သဓီု၊ အဝ်ဂါတ် ၂
သ္ၚိဒၟံၚ် ဥူအေသဵု သ္ကိုပ်အုပ်ဓုပ် အရာပ် (ကျိုက္ကော်) ဍုၚ်သုဝဏ္ဏဝတဳ ပွိုၚ်ဍုၚ်သဓီု တွဵုရးဍုၚ်မန်ဂှ် ပ္ဍဲဂိတုအဝ်ဂါတ် ၁ အခိၚ်နူဂယးဂှ် ဒပ်ပံၚ်ကောံကံၚ်ဇြဳပၞာန်တံ ကၠုၚ်စိုပ်ကၟာတ်ဏာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္ကိုပ်အုပ်ဓုပ် ဥူအေသဵုဂှ် အပ္ဍဲဂိတုဂျူလာၚ်သတ္တာဟဒုတိယတုဲကၠုၚ်တေံ ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာလဝ် ပ္ဍဲသ္ၚိဒၟံၚ်တုဲဂှ် ကၟာတ်ဏာလဝ် သာ်ဏံရ။
အတိုၚ်ဂလာန်ညးဒေသတံဂှ်မ္ဂး ဥူအေသဵု သ္ကိုပ်အုပ်ဓုပ် ဒးဒုၚ်ရပ်ဂှ်ဝွံ နူလက်ထက်အလဵုအသဳ NLD စဵုကဵုလက်ထက် ကံၚ်ဇြဳပၞာန်ဂှ် ယိုက်လဝ်တာလျိုၚ် နဒဒှ်သ္ကိုပ်အုပ်ဓုပ်ရ။
ပ္ဍဲကဵုချာန်နေဝ်ထလဳဂရာမ် ရဲထံက်ဂလာန် ဒပ်ပၞာန်တံဂှ်တှ်ေ သ္ကိုပ်အုပ်ဓုပ် ဥူအေသဵုဝွံ ဒှ်ကောန်ဒပ်စဵုဒၞါညးဍုၚ်ကွာန် PDF မွဲတၠတုဲ ဟိုတ်နူကလိလောန်လဝ် ပွပကီုပရာပ်တံဂှ်ရ မ္ဒးကၟာတ်လဝ် သ္ၚိဒၟံၚ်ဂှ်ရောၚ် တြးဝါဒ ချူထ္မံက်ထ္ၜးဒၟံၚ်တံ နွံဒၟံၚ်ရ။
သ္ကိုပ်အုပ်ဓုပ် ဥူအေသဵု ဒးဒုၚ်ရပ်လဝ်ဂှ် ကံၚ်ဇြဳပၞာန် ပံက်လဝ်ဂဗုတ် နကဵုၝောံပိုဒ် သၞောဝ်ဗ္တိုက်သရိုဟ်ပွပကီုပရာပ်တံဂှ်တုဲ အခိၚ်လၟုဟ် ရပ်ဒက်လဝ် ပ္ဍဲထံၚ်သဓီုရ။
သ္အာၚ်နူဂှ်ပၠန် ညးဒေသ နူကဵုကွာန်ဒုၚ်သုက် ကေုာံ နူကဵုလ္တူဍုၚ်သဓီု ဟွံအောန်နူကဵု ၅ တၠဂှ် ဒးဒုၚ်ရပ်ဒက်စၟဳတ်ဒၟံၚ် နကဵုဟိုတ် ဆက်စပ်ဒၟံၚ်ကဵု သ္ကိုပ်အုပ်ဓုပ် ဥူအေသဵု နွံဂှ် ဂွံတီကေတ်ရ။
ပ္ဍဲပွိုၚ်ဍုၚ်သဓီု အပ္ဍဲကာလဒပ်ပၞာန်သီအဝဵုဏံ သီုသ္ၚိဒၟံၚ် ညးစၞးကၠတ်ထဝ်တံ မပါလုပ် သ္ၚိဒၟံၚ်ညးချဳဒရာၚ်က္တိုၚ်ကၟဟ်တံကဵု ညးဒေသတံ ဟွံအောန်နူကဵု ၁၅ မ ဒးဒုၚ်ကၟာတ်လဒဵုလဝ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram