ခိုဝ်ချဳ၊ ဂျူလာၚ် ၃၁
သ္ကုတ်သၠုၚ်ကျာဍုၚ်အိန္ဒိယ ပ္ဍဲတွဵုရးကာရလာဂှ် ဗြဲရိုပ်ဂူ တိလာ်တုဲ မၞိဟ် ၁၀၆ တၠ ချိုတ်အာလဝ်ရောၚ် မဳဒဳယျာအပ္ဍဲဒေသတံ ထ္မံက်ထ္ၜးလဝ် ပ္ဍဲဂိတုဂျူလာၚ် ၃၀ တေံရ။
တွဵုရးကာရလာ ဒေသဝါယာနက် ယၟုဒယှ်ဒၟံၚ် နဒဒှ်တွဵုရးမၞိဟ်ဒးစိုတ်ဂၠိုၚ် အကြာညးအာတရဴဂၠးတိတံဂှ် ပ္ဍဲဂိတုဂျူလာၚ် ၂၉ တေံ ဗြဲရိုပ်ဂူ ဗွဲမသ္ကာတ်မြဟ်တုဲ အခိၚ်ဗ္တံဂှ် ဒၞါဲကုန်သၠုၚ်ၚ်တံ လာ်စှ်ေအာလဝ်ရ။
ညးဒးဇီုကပိုက်ချိုတ်အာ ဗွဲမဂၠိုၚ်ဂှ်ဝွံ ဒှ်သၟာကမၠောန်နူကၠအ်တဵုလက်ဖက်တံကဵု ဂြောဝ်ဂတာညးတံတုဲ အခိၚ်တိက်သၠိၚ်ဒၟံၚ် ပ္ဍဲကဵုသ္ၚိတာဲ သိုၚ်ခၞံလဝ် နကဵုတဲတံဂှ် တိလာ် က္တဵုဒှ်လဝ်ရ။
ပ္ဍဲကဵုဗီုရုပ် ထ္ၜးရုပ်ရမျာၚ်တံဂှ်တှ်ေ တၞံဆုဂမၠိုၚ် ကၟိုၚ်တုဲ ဒှ်အာ တၞံဆုတၞဟ် ရိုဟ်တၞဟ်ကီု၊ စမြိုၚ်ကၟဳသောတ်တံ သရိုဟ်ဒၟံၚ်ကီု ကေုာံ ပ္ဍဲကဵုအကာဲအရာဍာ်တိပလေတ်တံ ဇွောဝ်စှ်ေဒၟံၚ်ဂှ် သၟာကမၠောန် ဒးကၠောန်သ္ပဒၟံၚ် ပရေၚ်ဟံၚ်ပြာ် ဗွဲမသ္ကာတ်မြဟ်တံဂှ် ဂွံဆဵုကေတ်ရ။
ဟိုတ်နူတိလာ်တုဲ မၞိဟ် ၁၀၆ တၠ ချိုတ်အာတုဲ ညးဇီုကပိုက်ကလိဂွံဝပ် ၁၂၈ တၠ ကေုာံ ညးကၠေံဒၟံၚ် ဂၠိုၚ်ကဵုဒါဇြိန်နွံဂှ် သၞာဲဒဴတွဵုရးဂှ် ဟီုရ။
မဳဒဳယျာအပ္ဍဲဒေသ Asianet TV ဂှ်တှ်ေ ညးမချိုတ်အာ ၁၁၉ တၠ နွံဂှ် လလောၚ်တြးလဝ်ရ။
ပ္ဍဲတွဵုရး ကာရလာဂှ် ပ္ဍဲသၞာံ ၂၀၁၈ တေံလေဝ် ဟိုတ်နူဍာ်ဇၞော်တုဲ မၞိဟ် ဗ္ဒါဲ ၄၀၀ ဒးချိုတ်အာတုဲ ပ္ဍဲကဵုပရေၚ်တိလာ် ပ္ဍဲဂိတုဂျူလာၚ် ၃၀ တုဲကၠုၚ်တေံဂှ်ဝွံ ဒှ်လၟေၚ်ဒဒှ်က္တဵုဒှ်အပ္ဍဲတွဵုရး ပရေံအိုတ်မွဲရ။
ညးမဗၠိုက်ဒၟံၚ် သၟဝ်တိ၊ ညးမဟဳအာ ကရောံဍာ်ဇွောဝ်တံလေဝ် နွံဂှ် သ္ကိုပ်ဝန်ဇၞော် တွဵုရးကာရလာ ပဳနာယာရဳ ဗဳဂျာယာန် ဟီုကဵု အ္စာပရိုၚ်ဂမၠိုၚ်ရ။
မၞိဟ် ၃၀၀၀ ပြၚ် နူကဵုဒေသဏံဂှ် ကော်ပ္တိတ်ဒၞါဲဗၠးဘဲတုဲ ဖျေံလဝ်ကဵုဒၞါဲဝါဲ ပ္ဍဲကဵုဗ္ဒိုပ်ဟံၚ်ပြာ် ၄၅ ဗ္ဒိုပ်ရောၚ် သ္ကိုပ်ဝန်ဇၞော် ဗဳဂျာယာန် ဟီုရ။
အခိၚ်မၞိဟ်ဂမၠိုၚ် တိက်သၠိၚ်ဒၟံၚ်ဂှ် တိလာ်က္တဵုဒှ်လဝ် ဟွံပိုတ်သ္ကုတ်ရောၚ် ညးဗၠးကၠုၚ်နူကဵုဘဲလမျီုမွဲတၠ ဟွံမိက်ထ္မံက်ယၟုဂှ် ဟီုရ။
ကၠာတိဟွံဂွံလာ် နူကဵုဒေသဏံ မၞိဟ်ဗွဲမဂၠိုၚ်ဂၠေၚ် ပြံၚ်ဆုဲအာဂှ်ရ ပရေၚ်ဇီုကပိုက်ချိုတ်တံ အောန်လဝ်ရောၚ် သ္ကိုပ်ဝန်ဇၞော် တွဵုရးဂှ် သ္ဂးရ။
ပ္ဍဲတွဵုရးကာရလာဂှ် စဵုကဵုမသုန်တ္ၚဲဂတဏံ ဗြဲရိုပ်ဂူဒၟံၚ်ဏီဏောၚ် ချိၚ်ခယျလဝ်ဂှ်ရ နကဵုညးဍုၚ်ကွာန်တံ သွက်ဂွံစွံသတိအိုတ်ဂှ် သ္ကိုပ်ဝန်ဇၞော် ဖ္တိုက်ဖ္အောဝ်လဝ်ရ။
Ref: Reuters