ရေဝ်၊ အဝ်ဂါတ် ၂
ပ္ဍဲတွဵုရးဍုၚ်မန် ပွိုၚ်ဍုၚ်ရေဝ် ဒၞါဲဒပ်ကံၚ်ဇြဳပၞာန် ကေုာံ ဂကောံပၞာန်မၚ်ကွာန်တံ ကၠုၚ်စိုပ်ဖျေံလဝ်ဒပ် ၜါဒၞါဲဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ်ရောၚ် ဂွံတီကေတ် ဇရေၚ်ညးဒေသတံရ။
ပ္ဍဲဂိတုဂျူလာၚ် ၃၁ အခိၚ်ဗ္တံ ၜိုတ် ၈ နာဍဳဂှ် ဒပ်ပံၚ်ကောံဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ် ဒပ်ကံၚ်ဇြဳပၞာန် ဇြဟတ်ဗ္ဒါဲ ၄၀ မလုပ်စိုပ်ဖျေံလဝ်ဒပ် ပ္ဍဲတၞုၚ်ကွာန်နှေဟ်ခရေၚ် ပွိုၚ်ဍုၚ်ရေဝ်ဂှ်ရ။
ပ္ဍဲဂိတုအဝ်ဂါတ် ၁ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ်လေဝ် ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲကုန်ကျာ် ကွာန် (နှၚ်းစုံ) ပွိုၚ်ဍုၚ်ရေဝ်ဂှ် ဒပ်ပၠန်ဂတးတံ လုပ်စိုပ်ဗ္တိုက်လဝ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ်ဗ္ဒါဲမွဲနာဍဳပြၚ်ရ။
အပ္ဍဲပရေၚ်ဗ္တိုက်ဏံဂှ် နူတမ်ဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ရေဝ်ဂှ် ဘိုၚ်ပန်ပှော်ကဵုလဝ် လွဟ်ဇၞော် ဟွံပိုတ်သ္ကုတ်တုဲ အကာဲအရာဇီုကပိုက်ချိုတ်အာ သီုၜါလ္ပာ်ဗွဲလစှ်ေဂှ် ဟွံဂွံတီကေတ်ဏီရ။
နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဂှ် စပ်ကဵုပေါဲဗ္တိုက်လၟုဟ်တုဲ ဂကောံဗလးတိတေံ ကၠုၚ်ပလံၚ်ဗစိုပ်လဝ်ပရိုၚ် ဟွံမွဲဏီဂှ်ရ ဟွံဂွံတီကေတ် အကာဲအရာဗွဲလစှ်ေဏီပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ သွက်ဂွံကလေၚ်ထိၚ်ဒက် သ္ကုတ်ဂၠံၚ်ဇြပ်ဗု−ရေဝ်−ထဝါဲ မဒှ်သ္ကုတ်ဂၠံၚ်ပျဳထံၚ်သု စၟတ် ၈ ဂှ်တုဲ စနူဂိတုဂျူလာၚ် သတ္တာဟဒုတိယ တုဲကၠုၚ်တေံတုဲ ထ္ပက်ကရောၚ်ပၞာန် ဗွဲဒမြိပ်ဂၠံၚ်ဏံဂှ်ကီု၊ လ္ဂောံကဵုဗျူဟာ ဖျေံဒပ်တံဂှ် ကၠောန်ၜိုတ်ဒၟံၚ်ရ။
ကောန်ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲသ္ကုတ်ဂၠံၚ်ဇြပ်ဗု−ရေဝ်−ထဝါဲဂှ်ဝွံ ကုညးဒေသတံကဵု ညးအာတရဴတံဂှ် စၟဳတ်ဒၟံၚ် ဖုၚ် ကေုာံ ကွဳလိုန်ဓာတ်တံ နွံဒၟံၚ်တုဲ ကၟာတ်လဒဵုသၞောတ်ဗ္ၜတ်လဝ် အခေါၚ်တတ်ကၠောံအာကၠုၚ်တံ နွံဒၟံၚ်ရောၚ် ဂွံတီကေတ် အတိုၚ်ဂလာန် ညးဒေသတံရ။
ဒပ်ပံၚ်ကောံ ဂကောံဇြဟတ်ပၠန်ဂတးတံဂှ်တှ်ေ ပ္ဍဲသ္ကုတ်ဂၠံၚ်ဇြပ်ဗု−ရေဝ်−ထဝါဲဂှ် ပေါဲဗ္တိုက်တံ သာသ္ကာတ်မြဟ်ကၠုၚ်တုဲ နကဵုညးဍုၚ်ကွာန်ဂမၠိုၚ် စွံသတိဗွဲတၟေၚ်တုဲ သွက်ဂွံအာကၠုၚ်အိုတ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−NMSP-AD