂ တၚ်ရ။ မွဲဂှ် ကောန်ပၞာန်စှ်ေနူတန်ဗ္တောန်ဂမၠိုၚ် ဂွံဂွံပရေၚ်ဆဵုဂဗ၊ မွဲပၠန်ဂှ် ဂွံစိုန်သ္ကီု စပ်ကဵုတိဍာ်တံကဵု ပ္ဍဲအရာၚးတးတိဍာ်တံတုဲ တၚ်ရန်တၟံအဓိကၜါဏံ နွံရောၚ် ဂွံတီကေတ်ရ။ တုဲပၠန် သ္ကုတ်ဂၠံၚ်ဇၞော် ရေဝ်−ထဝါဲ စၟတ် ၈ ပိုယ်တံ ဒးဆုတ်ကလေၚ်ကဵုလဝ်ဂှ် သွက်ဂွံထိၚ်ဒက်မာန်တုဲ ချဳဒရာၚ်လဝ်ရောၚ် ပတှ်ေကေတ်ရ” သာ်ဝွံ သ္ဂးရ။
ဟိုတ်ဂှ်ရ ပ္ဍဲကဵုသ္ကုတ်ဂၠံၚ်ဇြပ်ဗု−ရေဝ်−ထဝါဲ ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ် ပေါဲဗ္တိုက်ၜါလ္ပာ်တံ က္တဵုဒှ်ဒၟံၚ် စေအ်အ်တုဲ နကဵုညးဍုၚ်ကွာန်ဂမၠိုၚ် ဟွံမွဲပၟိက်မ္ဂး လ္ပအာတရဴအိုတ်ညိဂှ် ဒပ်ပံၚ်ကောံပၠန်ဂတးတံ ဖ္တိုက်ဖ္အောဝ်လဝ်ရ။
အတိုၚ်ဂကောံသုတေသန ရာမညအေန်သတဳကျုတ် RICE လ္ၚတ်လဝ်ဂှ်မ္ဂး သ္ကုတ်ဂၠံၚ်ဇြပ်ဗု−ရေဝ်ဂှ် KNLA သၟဝ်တဲဗော်သွးကောန်ဂကူကရေၚ် KNU ကဵု ဒပ်ပံၚ်ကောံကရောၚ်ပၞာန်ဒံၚ်ညဵုတံ ထိၚ်ဒက်လဝ်ရ။
သ္ကုတ်ဂၠံၚ်ရေဝ်−ထဝါဲဂှ်တှ်ေ ဗော်ဍုၚ်မန်တၟိ AD ၊ ဒပ်ပၠန်ဂတးဍုၚ်မန် MSRF ၊ ဒပ်စဵုဒၞါဍုၚ်မန် MSDF ကေုာံ ဒပ်ပံၚ်ကောံ ကရောၚ်ပၞာန်ဒဝ်ဏတံ ထိၚ်ဒက်လဝ်ရောၚ် ထ္မံက်ထ္ၜးလဝ် ပ္ဍဲကဵုလိက်ဒုၚ်စဳရေၚ် တၚ်သ္ၚဳဂၠိပ်လၟေၚ်သတ္တာဟ RICE ရ။
ပရိုၚ်−သြၚ်လောန်တိုၚ်(မ်)
ဗီု−TLT